Aktori i xiangshengut Jiang Kun është nxënës i Ma Ji-së. Ai u shpreh:

"Pasi morën vesh lajmin e vdekjes së zotit Ma, shumë njerëz erdhën në shtëpinë e tij për të shprehur ngushëllime. Kjo tregon vendin e rëndësishëm që zë një artist popullor në zemrën e popullit."

Xiangshengu është një art i lashtë komik i Kinës dhe i ngjan artit perëndimor "talk show". Zakonisht dy aktorë zhvillojnë dialog komik në skenë duke ngjallur qeshjen e shikuesve. Për shkak që përmbajtja e xiangshengut lidhet ngushtë me jetën e banorëve të thjeshtë, ky art përshëndetet gjerësisht nga populli kinez. Një autor dhe aktor i mirë i xiangshengut duhet të ketë aftësi të zbulojë dukuri humoristike nga jeta. Gjatë mbi 50 vjetëve, Ma Ji krijoi dhe shfaqi mbi 300 vepra të xiangshengut, shumë prej të cilave janë bërë vepra klasike të xiangshengut kinez.

Ma Ji lindi në një familje të varfër në Pekin. Për shkak të vështirësive të mëdha të jetesës, 14-vjeçari Ma Ji shkoi në Shangai për të punuar në një fabrikë tekstile. Pas krijimit të Republikës Popullore të Kinës, Ma Ji u bë punonjës i librarisë Hsinhua të Pekinit. Gjatë punës, Ma Ji shfaqi talentin e tij të madh në artin e xiangshengut. Për shembull, ai mund të imitonte shumë mirë dialekte të krahinave të ndryshme kineze. Në kohën e lirë, Ma Ji mësoi të shfaqë xiangshengun dhe u bë një aktor amator i xiangshengut.

Në vitin 1956, në një konkurs amator të xiangshengut, talenti i Ma Ji-së u vlerësua lart nga artistët e vjetër. Me propozimin e tyre, Ma Ji u pranua në Trupën Artistike të Radios të Kinës dhe u bë një aktor profesional xiangshengu. Për shkak të zgjuarsisë dhe nën drejtimin e artistit të famshëm kinez të xiangshengut Hou Baolin, 20-vjeçari Ma Ji u bë menjëherë i famshëm në qarqet e xiangshengut të Kinës. Ma Ji studionte me zell artin e xiangshengut dhe vëzhgonte me vëmendje jetesën e banorëve të thjeshtë duke krijuar shumë vepra tërheqëse. Stili humoristik i interpretimit të tij fitoi përshëndetjen e shikuesve të qarqeve të ndryshme.

Pak kohë më parë, korrespondenti i radios sonë i mori një intervistë të posaçme Ma Ji-në. Ai foli për gjendjen e zhvillimit të artit të xiangshengut dhe perspektivën e këtij arti. Ma Ji tha se atij i pëlqen shumë ky art kombëtar:

"Megjithëse kam punuar në skenën e xiangshengut për dhjetëra vjet, nuk di ende shumë gjëra në këtë fushë dhe duhet të mësoj vazhdimisht. Njëkohësisht gjatë dhjetëra vjetëve, kam grumbulluar njëfarë përvoje. Dua ta regjistroj këtë përvojë duke vazhduar krijimet."

Por me zhvillimin e sektorit argëtues dhe të medias moderne, qysh nga vitet '90 të shekullit të kaluar, si shumë arte tradicionale kineze, xiangshengut i dolën përpara pengesa. Është e vështirë që të dëgjohen vepra të reja dhe të mira xiangshengu. Kohët e fundit, artistë të rinj të xiangshengut si Guo Degang etj. kanë tërhequr përsëri njerëzit të dëgjojnë xiangsheng. Pak kohë më parë, Televizioni Qendror i Kinës organizoi konkursin kombëtar të xiangshengut duke tërhequr shumë aktorë dhe amatorë të Xiangshengut. Megjithëse ishte i moshuar, Ma Ji i kushtonte gjithmonë vëmendje zhvillimit të xiangshengut. Duke folur për zhvillimin e ardhshëm të Xiangshengut, Ma Ji tha:

"Vitet e fundit nuk ka shumë vepra të mira xiangshengu. Jam i mendimit se xiangshengu duhet të pasqyrojë jetën reale. Vetëm kështu ai do të zhvillohet pandërprerë."

Megjithëse Ma Ji ka vdekur, njerëzit nuk do t'i harrojnë kurrë veprat e tij. (Fani)