Vitet e fundit, çmimi i naftës dhe i mineraleve të tjera të rëndësishme në tregun ndërkombëtar ka qenë gjithmonë i lartë. Në "Konferencën ndërkombëtare të mineraleve për vitin 2006" të mbajtur kohët e fundit, zv/kryeministri i Kinës Zeng Peiyan shprehu shpresën se palët e ndryshme duhet të ndërmarrin aktivisht veprime për të stabilizuar tregun botëror të produkteve minerare. Për këtë, Kina do të marrë pjesë në shkallë më të madhe në bashkëpunimin e tregtinë ndërkombëtare të mineraleve.

Me rritjen e shpejtë të ekonomisë kineze, kërkesat për energji dhe lëndë të para të Kinës janë shtuar pandërprerë. Vëllimi i tregtisë së produkteve minerare është ngritur shumë shpejt. Nga të dhënat statistikore del se gjatë 5 vjetëve të fundit, vëllimi i import-eksportit të produkteve minerare të Kinës u rrit në 3 herë. Për shkak të mungesës së përvojës së bisedimeve, ndërmarrjet kineze nuk kanë fituar të drejtën e fjalës në tregun ndërkombëtar të mineraleve. Në bisedimet mbi çmimin e xeherorëve të hekurit, ndërmarrjet metalurgjike të Kinës kanë pranuar për 2 vjet me radhë çmimin e lartë të produkteve minerare të tregut ndërkombëtar të mineraleve.

Në ceremoninë e hapjes së "Konferencës ndërkombëtare të mineraleve për vitin 2006", zv/kryeministri i Kinës Zeng Peiyan vuri në dukje para mbi 2000 funksionarëve qeveritarë të mbi 20 vendeve të botës, specialistëve, studiuesve dhe përfaqësuesve të qarqeve minerare dhe monetare se çmimi i një pjese produktesh minerare është ngritur tepër shpejt. Përveç ndikimit të marrëdhënieve midis ofertës dhe kërkesës, në këtë fushë ekziston edhe pengesa e disa faktorëve joekonomikë. "Vitet e fundit, çmimi i naftës, xeherorëve të hekurit dhe të mineraleve të tjera të rëndësishme ka qenë shumë i lartë, gjë që nuk favorizon konsumatorët dhe nuk përputhet me interesat afatgjatë të prodhuesve. Tani rezervat e shumicës së burimeve minerare janë relativisht të pasura. Aftësia e nxjerrjes dhe e përpunimit të këtyre mineraleve është ngritur më tej, ndërsa çmimi tepër i lartë i tyre nuk është racional. Qarqet ndërkombëtare të mineraleve duhet të bëjnë përpjekje, të forcojnë më tej kërkimet gjeologjike, të shtojnë vazhdimisht furnizimin me produkte minerare dhe të përmirësojnë aktivisht formën e tregtisë për të nxitur stabilizimin e çmimit të tregut të produkteve minerare".

Zeng Peiyani tha se Kina është e mendimit se midis prodhuesve dhe konsumatorëve duhet të forcohen konsultimet dhe dialogu për të nxitur tregtinë e barabartë. Qeveria dhe ndërmarrjet kineze dëshirojnë të bëjnë së bashku me kolegët e vendeve të ndryshme të botës përpjekje të përbashkëta dhe të trajtojnë si duhet marrëdhëniet midis prodhimit dhe konsumit për të nxitur zhvillimin normal të tregtisë ndërkombëtare të mineraleve.

"Kina është vend i madh konsumues i produkteve minerare dhe vend i madh prodhues. Ne jemi mbështetur kryesisht te forcat tona për shtimin e furnizimit me burime minerare. Njëkohësisht ne duhet të zhvillojmë aktivisht tregtinë e produkteve minerare, të rregullojmë rendin e tregut të mineraleve, të krijojmë e të përmirësojmë tregun e naftës dhe sistemin e çmimit dhe të japim kontributin e duhur për stabilizimin e tregut ndërkombëtar të produkteve minerare".

Zeng Peiyani tha, gjithashtu, se forcimi i bashkëpunimit ndërkombëtar është zgjedhja e domosdoshme e Kinës. Për të shpejtuar pjesëmarrjen e saj në bashkëpunimin ndërkombëtare të mineraleve, Kina do të hapë më tej tregun e mineraleve të vendit dhe do të inkurajojë investimet e biznesmenëve të huaj në shfrytëzimin e burimeve minerare. Njëkohësisht ndërmarrjet kineze me kushte të mira do të shkojnë jashtë vendit për të zhvilluar kërkime dhe nxjerrje të burimeve minerare dhe shërbime të veprave. Kina do të përmirësojë më tej sistemin e tregut të mineraleve dhe mjedisin e investimeve në shfrytëzimin e mineraleve për të garantuar të drejtat dhe interesat e ligjshëm të investuesve.

Në këtë konferencë ndërkombëtare, drejtori i departamentit të naftës, gazit natyror, minierave dhe të industrisë kimike pranë Bankës Botërore Rashad Kaldani paralajmëroi se duke zhvilluar tregtinë e produkteve minerare dhe bashkëpunimin ndërkombëtar, Kina duhet t'i kushtojë rëndësi zgjidhjes së disa problemeve negative.

"Për të plotësuar vazhdimisht kërkesën e madhe për produkte minerare, sektorët minerarë të Kinës duhet të zgjidhin një sërë sfidash. Një nga sfidat më serioze është mbrojtja e shëndetit dhe sigurisë në punë. Një tjetër është mbrojtja e mjedisit".

Për këtë, zv/kryeministri i Kinës Zeng Peiyan tha se Kina do të nxitë më tej zhvillimin e vazhdueshëm në fushën e mineraleve, do të ngrejë përqindjen e shfrytëzimit të burimeve, do të krijojë sistemin e mbrojtjes së mjedisit etj. (Sihai)