Melodia që po dëgjoni, titullohet "Këngë malësore Midu", e interpretuar në guzheng nga Chen Aijuani dhe e përpunuar në bazë të këngës popullore të provincës Yunnan. Melodia e bukur me stil të veçantë pasqyron ndjenjat e të rinjve dhe të rejave që i këndojnë dashurisë dhe jetës së lumtur.

Guzheni është një nga veglat e lashta muzikore kineze me tela, ai ka timbër elegant e luksoz dhe forcë të pasur shprehëse.

Chen Aijuani ka lindur në vitin 1968 në provincën Fujian të Kinës jugore. Ajo filloi të mësonte guzheng në moshë 10-vjeçare dhe në vitin 1990 u diplomua me rezultate të shkëlqyera në Konservatorin e Shangait. Në vitin 1993 ajo organizoi në provincën Fujian koncertin e parë të interpretimit në guzheng dhe u vlerësua lart nga qarqet muzikore dhe nga shikuesit. Si meloditë tradicionale, ashtu edhe meloditë moderne ajo i interpreton në mënyrë të shtruar e të hollësishme dhe shpreh me përpikmëri shijen origjinale të veprave muzikore, duke shfaqur mjeshtërinë e saj të lartë të interpretimit.

Melodia që po ndiqni, titullohet "Gurgullon përroi". Ajo interpretohet nga Chen Aijuani në guzheng dhe është përpunuar në bazë të këngës popullore të provincës Junnan me të njëjtin titull. "Gurgullon përroi" është një këngë popullore lirike me melodi të bukur, të butë dhe të qetë, ajo përshkruan një peizazh të bukur poetik: një natë me rreze të argjendta hëne, kudo mbizotëron qetësia, dëgjohet vetëm gurgullima e përroit rrëzë malit, vajza shpreh me këngën e bukur dashurinë e saj për të dashurin. Melodia e interpretuar në guzheng jo vetëm ruan bukurinë origjinale, por përshkruan edhe bukurinë e natës me hënë dhe forcën e saj të madhe rinore.

Në vitin 1993, Chen Aijuani krijoi në provincën Fujian shkollën e parë të interpretimit në guzheng, për të përhapur artin e guzhengut. Gjatë më se 10 vjetëve, shumë nxënës të përgatitur prej saj fituan çmime në konkurse të ndryshme kombëtare. Ajo publikoi edhe disa albume me melodi të interpretuara në guzheng që janë mirëpritur nga dashamirësit e muzikës brenda e jashtë vendit. Në fund të programit të sotëm muzikor do të shijojmë së bashku melodinë me titull "Melodia Huadeng".

Huadengu është një lloj këngë popullore e përhapur gjerësisht në provincat Junnan, Guizhou etj. Interpretuesit këndojnë me melodi të larmishme duke vallëzuar. Kjo melodi është përpunuar mbështetur në këngën popullore të provincës Junnan "Qëndis Hebao", ajo ka ritme të shpejta, të shkathëta dhe me plot gjallëri.

Ju flet Radio e Jashtme e Kinës! Të dashur dëgjues, ndoqët disa melodi të interpretuara në guzheng nga Chen Aijuan. Mirudëgjofshim të shtunën tjetër, në mikrofon për ju Pina.