Yu Qiuyu lindi në vitin 1946 në një fshat të vogël malor në provincën Zhejiang të Kinës lindore. Në moshën 7-vjeçare, nën drejtimin e nënës, Yu Qiuyu filloi t'i ndihmojë bashkëfshatarët që nuk dinin shkrim për të shkruar letra. Duke kujtuar atë kohë, Yu Qiuyu u shpreh se ai mësoi shumë nga shkrimi i letrave:

"Megjithëse sakrifikova shumë kohë të lirë, shkrimi i letrave më ndihmoi të njoh gjendjen e vendit dhe të ngre nivelin tim kulturor."

Për shkak të përgatitjes qysh në moshë të re, niveli i shkrimit i Yu Qiuyut u ngrit shumë. Kur studionte në shkollën e mesme në Shangai, ai fitoi çmimin e parë në konkursin e shkrimit të mbarë qytetit.

Pas diplomimit në Fakultetin e Letërsisë të Universitetit të Dramës të Shangait, Yu Qiuyu filloi të interesohet për studimin e kulturës kineze dhe të kulturave të huaja. Në vitin 1968, për shkak të një sëmundjeje të rëndë, Yu Qiuyu u kthye në vendlindje për pushim. Atje kishte një bibliotekë të vogël. Gjatë disa vjetëve, ai lexoi të gjithë librat e vjetër kinezë të koleksionuar në bibliotekë. Pas kthimit në Shangai, Yu Qiuyu lexoi edhe shumë libra të ideologëve dhe filozofëve të huaj duke mbajtur shumë shënime gjatë leximit. Mbështetur në njohuritë e pasura, Yu Qiuyu botoi shumë vepra lidhur me dramën dhe artin si "Historia e mendimeve rreth dramës", "Historia e dramës kineze" etj.

Në vitin 1986, Yu Qiuyu u zgjodh rektor i Universitetit të Dramës të Shangait. Në fillim ai nuk donte të merrej me punë administrimi, por gradualisht ai zbuloi se kjo punë e ndihmoi atë ta njohë shoqërinë:

"Pasi u bëra rektor i universitetit, njoha shumë probleme shoqërore kineze. Mendoj se një studiues duhet ta njohë këtë shoqëri dhe të ketë përgjegjësi për shoqërinë."

Yu Qiuyu i kushton shumë vëmendje kulturës kineze. Për të studiuar thellë këtë kulturë, ai dha dorëheqjen nga funksioni i rektorit dhe vizitoi të gjitha vendet e njohura historike kulturore të Kinës. Pas vizitës, në vitin 1992, Yu Qiuyu botoi librin "Udhëtimi kulturor". Ky libër ngjalli jehonë të madhe në Kinë dhe është shitur shumë mirë deri sot. Shumë lexues janë shprehur se ky libër u jep atyre njohuri të reja për kulturën kineze.

Pas turneut në Kinë, Yu Qiuyu filloi turneun e ri në mbarë botën për të gjetur qytetërime të lashta. Nga viti 1999 deri në vitin 2000, me ftesën e televizionit "Feniks" të Hongkongut, Yu Qiuyu dhe vargu i makinave i televizionit u nisën nga Greqia dhe vizituan mbi 10 vende si Egjiptin, Izraelin, Indinë etj. Pas mbarimit të udhëtimit, Yu Qiuyu vizitoi vetë 97 qytete të 26 vendeve. Ai tha:

"Për të studiuar kulturën kineze, duhet të njoh qytetërime të ndryshme botërore. Prandaj vizitova të gjitha vendet me qytetërime të lashta. Nëpërmjet krahasimit të qytetërimit kinez dhe qytetërimeve të huaja, zbulova epërsitë dhe të metat e kulturës kineze."

Në fillim të këtij viti, Yu Qiuyu filloi të drejtojë një emision në televizionin "Feniks" për të diskutuar ngjarjet e rëndësishme kulturore në historinë kineze. Yu Qiuyu tha se televizioni është një mjet i mirë transmetimi për nxitjen e shkëmbimeve me shikuesit:

"Shpresoj se nëpërmjet televizionit, do të përhap kulturën kineze dhe shikuesit mund të njohin thellë kulturën tonë."

Tani Yu Qiuyu është i zënë me pjesëmarrjen në emisione televizive dhe mbajtjen e referateve për të përhapur mendimet e tij për kulturën kineze. Ai shpreson që përpjekjet e tij do t'i nxitin kinezët veçanërisht të rinjtë të studiojnë dhe të mbrojnë kulturën kineze. (Fani)