dëgjoni

Në disiplinën e notit të sinkronizuar, ekipi japonez ka qenë "nr. 1" i Azisë dhe gjithashtu një nga ekipet më të forta në botë. Mirëpo, në Lojërat Aziatike, të sapo mbyllur në Dohë, ekipi kinez i notit të sinkronizuar fitoi njëkohësisht dy medalje të arta si çift dhe si ekip, duke mundur ekipin japonez, për herë të parë në një veprimtari të madhe sportive. Pothuajse në të njëjtën kohë, trajnerja e merituar e Japonisë në këtë sport, zj. Imura Masajo, që gëzon prestigjin si "Princesha e notit të sinkronizuar" në Japoni, pranoi ftesën nga ekipi kinez që të punojë si trajnere në Kinë. Këto fakte tregojnë se në Lojërat Olimpike të Pekinit, ekipi kinez i notit të sinkronizuar nuk do të mbetet në prapavijë, por do të përpiqet të luajë rol protagonisti.

Lidhur me rezultatet e befasuese të ekipit kinez të notit të sinkronizuar në Lojërat Aziatike të Dohës, përgjegjësja e kësaj disipline në Drejtorinë e Përgjithshme Shtetërore të Sporteve të Kinës, zj. Yu Li shprehu mendimin se ato janë rezultat i përpjekjeve shumëvjeçare të ekipit kinez.

"Vitet e fundit noti i sinkronizuar i Kinës ka bërë përpjekje të vazhdueshme drejt këtij objektivi. Kemi grumbulluar aftësi dhe kemi ngritur nivelin teknik."

Zj. Yu tha se pas Lojërave Olimpike të Athinës, në ekipin kombëtar kinez u realizua normalisht kalimi nga anëtaret e vjetra tek ato më të reja. Notaret në ekipin e tanishëm kinez kanë tregues të mirë fizikë dhe pamje të bukur, edhe teknikat dhe bashkërendimi midis tyre janë pjekur më tej. Më e rëndësishmja është që ky kontingjent notaresh janë shumë të zellshme në stërvitje. Ato stërviten mesatarisht 8 orë në ditë dhe pothuajse nuk kanë asnjë ditë pushimi gjatë gjithë vit.

Mësohet se vitet e fundit Drejtoria e Përgjithshme Shtetërore e Sporteve e Kinës ka shtuar investimet në këtë sport. Veçanërisht ajo ka harxhuar shumë për të ftuar trajnerë të huaj të nivelit të lartë, gjë që përbën një tjetër arsye e rëndësishme për ngritjen e rezultateve të këtij ekipi. Zj. Yu bëri të ditur:

"Në të kaluarën Drejtoria e Përgjithshme nuk ka investuar shumë në këtë disiplinë dhe nuk kishim para të mjaftueshme për të ftuar trajnerë të nivelit të lartë dhe u mbështetëm vetëm te trajnerët tanë. Në fakt, në këtë sport, ishin 50 vjet prapa në krahasim me Evropën dhe 30 vjet me Japoninë. Mbetëm në nivelin fillestar për sa i përket mësimdhënies. Me këtë metodë fillestare, e kishim të vështirë të përgatitnim notare të nivelit të lartë."

Vitet e fundit, me shtimin e investimeve nga qeveria, ekipi kinez i notit të sinkronizuar filloi të ftonte trajnerë të huaj të njohur, si ish-trajnerja kryesore e ekipit kanadez Sheilag Kroson etj., gjë që e ka ndihmuar shumë ekipin kinez në ngritjen e nivelit.

Zj. Yu Li u shpreh hapur se me afrimin e Lojërave Olimpike 2008, ekipi kinez dëshiron të ngjitet në klasifikim nga vendi i 5-të në botë në 3 vendet e para, e madje edhe të bëhet numër 1. Për realizimin e këtij objektivi, duhet ndihma nga trajnerë të shquar. Që nga shtatori i këtij viti, ekipi kinez i notit të sinkronizuar filloi të kërkonte për trajner kryesor në mbarë botën, duke ftuar për disa trajnerë të nivelit të lartë. Bazuar në një përzgjedhjeve serioze, u vendos për zj. Imura Masajo, trajnerja japoneze e mrituar.

Duke folur për arsyen e zgjedhjes së zj. Imura Masajo, Yu Li tha se si trajnerja kryesore e ekipit kombëtar japonez të notit të sinkronizuar, ajo ka marrë pjesë 6 herë në Lojërat Olimpike. Nën udhëheqjen e saj, gjatë këtyre Lojërave, ekipi japonez ka fituar 8 medalje të arta. Prandaj nuk është e tepërt që të themi se "nga duart" e zj. Imura Masajo, ekipi japonez është bërë ndër ekipet më të forta në botë. Prandaj niveli i kësaj trajnereje është i padiskutueshëm. Nga ana tjetër, Kina dhe Japonia janë vende aziatike dhe kanë shumë mendime të përbashkëta lidhur me koreografinë. Më e rëndësishmja është që dashuria e saj ndaj këtij sporti e preku thellësisht ekipin kinez. Zj. Yu Li tha:

"Gjatë korrespondencave me e-mail me zj. Imura Masajo, ajo u shpreh se noti i sinkronizuar duhet të jetë një sport pa kufij shtetërorë. Ajo shpreson të drejtojë të gjitha notaret e nivelit të lartë. Ajo tha gjithashtu se për të synimi i arritjes së majave të këtij sporti në krye të ekipit kinez do të jetë më tërheqës se punët e saj aktuale në Japoni, të thjeshta dhe me të ardhura më të larta."

Në fund të dhjetorit, Imura Masajo do të vijë në Pekin dhe nënshkruajë zyrtarisht me ekipin kombëtar kinez të notit të sinkronizuar. Që nga 1 janari 2007 ajo do të bëhet trajnere kryesore e këtij ekipi. (Wang Lei)