Periudha nga shekulli i 3-të deri në shekullin e 6-të të erës së re qe një periudhë shumë e rëndësishme historike për Kinën, sepse në atë periudhë dolën në Kinë një numër i madh shkencëtarësh dhe mjeshtrish në fusha të ndryshme, si në fushën matematike, astronomike, kalendarike, mekanike etj. Njëri prej tyre është edhe matematikani dhe astronomi i famshëm Zu Çongzhi, me të cilin do t'ju njohim në rubrikën e sotme. Arritjet e tij konsiderohen si një tregues i nivelit të zhvillimit të shkencës dhe teknikës kineze në atë periudhë.

Zu Çongzhi lindi në vitin 429 në një familje intelektuale. Arritjet e tij të mëdha në fushën shkencore gjejnë shprehjen në radhë të parë në fushën matematike. Suksesi që korri ai në kapërcimin e vështirësisë së studimit të raportit të perimetrit të një rrethi me diametrin e tij, zuri një vend të rëndësishëm në historinë e matematikës në botë. Llogaritja e vlerës së raportit të perimetrit të rrethit me diametrin ka qenë një problem jashtëzakonisht i rëndësishëm dhe jashtëzakonisht i vështirë në matematikë. Mjaft matematikanë të lashtësisë ia kushtuan gjithë jetën energjitë e tyre kërkimit të kësaj vlere në matematikë. Zu Çongzhi filloi studimin e këtij problemi të vështirë në moshën 35-vjeçare.

Asokohe, matematikanët kishin kuptuar në mënyrë empirike se perimetri i një rrethi është mbi 3 herë më i madh se diametri i tij. Por saktësisht sa më shumë se 3 herë ishte? Përgjigjet kishin qenë të lloj-llojshme. Para Zu Çongzhiut, matematikani kinez Liu Hui e kishte llogaritur vlerën e raportit të perimetrit të rrethit me diametrin deri në 4 shifra pas presjes dhjetore. Në bazën e sukseseve të shkencëtarëve të mëparshëm, Zu Çongzhi e llogariti këtë vlerë deri në 7 numra pas presjes dhejtore, domethënë vlera e raportit të perimetrit të rrethit me diametrin e tij është nga 3.1415926 deri në 3.1415927.

Kjo arritje e Zu Çongzhiut u ruajt si rekord për 1000 vjet në historinë e matematikës dhe u thye në shekullin e 15-të nga matematikani arab Ali Kashi.

Zu Çongzhi nxori njëkohësisht edhe konkluzionin se vlera e raportit të perimetrit të një rrethi me diametrin e tij mund të shprehet edhe në formën e thyesës 355/113. Pas një shekulli, d.m.th. në shekullin e 16-të, matematikani gjerman Valentin Oto arriti në të njëjtin përfundim. Për të përkujtuar kontributin e shquar të Zu Çongzhiut, disa matematikanë të vendeve të tjera propozuan që vlera e raportit të perimetrit të rrethit me diametrin, që shprehet me shkronjën greke?, të emërtohet "përpjesëtimi Zu".

Krahas suksesit të tij në llogaritjen e vlerës së raportit të perimetrit të rrethit me diametrin, Zu Çongzhi së bashku me të birin zgjidhën edhe problemin e llogaritjes së vëllimit të sferës. Pas mbi 1000 vjetëve, matematikani italian Kavalieri zbuloi parimin që ndoqën Zu Çongzhi dhe i biri në llogaritjen e vëllimit të sferës dhe ky parim u quajt në Perëndim "Parimi i Kavalierit".

Arritjet e Zu Çongzhiut në fushën astronomike dhe kalendarike gjithashtu kanë qenë të shkëlqyeshme. Në vitin 462, ai krijoi kalendarin "Drita e madhe", që ishte kalendari më i përparuar asokohe, dhe përdori për herë të parë në atë kalendar "diferencimin e vitit". Koha e rrotullimit të Tokës rreth Diellit në një vit ka një diferencë prej 52.2 sekondash me një vit tjetër dhe kjo diferencë quhet "diferenca e vitit". Duke përdorur këtë diferencë në fushën kalendarike, ai hapi një faqe të re të përmirësimit të kalendarit kinez. Koha e eklipseve të Diellit dhe të Hënës, që përcaktohet me kalendarin "Drita e madhe", del e saktë, gjë që është një kontribut tjetër i rëndësishëm i Zu Çongzhiut. (Zheng)