Klubi i tenisit "Bashi Shuangqian" i Shangait synon përgatitjen e tenistëve të rinj. Ai u krijua në vitin 2000, kur ATP-ja vendosi të zhvillonte Kupën e Mjeshtërve të vitit 2002 për herë të parë në Shangai. Ndihmësja e menaxherit të përgjithshëm të këtij klubi, zj. Yuan Shuwen, tregon: "Gjatë 6 vjetëve, klubi ka zgjedhur tenistë të rinj nga 12 deri në 18 vjeç në mbarë vendin. Zhvillimi i Kupës së Mjeshtërve në Shangai ka tërhequr vëmendjen e gjithë qarqeve ndërkombëtare të tenisit, prandaj klubi mund të ftojë relativisht lehtë trajnerë të njohur të huaj të zhvillojnë kurse në Shangai dhe mund të çojë në vende të tjera tenistë të rinj kinezë të stërviten për një kohë të gjatë dhe të marrin pjesë në gara të ndryshme." Zj. Yuan bëri të ditur se ka bashkëpunim shumë të mirë me klubin e saj Mishael Barok, trajneri i tenistes Maria Sharapova, kampione e këtij viti e turneut "U.S. Open". Ajo tha:

"Kemi një bazë stërvitjeje në Melburn të Australisë, ku kemi bashkëpunim të mirë me trajnerin Barok. Ai erdhi edhe në Shangai për të drejtuar tenistët tanë të rinj. Po përpiqemi të lidhemi me trajnerë të tjerë të njohur, si trajneri i tenistit të njohur spanjor Tomi Robredo etj."

Qysh nga viti 2005, kur Shangai priti edhe një herë Kupën e Mjeshtërve, tenistët e rinj të Shangait kanë pasur më shumë raste për të kontaktuar me tenistët e nivelit të parë. Nga njëra anë, këta mjeshtër tenisti "marrin" tenistë të rinj kinezë jashtë vendit që të ruajnë rol si shoqërues të tyre në stërvitje dhe, nga ana tjetër, klubet e tenisit në Shangai ftojnë trajnerët e këtyre mjeshtërve t'u shpjegojnë të rinjve kinezë konceptet e përparuara të tenisit. Gjatë Kupës së Mjeshtërve të këtij viti, z. Rikardo Piati, trajneri i tenistit të njohur kroat Ivan Ljubiçiç, që klasifikohet i 4-t i ndër tenistët si individ në botë, dha në Qendrën e Tenisit "Qizhong" të Shangait një mësim të teknikës së tenisit për lojtarët e rinj kinezë. Një prej tyre është edhe i riu Wu Chenyu, që bën pjesë në ekipin kombëtar të tenisit të të rinjve të Kinës. Ai tha se një mësim i tillë ka shumë rëndësi për të.

"Ai na mësoi si të lëvizim në fushë dhe si të rregullojmë hapat para goditjes së topit. Ky mësim ishte shumë praktik dhe na ndihmoi shumë."

Organizimi i Kupës së Mjeshtërve në Shangai e ka bërë këtë qytet qendrën e tenisit në Kinë. Në këtë qytet gjithnjë e më shumë të rinj jepen pas tenisit. Njëkohësisht, ai është bërë edhe "lokomotiva" e zhvillimit të tenisit të Kinës. Prindërit nga krahina të ndryshme të Kinës i çojnë në Shangai fëmijët e tyre, që ëndërrojnë të bëhen yje tenisi, sepse atje janë krijuar një sistem i përsosur përgatitjeje dhe një afmosferë e theksuar e tenisit dhe, më e rëndësishmja, atje lojtarët e rinj mund të marrin edukimin ndërkombëtar të edukimit.

Në këtë atmosferë të mirë, duke u nisur nga Shangai, shumë të rinj fillojnë të shfaqin talentin e tyre. Të marrim për shembull klubin "Bashi Shuangqian" 4 tenistë nga ky klub janë pjesëtarë të ekipit kombëtar të të rinjve. Kohët e fundit, tenisti Wu Di u shpall kampion si individ edhe në një garë të Federatës Ndërkombëtare të Tenisit, të shkallës së 4-t. Për sa u përket tenisteve, në maj të këtij viti, Zhou Yimiao u shpall kampione në garën fillestare të grupit të të rinjve të rajonit të Azisë dhe të Paqësorit të Kupës së Federatës Ndërkombëtare të Tenisit.

Për përparimin e shpejtë të tenistëve të rinj kinezë, trajneri Rikardo Piati, që ka drejtuar klubin "Bashi Shuangqian", vlerësoi kështu:

"Tenistët e rinj kinezë janë të talentuar, por tani për tani nuk zotërojnë cilësitë për të shfrytëzuar si duhet aftësitë e veta. Ata kanë bazë të mirë. Nëse do të kenë kohë dhe raste për të fituar përvojë, ata do të ecin përpara."

Me organizimin e Kupës së Mjeshtërve në Kinë, kinezët kanë treguar gjithnjë e më shumë vëmendje dhe pasion për zhvillimin e tenisit të të rinjve. Kemi arsye të besojmë se rezultatet e shkëlqyeshme të tenisit kinez në Lojërat Olimpike 2004 dhe në turnetë e këtij viti të "Titullit të Madh" nuk janë një sukses i përkohshëm. (Wang Lei)