Ju flet Radio e Jashtme e Kinës! Të dashur dëgjues, unë jam Pina, ju përshëndes nga Pekini. Në programin e sotëm muzikor ju ftojmë të dëgjoni disa këngë popullore kineze të kënduara nga kori i fëmijëve "Ylli i vogël". Së pari ju ftojmë të shijoni "Këngën për 4 stinët"

Kënga që dëgjuat është një këngë popullore e provincës Qinghai të Kinës veriperëndimore. Kjo këngë me melodinë e bukur, të gjallë dhe të lehtë shpreh dashurinë e njerëzve për jetën nëpërmjet përshkrimit të panoramave të ndryshme të 4 stinëve të vitit.

Kori i fëmijëve "Ylli i vogël" u formua në vitet '90 të shekullit të kaluar nga nxënësit e shkollave të mesme dhe fillore të qytetit Suzhou, anëtari më i vogël ishte 5 vjeç, ndërsa më i madhi 15 vjeç. Ata kënduan me zë të pastër dhe harmonik. Nën drejtimin e dirigjentit të njohur kinez Huang Hui, kori i fëmijëve ka nxjerrë album me këngë popullore kineze dhe këngë të bukura fëmijësh. Tani le të dëgjojmë bashkë këngën e fëmijëve të kombësisë hani të provincës Yunnan me titull "Qidolie", kënduar nga ky kor fëmijësh.

Fjala "qidolie" në gjuhën e kombësisë hani do të thotë "tungjatjeta". Kjo këngë e gëzueshme përshkruan fëmijët e kombësisë hani që shkojnë në mal për të prerë dru, duke përshëndetur njeri-tjetrin dhe duke luajtur.

Kënga "Kur doli dielli gëzohem shumë" është një këngë fëmijësh e pjesës perëndimore të provincës Sichuan. Kjo këngë e thjeshtë dhe e hareshme shpreh dashurinë e fëmijëve për punën dhe jetën. Le të dëgjojmë tani interpretimin e bukur të korit të fëmijëve "Ylli i vogël".

Në fund të programit të sotëm, le të shijojmë bashkë këngën popullore të provincës Shandong me titull: "Kënga e shkurtër e malit Yimong". Mali Yimong me panorama të bukura dhe burime të pasura natyrore ndodhet në provincën Shandong. Kjo këngë e bukur i këndon me fjalë të thjeshta vendlindjes së dashur: "Të gjithë thonë se mali i blertë Yimong është i bukur, në të cilin ka panorama tërheqëse dhe ujë të kulluar, kullotin lopët dhe dhentë".

Ju flet Radio e Jashtme e Kinës! Të dashur dëgjues, ndoqët një grup këngësh popullore kineze të kënduara nga kori i fëmijëve "Ylli i vogël". Mirudëgjofshim të shtunën tjetër. Në mikrofon për ju Pina.