Organizimi i Panairit të 100-të të Mallrave të Eksportit të Kinës ishte një ngjarje e madhe në historinë e zhvillimit të tregtisë së jashtme të Kinës, së cilës i është kushtuar një vëmendje e madhe nga udhëheqësit e Partisë dhe të shtetit të Kinës.

Kryeministri kinez Wen Jiabao mbajti një fjalim në ceremoninë e hapjes së panairit. Ndër të tjera ai tha se ky panair i organizuar në qytetin e Guanzhout ka luajtur një rol të rëndësishëm për nxitjen e zhvillimit të tregtisë së jashtme të Kinës dhe është gjithashtu një tregues i rëndësishëm i hapjes së Kinës ndaj botës. Edhe në të ardhmen, Kina do të zbatojë me vendosmëri politikën e hapjes ndaj botës, do të zhvillojë shkëmbime dhe bashkëpunim me vendet e ndryshme të botës në fusha të ndryshme dhe do të ndërtojë bashkë me to një botë harmonike.

Në këtë panair morën pjesë më se 5000 mysafirë nga brenda e jashtë vendit dhe 192 mijë e 691 tregtarë të ardhur nga 212 vende të botës. Pra, gjatë ditëve të panairit, të gjitha linjat ajrore për në Guanzhou ishin plot e përplot me tregtarë të ardhur nga vende të ndryshme të botës, ndër të cilët kishte edhe tregtarë nga Shqipëria.

Të dashur dëgjues, jam Huailu, korrespondentja e Radios së Jashtme të Kinës, duke shoqëruar disa tregtarë shqiptarë në panairin e Guanzhout. Isha edhe unë dëshmitare e këtij panairi madhështor.

Edhe në aeroplanin e fundit të 15 tetorit nga Shangai kishte tre grupe tregtarësh nga Shqipëria.

Panairi i Mallrave të Eksportit i Kinës që quhet edhe Panairi i Guanzhout, ka filluar që nga viti 1957 dhe ai organizohet në pranvere dhe në vjeshte e çdo viti. Ky panair është një panair kompleks tregtar ndërkombëtar me historinë më të gjatë, me përmasat më të mëdha, me llojet më të plota të mallrave, me pjesëmarrësit më të shumtë dhe me mundësitë më të madhe të biznesit. Ai ka luajtur një rol shumë të rëndësishëm për nxitjen e zhvillimit të tregtisë së jashtme dhe të hapjes së Kinës ndaj botës.

Gjatë vizitës në këtë panair, u takova me z. Liu Limin, një tregtar kinez me përvojë që ka afro 30 vjet që merret me tregtinë midis Kinës dhe Shqipërisë. Duke folur për këtë panair, ai tha: "Sivjet "Panairi i vjeshtës" është i njëqindti në panairin e Guanzhout. Në këtë panair të rëndësishëm dhe historik, ka marrë pjesë edhe kryeministri ynë. Në panair kanë ardhur mbi 30 mijë tregtarë të huaj nga e gjithë bota. Me këtë rast, organizimi i panairit ishte shumë madhështor dhe nënshkrimi i kontratave ka qenë më i madh se në panairet e mëparshme. "

Në këtë panair morën pjesë më shumë tregtarë nga Evropa. Numri i tyre arriti në 40596, duke u rritur 19.3% në krahasim me panairin e pranverës së këtij viti. Ndër ta, kishte edhe shumë shqiptarë.

Z. Liu vazhdoi: "Unë kam marrë pjesë në këtë panair shumë herë, pothuajse çdo vit. Sidomos vitet e fundit, shumë tregtarë shqiptarë kanë marrë pjesë në këtë panair, duke bërë që vëllimi i tregtisë me Shqipërinë të shtohet përvit. Sivjet pjesëmarrja e të interesuarve në këtë panair është më e dukshme. Të paktën nga ato që di unë dhe nga ata që kam takuar personalisht në panair, mbi 6-7 grupe janë goxha të forta. P. sh., tregtarët që kanë ardhur në panair, kanë porositur linjën për prodhimin e "Lines"-it dhe "Pampers"-it.

Ata i kushtojnë rëndësi vetëm kësaj linje dhe vlera e tregtimit dhe asaj të porositur arriti deri në 500 mijë dollarë amerikanë. Shumica në këtë panair ka ardhur për të porositur mallra ndërtimi, si fajanca dhe hidrosanitare. Me sa kam parë unë, volumi i tregtisë me Shqipërinë është pothuajse në shtim çdo vit.

Unë kam marrë pjesë në tregtinë me Shqipërinë për shumë vjet dhe gëzohem që vëllimi i tregtisë me Shqipërinë sa vjen dhe shtohet. Pothuajse që nga viti 1994, kohë kur fillova edhe tregtinë me Shqipërinë, çdo vit është shtuar vëllimi. Unë si tregtar që jam, gëzohem për këtë rezultat të dukshëm.

Zonja Lule nga Shqipëria që ka jetuar së bashku me burrin për dhjetra vjet në Kinë, ka marrë pjesë shumë herë në panairin e mallrave të eksportit të Kinës.

Ky panair i la asaj përshtypje shumë të thella : "Kam marrë pjesë disa herë në panairin e Guanzhout. Eshtë një panair mjaft i madh dhe i pasur me shumë mallra ku vijnë njerëz nga e gjithë bota. Kjo tregon që Kina ka ecur tepër në zhvillimin ekonomik të saj, duke bërë që mallrat kineze tani të përhapen në të gjithë botën, pasi janë edhe mallra me cilësi tepër të lartë. Unë shoh sa herë që shkoj në Guangzhou se cilësia e mallrave që ekspozohen atje është mjaft e lartë, duke treguar zhvillimin mjaft të madh ekonomik të Kinës. Në këtë panair vijnë edhe mjaft shqiptarë, pasi edhe çmimet janë shumë të arsyeshme. Unë mendoj se perspektiva e tregtisë mes Kinës dhe Shqipërisë do të vijë gjithnjë duke u rritur edhe më tepër."

Në këtë panair të 100-të, vëllimi i marrëveshjeve të nënshkruara arriti në 34 miliardë e 60 milionë dollarë amerikanë, duke shënuar një rekord historik.( Zhai)