dëgjoni

Më 17 dhjetor, 600 ditë para hapjes së Lojërave Olimpike të Pekinit, nisi në Pekin aktiviteti i shkëmbimeve për edukimin olimpik, programi miqësor "Zemër me zemër". Do të dëgjoni tani një material lidhur me këtë.

Duke paraqitur këtë program, zv/ministrja e Arsimit e Kinës zj. Chen Xiaoya, tha:

"Për të pritur Lojërat Olimpike 2008 dhe për të përhapur idenë olimpike 'Unitet, Miqësi, Paqe' në mes të të rinjve kinezë, bazuar në propozimet e Komitetit Olimpik Ndërkombëtar, Ministria e Arsimit e Kinës dhe Komiteti Organizativ i Lojërave Olimpike të Pekinit organizojnë këtë aktivitet edukativ olimpik."

Zj. Chen Xiaoya tha se fëmijët e Pekinit e emërtojnë këtë aktivitet si "Zemër me zemër", që tregon se nën flamurin olimpik me 5 rrathë, të rinjtë e vendeve e rajoneve të ndryshme do të realizojnë dorë për dorë ëndrrën e krijimit të një bote harmonike.

Aktualisht në qytetin e Pekinit mbi 200 shkolla fillore dhe të mesme janë caktuar të marrin pjesë në këtë aktivitet. Pikat konkrete të tij përfshijnë: këto shkolla do të krijojnë lidhje me komitetet olimpike dhe paralimpike të vendeve e rajoneve të ndryshme dhe do të binjakëzohen me një shkollë në vendet a rajonet përkatëse. Para hapjes së Lojërave Olimpike, nxënësit e shkollave pjesëmarrëse do të mësojnë dhe marrin njohuri rreth vendeve përkatëse, duke përfshirë gjuhën, kulturën, historinë, gjeografinë, doket e zakonet etj., dhe do të zhvillojnë shkëmbime me shkollat e binjakëzuara. Ndërsa gjatë Lojërave Olimpike dhe atyre Paralimpike, përfaqësuesit e këtyre shkollave do të marrin pjesë në ceremoninë e pritjes së delegacioneve të vendeve e rajoneve përkatëse në Fshatin Olimpik, do të shkojnë në fushën e lojës për nxitjen e ekipeve të tyre dhe do të ftojnë sportistë pjesëmarrës të bëjnë vizitë në shkollat e tyre.

Aktiviteti "Zemër me zemër" synon nxitjen e shkëmbimeve midis nxënësve pekinas dhe të rinjve të familjes së madhe olimpike, prandaj ai gjeti përkrahje nga Komiteti Olimpik Ndërkombëtar.

Këshilltari për Kulturën i Ambasadës së Britanisë së Madhe në Kinë Majkëll O'Sulivan shprehu mendimin se ky program do t'i ndihmojë të rinjtë kinezë dhe ata të mbarë botës të marrin pjesë në mënyrë thelbësore në Lojërat Olimpike. Edhe nxënësit e shkollave pjesëmarrëse do të luajnë rol thelbësor në pritjen e delegacioneve të ndryshme sportive.

"Kohët e fundit, duke shoqëruar zv/kryeministrin britanik, unë vizitova shkollën fillore 'Baijiazhuang', e cila është caktuar si shkollë lidhëse me Britaninë. Pas vizitës, ne besojmë se delegacioni britanik do të pritet ngrohtësisht në vitin 2008. Me këtë këtë rast, dua t'u shpreh falënderime edhe nismëtarëve të këtij programi krijues. Besoj se nëpërmjet këtij programi si dhe programeve të tjera të tilla, Lojërat Olimpike të Pekinit do t'u përkasin me të vërtetë Pekinit dhe popujve të botës."

Në ceremoninë e nisjes së këtij aktiviteti, kryetari i Komitetit Organizativ të Lojërave Olimpike të Pekinit z. Liu Qi tha se lëvizja olimpike ka propozuar modelin e gërshëtimit të sportit me edukimin dhe kulturën, duke ngulur këmbë gjithmonë në synimin që sporti t'i shërbëjë zhvillimit harmonik të botës. Programi miqësor "Zemër me zemër" është aktiviteti edukativ olimpik më karakteristik gjatë përgatitjes për Lojërat Olimpike dhe ato Paralimpike. 

"Ky program do të jetë në të mirë të zgjerimit nga të rinjtë të horizantit të tyre dhe të gëzimit së bashku të rezultateve të qytetërimeve lindore dhe perëndimore, në mënyrë që ata të bëhen krijues të një bote harmonike." (Wang Lei)