Sistemi i furnizimit të ujit të ngrohtë me energji diellore për fshatin olimpik është projekti më i madh olimpik ndër projektet e bashkëpunimit ndërmjet Drejtorisë së Mbrojtjes së Mjedisit të Pekinit dhe Ministrisë së Mjedisit dhe të Territorit të Italisë. Mësohet se sipas planit, ky sistem i energjisë diellore do të përfshijë shumicën dërrmuese të ndërtesave të fshatit olimpik, gjithsej 42 të tilla, me një sipërfaqe prej 500 mijë metrash katrorë. Ky sistem mund të plotësojë nevojat e 12 mijë sportistëve e funksionarëve për ujë të ngrohtë gjatë Lojërave Olimpike të Pekinit, ndërsa pas këtyre lojërave, ai mund të sigurojë furnizimin me ujë të ngrohtë për jetën e përditshme për 6 000 veta. Ky sistem parashikohet të përurohet në gjashtëmujorin e parë të vitit 2008.

Zj. Ming Dengli është një funksionare në Drejtorinë e Mbrojtjes së Mjedisit të Pekinit dhe gjithashtu përgjegjëse e këtij projekti. Paraqitja e saj mund të na njohë më gjithanshëm dhe thellësisht me natyrën e këtij sistemi me energji diellore.

"Karakteristika më kryesore e këtij sistemi në fshatin olimpik është furnizimi i ujit të ngrohtë duke përdorur energjinë diellore, pa asnjë ndotje. Vetë energjia diellore është energji e përtëritshme."

Dihet nga të gjithë se energjia diellore është energji e gjelbër dhe e përtëritshme, por ndoshta shumica prej nesh e kemi të vështirë të kuptojmë efektivitetin e saj kolosal në mbrojtjen e mjedisit. Zj. Ming Dengli na shpjegoi me një varg shifrash rëndësinë e përdorimit të këtij sistemi me energji diellore në fshatin olimpik.

"Banesat në fshatin olimpik kanë një sipërfaqe mbi 500 mijë kilometra katrorë. Nëse nuk përdoret energjia diellore, por energjia elektrike ose gazi natyror, për furnizimin e ujit të ngrohtë për jetesën gjatë Lojërave Olimpike, duhen 5 milionë kilovatë energji elektrike, ose 600 mijë metra kubë gaz natyror, një energji që nuk mund të përtërihet."

Me të vërtetë është i jashtëzakonshëm përdorimi i energjisë diellore, por në rrethanat e pamjaftueshmërisë së energjisë diellore, si do të garantohet uji i ngrohtë për mbi një mijë sportistët në fshatin olimpik? Zj. Ming na shpjegoi:

"Ne përdorim kaldajën me gaz si burim ndihmës për furnizimin me ujë të ngrohtë. Energjia diellore ka 90 % siguri, ndërsa për 10-përqindëshin e mbetur, si në ditët pa diell p. sh., mund të përdoret burimi ndihmës."

Mësohet se për të siguruar cilësinë e ujit, në këtë sistem në fshatin olimpik zbatohet projektimi më shkencor. Zj. Ming Dengli tregoi se në të kaluarën në boilerin me energji diellore integrohej aparati i thithjes së nxehtësisë me kutinë e ujit. Në qoftë se uji i ngrohtë në kutinë e ujit nuk përdoret plotësisht brenda ditës, uji i mbetur qëndron në kuti për një kohë të gjatë dhe do të ngrohet përsëri. Kështu shkaktohet lehtë ndotja e ujit nga mikrobet. Projektimi i ri mund ta shmangë këtë problem, duke e shkëputur pjesën e thithjes së nxehtësisë nga rezervuari i ujit.

Ky sistem madhështor do të sigurojë ujin e ngrohtë për 42 ndërtesa me një sipërfaqe 500 mijë metra katrorë. Ndoshta dëgjuesit i ka lindur pyetja nëse instalimi i këtij sistemi do të ndikojë mbi pamjen e fshatit olimpik? Për këtë zj. Ming u përgjigj:

"Pajisjet e përdorura në këtë sistem janë më të përparuarat në botë dhe mund të përshtaten mirë me ndërtesat përreth. P.sh. pajisjet mund të bëhen si trinë rrushi në çati, që të shërbejnë edhe për zbukurim."

Lidhur me shfrytëzimin e këtij sistemi pas Lojërave Olimpike, zj. Ming tha se fshati olimpik do të shndërrohet në një lagje të zakonshme dhe ky sistem do t'u ofrojë ujin e ngrohtë banorëve të ardhshëm atje.

"Ky nuk është një sistem i veçuar, por është një pjesë përbërëse e fshatit olimpik. Në të ardhmen, ai do t'u shërbejë pronarëve të banesave të këtij fshati." (Wang Lei)