Vang Sizhi, që jetoi në shekullin e 4-të të erës sonë, lindi në një familje të mjeshtërve të njohur të bukurshkrimit brez pas brezi. Xhaxhallarët e tij Vang Yi dhe Vang Dao, kushërinjtë e tij të parë Vang Tain e Vang Qia si dhe disa të afërm të tij kishin qenë mjeshtër bukurshkrimi në kohën e tyre. Kur ishte 7 vjeç, Vang Sizhi filloi të mësonte artin e bukurshkrimit nga kaligrafja e famshme Vei Shuo, duke kopjuar veprat e saj të bukurshkrimit dhe, deri në moshën 12-vjeçre, ai arriti një nivel të konsiderueshëm artistik. Qarqet kaligrafike kineze e kishin si traditë që veprat e zgjedhura të mjeshtërve të famshëm të gdhendeshin në shkëmbinj ose në monumente të gurit në zona piktoreske me male dhe lumenj të njohur, në mënyrë që adhuruesit e këtij arti t'i admironin dhe t'i kopjonin. Vang Sizhi udhëtoi në shumë zona për të mësuar prej tyre.

Kryevepra e Vang Sizhiut ka qenë "Lanting Gji Shy", që e shkroi në moshën e tij të mesme si parathënie për botimin e një përmbledhjeje vjershash. Në materialet historiografike gjenden shënime për krijimin e kësaj vepre. Në mbështetje të zakoneve popullore kineze, data 3 e muajit të 3-të të çdo viti sipas kalendarit hënor kinez ishte një ditë feste, kur të gjithë dilnin në brigjet e lumenjve për t'u lutur për mbarësi dhe për t'i shmangur fatit ters, duke i shkelur barërat e njoma të pranverës. Këto aktivitete quheshin "siu". Në datën 3 të muajit të 3-të të vitit 353 të erës së re, Vang Sizhi së bashku me një grup intelektualësh, ndër të cilët ishin edhe disa kaligrafë dhe poetë të famshëm të asaj kohe, gjithsej 41 veta, vajtën për të bërë "siu" në bregun e lumit Lanting. Të gjithë luanin me gëzim, pinin raki dhe shkruanin vjersha dhe, më në fund, dikush propozoi që vjershat e tyre të mblidheshin bashkë dhe të botoheshin. Të gjithë ranë dakord dhe iu lutën Vang Sizhiut të shkruante një parathënie për botimin e librit me ato vjersha. Vang Sizhi, që ishte gati i dehur, mori furçën dhe shkroi në një copë pëlhurë të mëndafshtë dhe ky shkrim mbeti përgjithmonë si një vepër shumë e njohur kaligrafike me titull "Lanting Gji Shy". Arti kaligarifik i kësaj vepre u adhurua më pas nga kaligrafët e të gjitha periudhave historike të mëvonshme.

Pas mbi 300 vjetësh, në shekullin e 7-të, vepra e Vang Sizhiut "Lanting Gji Shy" i pëlqeu shumë perandorit Taizong të dinastisë Tang, i cili ua dhuroi ministrave të tij kopjet e kësaj vepre si dhurata të shtrenjta dhe e ruajti shkrimin origjinal për veten e tij. Kur vdiq perandori Taizong, shkrimi origjinal u varros së bashku me të si një nga sendet shoqëruese të varrimit. Është për të ardhur keq se shkrimi origjinal u vodh nga hajdutët që e hapën varrin e tij më pas.

Vepra kaligrafike "Lanting Gji Shy", që e shohim sot, është një nga kopjet e saj, megjithatë ajo ka vlerë shumë të madhe kulturore. Sot, në zonën piktoreske Lanting të provincës Zhegjang, vizitorët mund të gjejnë një monument guri me dorëshkrimin e gdhendur me titull "Lanting Gji Shy", që kopjoi perandori Kangsi i dinastisë Qing në shekullin e 17-të nga një kopje e kësaj vepre të lashtë.

Vang Sizhi la edhe shumë vepra të tjera kaligrafike. Bukurshkrimi i tij karakterizohej kryesisht nga qetësia dhe natyrëshmëria. Deri më sot, stili i tij i bukurshkrimit mbetet si stili i njërit prej sekteve të mjeshtërve të bukurshkrimit tradicional kinez. (Zheng)