Ju flet Radio e Jashtme e Kinës! Të dashur dëgjues, unë jam Pina, ju përshëndes nga Pekini. Në programin e sotëm muzikor ju ftoj të dëgjoni disa këngë popullore të provincës Qinghai në veriperëndim të Kinës. Së pari do të ndiqni këngën "Në atë vend të largët".

"Në atë vend të largët, është një vajzë e mirë, kur kalojnë pranë saj, të gjithë njerëzit kthejnë kokën për ta parë. Fytyra e saj është si diell i kuq, sytë e saj të shkruar janë si hënë e ndritshme e mbrëmjes. Unë jam gati të heq dorë nga e gjithë pasuria, që të kullot dhentë bashkë me të, që të shikoj përditë fytyrën e saj të qeshur dhe veshjet e saj të bukura. Dëshiroj të jem një qengj që të ndjek pas, që ajo e rreh me kamxhik."

Kjo është një këngë popullore e provincës Qinghai, e mbledhur dhe e përpunuar nga kompozitori i njohur kinez Wang Luobin dhe e përhapur kudo ku ka kinezë. Kjo këngë si përfaqësuese e veprave muzikore kineze është përfshirë në "Veprat muzikore klasike kineze të shekullit të 20-të".

Kjo këngë lirike dhe e bukur na çon në provincën Qinghai të Kinës perëndimore. Provinca Qinghai është vendburimi i lumit Jance, lumit të Verdhë dhe lumit Lanchang. Pjesa më e madhe e saj ndodhet në rrafshnaltën Qinghai në çatinë e botës, ku ka male të larta, lugina, ultësirë, rrafshnaltë etj.

Në provincën Qinghai jetojnë banorët e kombësisë hane dhe të mbi 10 pakicave kombëtare, si të kombësive tibetiane, hui, sala, tu etj., të cilët janë të aftë për të kënduar dhe vallëzuar, prandaj janë të përhapura atje shumë këngë popullore të bukura dhe karakteristike. Tani le të shijojmë së bashku këngën "Fatosat janë më të mirë se të rinjtë".

Kjo është një këngë "huaer" e përhapur gjerësisht në Qinghai. Ajo me melodi të hareshme dhe entuziaste përshkruan përpjekjet e djalit për të fituar zemrën e vajzës së dashur, si dhe vetëbesimin dhe shpresën e tyre për jetën e ardhshme.

"Huaer" është një lloj kënge malësore, e përhapur në provincat Qinghai, Gansu, Ninxia dhe në Rajonin Autonom të Singjiang-Ujgurit të Kinës veriperëndimore dhe pëlqehet nga banorët e kombësive hui, han, tu, sala, dongxiang, baoane, tibetiane, yugu etj., që jetojnë në këtë zonë. Huaer ka shumë lloje, tekstet e këngëve mund të hartohen në vend nga këngëtarët. Banorët e kësaj zone, edhe kur nuk dinë të shkruajnë dhe të lexojnë, përsëri janë të aftë të hartojnë tekste të bukura dhe të përshtatshme këngësh.

Tani le të dëgjojmë këngën me titull "Çelin lulet shanda të vajzës". Kënga me tekstin interesant dhe humoristik shpreh shqetësimin dhe nxitimin e një djali që u nis për të vizituar vajzën e zemrës.

Për shkak të përhapjes për një kohë të gjatë në rrafshnaltë dhe në zonën malore, melodia e këngëve "huaer" është e lartë, e hapur dhe e fuqishme. Në të njëjtën kohë, për shkak të zakoneve të ndryshme të kombësive dhe pozitës gjeografike, këto këngë ndryshojnë dukshëm sipas viseve dhe kombësive. Tani le të dëgjojmë këngën huaer të provincës Qinghai me titull "Merre, moj vajzë". Kjo këngë shumë melankolike shpreh keqardhjen e një vajze kur djali i saj u nda nga ajo.

Këngët e shkurtra të provincës Qinghai janë të përhapura kryesisht në pjesën lindore të saj, ku jetojnë banorët punëtorë dhe të thjeshtë të kombësive të ndryshme. Ata jo vetëm ndërtojnë jetën e lumtur, por krijojnë edhe këto këngë të bukura dhe kuptimplota.

Kënga popullore që po ndiqni titullohet "Melodia e 4 stinëve", e cila nëpërmjet luleve të çelura në të 4 stinët shpreh dashurinë e vajzës për djalin. Melodia e saj është e bukur, e lehtë dhe e shpejtë.

Në fund të programit të sotëm, ju ftoj të shijoni këngën popullore "Kënga e qëndisjes". Kjo këngë e gjallë dhe e lehtë përshkruan një vajzë që është duke qëndisur dhe duke menduar për të ardhmen e bukur.

Në këngë thuhet: " Po qëndis unë panoramën e vendlindjes, qëndis një çift fluturash që fluturojnë së bashku, një çift zogjsh që ndjekin njëri-tjetrin, qëndis ëndrrën që pashë mbrëmë, ku u takova me djalin tim. Unë qëndis edhe jetën e bukur të së nesërmes, fshatarët e duan njëri-tjetrin."

Ju flet Radio e Jashtme e Kinës! Të dashur dëgjues, dëgjuat disa këngë popullore të provincës Qinghai. Mirudëgjofshim të shtunën tjetër. Në mikrofon për ju Pina.