dëgjoni

Vitet e fundit, kontinenti afrikan, me paizazhin e tij të bukur, me doket e zakonet e tij karakteristike dhe me kulturën e tij të lashtë, tërheq gjithnjë e më shumë turistë kinezë. Në rubrikën e sotme ne nuk do t'ju njohim me ta, por me një numër kinezësh që filluan të aktivizohen në Afrikë qysh mbi 40 vjet më parë. Gjëja, që i tërhoqi ata, nuk është peizazhi i bukur i Afrikës, por është zëri i popujve të vendeve afrikane për ndihmë mjekësore. Ata së bashku me mjekët vendas lanë gjurma kudo në Afrikë, duke nxjerrë miliona të sëmurë afrikanë nga vuajtjet. Këta njerëz janë anëtarët e ekipeve mjekësore kineze të ndihmës për Afrikën, që quhen nga banorët vendas "Engjëj të veshur me të bardha".

Zonja Ye Fang, që është një mjeke e ardhur nga qyteti i njohur me burime uji, qyteti Gjinan, shkoi 3 muaj më parë në Afrikë dhe u bë një anëtare e ekipit mjekësor kinez të ndihmës për Sejshellin, që ështhë një vend ishujsh dhe që gjendet afër vijës së ekuatorit. Me të mbërritur atje, ajo nisi menjëherë punën në një spital dhe u bë një nga mjeket më të zëna, pa pasur as kohë për të shfaqur gëzimin dhe kureshtjen e saj që ia ngjalli vajtja në një vend të panjohur.

"Këtu kemi qenë shumë të zënë me punë. Çdo ditë mjekojmë mbi 60 të sëmurë. As në mesditë nuk kemi kohë të çlodhemi një çikë dhe drekën e hamë me turne. Megjithatë të gjithë ne e ndiejmë veten shumë të gëzuar, sepse punojmë për të shpëtuar aq shumë njerëz nga vuajtjet e sëmundjes."

Të gjithë anëtarët e ekipeve mjeksore kineze të ndihmës për Afrikën thonë njëzëri se janë shumë të zënë me punë, por ata nuk ankohen asnjë herë. Ata dinë se puna e tyre intensive tregon besimin e banorëve afrikanë për mjekët kinezë. Kryetari i ekipit mjekësor kinez i ndihmës në ishullin Zanzibar të Tazanisë, zoti Vang Peng foli për punën e tyre.

"Këtu pajisjet mjekësore janë relativisht të prapambetura, ilaçet janë të pamjaftueshme dhe personeli mjekësor vendas ka një nivel relativisht të ulët teknik. Mjekët kinezë marrin përsipër detyrat më të rënda. Në përgjithësi, kur hasin në sëmundjet akute dhe kur ndodh ndonjë e papritur, mjekët vendas u drejtohen mjekëve kinezë. Prandaj të gjithë ne jemi të gatshëm që të shkojmë për ndihmë me urgjencë. Madje në kohën e lirë pas darkës nuk guxojmë të shkojmë larg duke shëtitur, sepse ata mund të na thërrasin në çdo kohë për të bërë operacion."

Mjekët kinezë i përgjigjen besimit të popujve afrikanë, duke treguar frymën e lartë të dashurisë për punën e vet. Ata me mjeshtrinë e vet të lartë mjekësore kanë nxjerrë shumë banorë vendas nga vuajtjet e sëmundjes. Ata kanë shëruar mjaft njerëz që vuanin nga sëmundje të vështira, duke përdorur akupunkturën, që është një nga mjetet e mjekësisë tradicionale kineze. Zoti Michel Hoareau i Sejshellit është një nga njerëzit që u shëruan nga mjekët kinezë me akupunkturë.

"Unë kisha 7 vjet që kisha dhembje në shpinë. Piva disa ilaçe, por nuk bënë afekt. Me rekomandimin e një miku, shkova për mjekim te ekipi mjekësor kinez. Ata më mjekuan me akupunkturë një herë në muaj. Mrekulli me të vërtetë! Ky lloj mjekimi bëri efekt shumë të dukshëm."

Mjekët kinezë me mjeshtrinë e tyre të lartë u vlerësuan lart dhe fituan besimin e popujve afrikanë, por gjatë punës ata kapërcyen shumë vështirësi që të tjerët e kanë të vështirë t'i përfytyrojnë. Sëmundjet si sida dhe kolera, që janë sëmundje të rrezikshme ngjitëse dhe që janë përhapur gjerësisht në ato vende, përbëjnë një rrezik të pashmangshëm për të gjithë mjekët. Sidomos gjatë operacioneve në pavionin kirurgjik dhe në maternitet, këto sëmundje kanë probabilitet të lartë ngjitjeje. Anëtarja e ekipit mjekësor kinez të ndihmës për Tanzaninë, zonja Sui Cancan thotë se asaj i kujtohet si tani tabloja e kontaktit për herë të parë me një të sëmurë nga sida.

"Një ditë, një grua shtatzënë erdhi për të lindur te ne, por ajo e kishte të vështirë të lindte, prandaj duhej një operacion me urgjencë. Infermierja më tha se ekzaminimi i sidës për të tregonte reaksion pozitiv, gjë që do të thoshte se asaj i ishte ngjitur vurusi i sidës. Unë kisha frikë, sepse kisha një plagë në dorë, gjë që ishte rrezik ngjitjeje gjatë operacionit. Por për të shpëtuar jetën e nënës dhe të foshnjës, unë e bëra operacionin urgjent. Operacioni përfundoi me sukses, nëna dhe foshnja shpëtuan, por unë u djersita në gjithë trupin."

Puna e lodhshme e mjekëve kinezë u vlerësua pozitivisht nga kolegët dhe të sëmurët. Mjeku tanzanian Moliu Gjape, që bashkëpunon me ekipin mjekësor kinez, vlerëson me gëzim kolegët e tij kinezë.

Kudo në Afrikë, në qytet apo në fshat, në fushë apo në tokë djerre, punojnë ekipe mjekësore kineze, që e çojnë miqësinë e popullit kinez te popujt afrikanë. Sot në tokat e 36 vendeve afrikane punojnë rreth 1000 mjekë kinezë.(Zheng)