Lojërat Aziatike në Dohë sapo u mbyllën. Gjatë këtyre lojërave, krahas ndeshjeve e garave intensive, vëmendjen e njerëzve e tërhoqi edhe një tjetër aspekt jashtë fushës sportive, që janë vullnetarët e këtyre lojërave. Ata, që ishin të veshur me uniformë në ngjyrë të artë, u ofruan shërbime të hollësishme sportistëve, gazetarëve dhe shikuesve në pallate e stadiume sportive, qendrat e informacionit dhe në hotel. Në fakt, shumë prej këtyre vullnetarëve kanë dëshirë që të marrin pjesë si vullnetarë edhe në Lojërat Olimpike të Pekinit. Do të dëgjoni tani një material lidhur me këtë, të shkruar nga gazetari i radios sonë Zheng Chenguang.

Në sallën e Qendrës Kryesore të Informacionit të Lojërave Aziatike, çdo ditë mund të shihje mbi dhjetë vullnetarë me fytyrë miqësore lindore, të cilët mund të flisnin lirisht anglishte dhe disa prej tyre mund të përdornin edhe arabishten. Pasi pyeti, gazetari i radios sonë mori vesh se ata janë studentë vullnetarë nga Pekini. Një prej tyre ishte Zhang Bo, që studion në specialitetin e gjuhës arabe në Institutin e Dytë të Gjuhëve të Huaja të Pekinit. Megjithëse studion arabishten, ai mund të flasë mirë edhe anglishten, prandaj ishte i mirëpritur nga gazetarët e vendeve të ndryshme gjatë punëve të tij shërbyese. Zhang Bo tha se ndihej shumë i gëzuar nga puna e atjeshme si vullnetar. Atij i kishte lënë përshtypje të thellë mënyra e veçantë e përgatitjes së vullnetarëve nga Komiteti Organizativ i këtyre lojërave.

"Komiteti Organizativ na la detyrë që të vëzhgojmë me sytë tanë se si veprojnë vullnetarët e tjerë dhe pastaj të imitojmë mënyrën e tyre. Mendoj se me këtë mënyrë përgatitjeje, ne mund të përshtatemi shpejt me kolektivin e vullnetarëve dhe të futemi në punë sa më shpejt dhe në gjendjen më të mirë. "

Specialiteti që Zhang Bo studion është gjuha arabe, por kjo ishte hera e parë për të që shkonte në një vend arab. Kjo vizitë në Dohë e ka ngritur shumë nivelin e tij në gjuhë. Ai shpreson gjithashtu se kjo provë si vullnetar do të jetë në ndihmë të tij edhe për punët shërbyese si vullnetar i Lojërave Olimpike të Pekinit.

"Ne dhjetë vullnetarët kinezë jemi regjistruar si vullnetarë të Lojërave Olimpike 2008. Pasi të kthehemi në Pekin, ka mundësi të marrim pjesë edhe në punët e mbledhjes dhe të përgatitjes së vullnetarëve të këtyre lojërave. Jemi vullnetarë të përgatitur dhe shpresojmë që me përpjekjet tona do të përgatitim edhe më shumë vullnetarë për Lojërat Olimpike të Pekinit."

Doha ka vetëm 300 mijë banorë, ndërsa kësaj here numri i vullnetarëve për Lojërat Aziatike arriti në 16 mijë. Sipas të dhënave statistikore të Komitetit Organiztiv të këtyre lojërave, u morën gjithsej mbi 30 mijë kërkesa për t'u bërë vullnetarë jo vetëm nga vendet arabe të Gjirit, por edhe nga vende të tjera të Azisë, Evropës dhe Amerikës.

Z. Shadi Al Kharuf vjen nga Jordania. Para 6 vjetëve ai erdhi në Dohë dhe merret me kontabilitet në një bankë vendore. Kësaj here ai u regjistrua si vullnetar i Lojërave Aziatike dhe u përgjigj për mbrojtjen e aparateve elektronike në Qendrën Kryesore të Mediave. Ai i tha korrespondentit se që në universitet ai parapëlqeu të bëhej vullnetar i veprimtarive të mëdha, sepse puna si vullnetar i ka krijuar atij një platformë për të ndihmuar të tjerët dhe gjithashtu e ka njohur me kultura të vendeve të ndryshme.

"Puna si vullnetar mund t'ju krijojë një rast që të ndihmoni të tjerët. Personat e të cilëve u kam shërbyer unë vijnë nga vende të ndryshme dhe kanë sfonde të ndryshme kulturore, pra kjo është një provë shumë e mirë për mua."

Kur mori vesh se gazetari i radios sonë vjen nga Pekini, Shadi bëri të ditur me emocion objektivin e tij të ardhshëm.

"Kohët e fundit kam kërkuar në internet se si mund të regjistrohem si vullnetar i Lojërave Olimpike 2008 të Pekinit. Shpresoj se do të pranohem. Kam dëshirë të madhe!" (Wang Lei)