Le të shohim nga Azia Perëndimore. Në vitin 1974 Lojërat Aziatike u zhvilluan në Teheran të Iranit. Pas 32 vjetëve, Lojërat Aziatike u kthye përsëri në Azinë Perëndimore. Një vend i vogël me popullsi më pak se 1 milion, Katari mundi të organizojë një veprimtari aq të madhe sportive, kjo gjë në vetvete e meriton që të gjithë t'i kushtojnë vëmendje. Krahas kësaj, në këto Lojëra Aziatike, rezultatet e sportistëve të Azisë Perëndimore kanë pasur përparime të mëdha.

Gjatë 32 vjetëve, delegacionet e Azisë Perëndimore ishin radhitur në vendin e 10-të deri 20-të në listën e medaljeve të Lojërave Aziatike. Përveç epërsisë në sportet e topit dhe në disa disiplina të veçanta, ato nuk kishin potencial të madh për shpalljen kampion.

Mirëpo sot ka ndryshuar gjendja. Në këto Lojëra Aziatike, vendi organizator, Katari fitoi 9 medalje të arta, 12 të argjendta dhe 11 të bronzta; Arabia Saudite fitoi 8 medalje të arta; edhe Kuvajti, vend i vogël i Gjirit mori 6 të arta, 5 të argjendta dhe 2 të bronzta. Ky rezultat meriton të quhet "risi" për shumicën dërrmuese të vendeve të Azisë Perëndimore. Mësuan dhe ngritën nivelin e vet gjatë konkurrimit, kjo është fitorja e madhe për këto vende në Lojërat Aziatike të Dohës.

Gjatë dhjetëra vjetëve të kaluar, Afganistani kishte raste të rralla për të marrë pjesë në veprimtari të mëdha sportive ndërkombëtare. Pas përmbysjes së pushtetit të talibanëve, Afganistanit iu krijua mundësia të kthehet përsëri në Lojërat Aziatike dhe ato Olimpike. Kësaj here, ai dërgoi 47 sportistë, duke përfshirë edhe dy femra dhe fitoi edhe medaljen e bronztë në tajkundo për peshën 72 kilogramë për meshkuj. Kryetari i Komitetit Olimpik të Afganistanit Din Mohamad Safi i tha gazetarit të radios sonë se pjesëmarrja është më e rëndësishmja.

"Erdhëm këtu duke pasur si qëllim jo se sa medalje do të fitojmë, por t'i tregojmë botës se jemi anëtarë të familjes së madhe të komunitetit ndërkombëtar. Pas dhjetëra vjetëve kthehemi në mbledhjen sportive të vendeve aziatike. Megjithëse në fushën sportive nuk jemi më të fortët, kthimi dhe pjesëmarrja jonë në vetvete është sukses i madh."

Z. Safi i tha gazetarit se nëpërmjet Lojërave Aziatike, Afganistani përpiqet të ngrejë nivelin e disa disiplinave sportive, si karate, tajkundo, skermë dhe basketboll. Afganistani është vend i ri. Edhe një sukses i vogël në ndonjë disipline, do të ishte një hap i madh për të.

Si vendi më i ri i Azisë, pak kohë pas shpalljes së pavarësisë së tij në vitin 2002, Timori Lindor mori pjesë në Lojërat e 14-ta Aziatike në Bushan të Koresë së Jugut. Kësaj here, 15 sportistë të Timorit Lindor morën pjesë në garat e 6 disiplinave. Kryetari i delegacionit sportiv të këtij vendi Fernando Mkarnakao u shpreh se megjithëse nuk kishte shpresë që të fitonte ndonjë medalje, delegacioni i tij nuk erdhi kot në Dohë.

"Ardhja në Dohë nuk ka për qëllim që të bëjmë shëtitje turistike, por që të zbatojmë shpirtin e Olimpiadës. Nëpërmjet garave, do të njohim më shumë miq dhe sportistët do të fitojnë përvojë. "

Në këto Lojëra Aziatike Laosi dërgoi 14 sportistë për të marrë pjesë në 7 disiplina sportive, ndër të cilat noti, tajkundo, ushtrimet tradicionale kineze wushu dhe boksi janë sporte tradicionale në Laos. Më 14 dhjetor, në "sandan" (një formë e wushu-së, që i ngjan boksit të stilit të lirë) e peshës 56 kilogramë , sportisti i Laosit Poksai Apeilah fitoi një medalje të argjendtë, e para medalje e tillë e këtij vendi gjatë historisë 55 vjeçare të pjesëmarrjes në këto lojëra. Kryetari i delegacionit sportiv laosian z. Sompu Pongsa shprehu mendimin se delegacioni i tij ka fituar në Dohë më shumë se një medalje të argjendtë.

"Së pari, forcuam bashkëpunimin me Katarin, vendin organizator, veçanërisht në fushën sportive. Së dyti, sportistët tanë fituan më shumë përvojë në garat ndërkombëtare. Së treti, njohëm më tej kulturën e vendeve arabe, veçanërisht nga ceremonia e hapjes. Së katërti, pjesëmarrja në Lojërat Aziatike pasqyron unitetin e Azisë."

Ashtu si në Lojërat e kaluara Aziatike, gjithmonë ka disa delegacione sportive që nuk fitojnë asnjë medalje. Mirëpo asnjë delegacion nuk u shpreh se kjo vizitë ishte e kotë. Sepse gjatë pjesëmarrjes në Lojërat Aziatike, vende e rajone e ndryshme aziatike shtojnë njohjen reciproke dhe miqësinë. Nën ndikimin e madh të këtyre Lojërave, edhe motoja olimpike "Më shpejt, më lart, më fort" është përhapur më tej në mes të rinjve të vendeve pjesëmarrëse. (Wang Lei)