Në vitin 1985, Gong Li u pranua në fakultetin skenik të Universitetit Qendror të Dramës të Kinës. Kur ishte në vitin e dytë të universitetit, ajo u zgjodh nga regjisori Zhang Yimou dhe interpretoi personazhin kryesor Jiu Er në filmin e parë të tij "Melekuqja". Ky film pati sukses të madh brenda e jashtë vendit dhe fitoi çmimin më të lartë të Festivalit të 38-të Ndërkombëtar të Filmit të Berlinit "Ariu i artë". Si rezultat, Zhang Yimou dhe Gong Li u bënë shumë të famshëm.

Pas kësaj, Gong Li zhvilloi vazhdimisht bashkëpunime me regjisorin Zhang Yimou dhe interpretoi role kryesore në disa filma të tij duke pasur sukses të madh. Kulmi i interpretimit të Gong Lisë u shfaq në filmin "Qiu Ju ngre padi" të xhiruar në vitin 1992 nga regjisori Zhang Yimou. Në këtë film, Gong Li interpreton një grua fshatare që ngre padi kundër kryetarit të fshatit për dëmshpërblim. Interpretimi i vërtetë i Gong Lisë i preku thellë shikuesit. Ajo jo vetëm fitoi çmime vendëse si aktorja më e mirë kryesore, por edhe fitoi çmimin e aktores më të mirë kryesore në Festivalin e 49-të Ndërkombëtar të Filmit të Venecies. Kjo është hera e parë që një aktore filmi e krahinave të brendshme të Kinës fiton çmim në një festival të madh ndërkombëtar filmi.

Në vitin 1996, Gong Li shkoi në Hollivud për të luajtur në film, por në fillim, ajo nuk gjeti role të përshtatshme për të. Gong Li tha:

"Në fillim nuk gjeta skenarë të përshtatshëm për mua, sepse nuk dëshiroja të interpretoja role pa vlerë. Prandaj vendosa të pushoj për një kohë të përcaktuar. Gjatë pushimeve, lexova shumë libra dhe shikova shumë filma për të ngritur nivelin e interpretimit tim."

Megjithëse nuk interpretoi role në film, Gong Li nuk u largua nga qarqet e filmit. Në vitin 1997, Gong Li u bë anëtare e komisionit përzgjedhës të Festivalit të Filmit të Kanës. Qysh nga viti 2000, ajo u bë me radhë kryetare e komisionit përzgjedhës të Festivalit të Filmit të Berlinit, të Festivalit të Filmit të Venecies dhe të Festivalit të Filmit të Tokios. Gong Li është bërë një përfaqësuese e filmit kinez në qarqet ndërkombëtare të filmit.

Në vitin 2005, Gong Li rifilloi interpretimin në film. Ajo luajti role kryesore në filmat e Hollivudit "Kujtimet e një geishe", "Miami vice" etj. Në filmin "Miami vice", Gong Li interpretoi të dashurën e një mafiozi. Për ta interpretuar mirë këtë rol, Gong Li mësoi posaçërisht të drejtonte anijen, të përdorte pushkën etj. Gong Li u shpreh se ky ishte një rol tërheqës:

"Ky ishte një rol i ri për mua, sepse nuk kisha asnjë kontakt me mafien. Mësova shumë nga ky film."

Pas mbarimit të xhirimit të filmit "Miami vice", Gong Li zhvilloi përsëri bashkëpunim me regjisorin Zhang Yimou për të xhiruar filmin "Armatura e artë". Në këtë film, Gong Li interpreton një perandoreshë me psikologji të ndërlikuar. Zhang Yimou u shpreh se vetëm Gong Li ka aftësi ta luajë mirë këtë rol. Interpretimi i suksesshëm i Gong Lisë vërtetoi fjalët e regjisorit.

Me kalimin e viteve, Gong Li ka thelluar më tej njohjen për jetën dhe artin. Ajo nuk dëshiron të xhirojë shumë filma si kur ishte e re, por vetëm pret një skenar të mirë. Gong Li tha:

"Mosha nuk është pengesë për aktorin. Zakonisht një aktor i ri nuk kupton shumë gjëra të jetës dhe nuk mund të interpretojë shumë mirë në film. Në fakt përvoja jetësore mund të ngrejë nivelin e interpretimit të aktorit."

Tani Gong Li po udhëton në mbarë vendin për të përhapur filmin e ri "Armatura e artë". Shikuesit shpresojnë se ajo do të xhirojë më shumë filma të mirë. (Fani)