Ruan Yisani ka lindur në qytetin Suzhou që quhet "Parajsa në tokë". Banesat dhe kopshtet e bukura të këtij qyteti janë shembuj të ndërtesave klasike kineze. Qysh në moshë të re, Ruan Yisanit filluan t'i pëlqejnë qytetet e lashta. Në vitin 1956, Ruan Yisan nisi studimet në fakultetin e ndërtimit të Universitetit Tongji. Pas diplomimit ai u punësua në këtë universitet. Në vitet '60 të shekullit të kaluar, për të shkruar "Historinë e ndërtimit të qyteteve kineze", Ruan Yisan së bashku me profesorin Dong Jianhong vizituan qytete dhe qyteza në krahina të ndryshme të Kinës duke njohur stile të ndryshme të qyteteve kineze:

"Harxhova 4 a 5 vjet për të vizituar qytete dhe qyteza të mbarë vendit. U habita shumë nga bukuria e qyteteve të lashta kineze. Në atë kohë shumë qytete të lashta ruanin ende pamjen e mëparshme."

Në vitet '80 të shekullit të kaluar, me fillimin e refomës dhe të hapjes me botën e jashtme të Kinës, filloi ndërtimi në përmasa të mëdha i infrastrukturës në mbarë vendin. Shumë qytete të lashta kineze u shkatërruan dhe u rindërtuan. Ruan Yisani vendosi të bëjë përpjekje për t'i mbrojtur këto qytete.

Pingyao është qyteti i parë i lashtë që u mbrojt nga Ruan Yisani. Në qytetin Pingyao që ka një histori 400 vjeçare ruhen mirë porta, banesa, zyra, dyqane etj. të lashta. Në fillim të viteve '80 të shekullit të kaluar, filloi rindërtimi i këtij qyteti dhe u rrëzuan më se 100 ndërtesa të dinastisë Ming dhe të dinastisë Qing. Pasi e mori vesh këtë, Ruan Yisani shkoi menjëherë në Pingyao dhe paraqiti projektin e vet të mbrojtjes së qytetit. Me përpjekje të palodhshme, projekti i tij u pranua nga organet përkatëse dhe u shpëtua ky qytet i lashtë. Në vitin 1986, Pingyao u përcaktua qytet i njohur kombëtar historik e kulturor. Në vitin 1997, ky qytet u zgjodh "Trashëgimi kulturore botërore". Ruan Yisani është shumë i gëzuar për këtë rezultat:

"Qysh nga ajo kohë, fillova punën time për mbrojtjen e qyteteve të lashta. Nëpërmjet përpjekjeve, qeveria hartoi në vitin 1982 rregulloren e mbrojtjes së qyteteve të lashta."

Gjatë 20 vjetëve, krahas mësimdhënies në universitet, Ruan Yisani e ka harxhuar pothuajse tërë pjesën tjetër të kohës në mbrojtjen e qyteteve të lashta. Mbrojtja e 6 qytezave të lashta në jug të lumit Jance është arritja tjetër e madhe e tij. Gjatë urbanizimit, u rrëzuan shumë qyteza të vogla të lashta kineze. Zhouzhuang, Tongli, Luzhi, Nanxun, Uzhen dhe Xitang janë 6 qyteza të lashta me kulturë të veçantë që ka pasur ndikim të thellë mbi kulturën kineze. Për të mbrojtur këto qyteza, Ruan Yisan kapërceu vështirësi të panumërta. Faktet kanë vërtetuar se Ruan Yisani kishte të drejtë. Tani këto 6 qyteza janë pika të njohura turistike që tërheqin shumë turistë vendës dhe të huaj.

Studimet shumëvjeçare kanë përsosur pandërprerë teorinë e mbrojtjes së qyteteve të lashta të Ruan Yisanit. Ai ka botuar me radhë "Teorinë e mbrojtjes së qyteteve të lashta", "Qyteza të lashta në jug të lumit Jance" etj.

Ruan Yisani tha se në fakt, mbrojtja e qyteteve të lashta do të thotë mbrojtje e kulturës dhe e historisë. Ai tha:

"Vitet e fundit, kam bërë disa punë të rëndësishme në Shangai. Në vitin 2004, mbrojta zonën e banimit të hebrenjve në Shangai. Gjatë Luftës së Dytë Botërore, më se 40 mijë çifutë erdhën në Shangai për t'iu shmangur luftës. Tani në këtë zonë është ndërtuar një monument. Çdo ditë shumë njerëz vijnë këtu për të përkujtuar këtë ngjarje. Kjo zonë është bërë dëshmia e miqësisë midis Kinës dhe vendeve të huaja." (Fani)