"Gërshetimi i mësimit me punën" në fakt do të thotë që teoria të lidhet me praktikën. Shkollat profesionale të 38 qyteteve dhe distikteve të provincës Hunan të Kinës Qendrore po zhvillojnë arsimin sipas këtij modeli. Çdo nxënës zgjedh profesionin e vet nga 14 specialitetet, si ato të administrimit të hoteleve, të bërjes së matricave, të qarkullimit të materialeve etj. Çdo vit gjatë afatit mësimor 3-vjeçar, nxënësit mësojnë 6 muaj në shkollë dhe punojnë 6 muaj në ndërmarrje, ku marrin një pagë të caktuar. Kur mbaron mësimet dhe praktikat, çdo nxënës diplomohet duke marrë së paku një mandat të vërtetimit të aftësisë profesionale dhe punësohet në një ndërmarrje sipas kontratës që ka nënshkruar kjo ndërmarrje me shkollën.

Rektori i Institutit Profesional Tekniko-shkencor i provincës Hunan, zoti Yang Dongliang tha se instituti i tij ka nënshkruar kontrata me 5 ndërmarrje.

"Ne hartuam programin mësimor duke u nisur nga kërkesat e ndërmarrjeve, prandaj mund të themi se ua gjetëm studentëve postin e punës qysh para diplomimit të tyre. Vitin e ardhshëm do të pranojmë rreth 2000 studentë të rinj."

Kuadrot e përgatitur në mbështetje të modelit të "gërshetimit të mësimit me punën" kanë aftësi relativisht të madhe të praktikës dhe përshtaten shpejt me kërkesat e postit të punës, prandaj ata mirëpriten nga ndërmarrjet. Restoranti Gjiniu Gjaovang i qytetit Çangsha të provincës Hunan gjithashtu ka nënshkruar marrëveshje me Institutin Profesional Tekniko-shkencor. Drejtoresha e këtij restoranti, zonja Cai Yan tha se ata përkrahin këtë model të arsimit dhe marrin pjesë me gjithë qejf në zhvillimin e arsimit profesional.

"Edhe ne dërgojmë vazhdimisht kuadro për të dhënë mësime në shkollë, prandaj të diplomuarit që punosohen te ne shkrihen shpejt me punonjësit tanë, madje ata njohin ligjin e punës sonë brenda tri a katër ditëve."

Në distriktin Fengkkai të provincës Guangdong, 9 ndërmarrje me investime të Taivanit nënshkruan marrëveshje me Institutin Profesional të distriktit për zbatimin e programit të arsimit të "gërshetimit të mësimit me punën". Drejtori i shkollës së mesme profesionale të distriktit Fengkai, zoti Cen Huanzhao tha se nxënësit e shkollës së tij mësojnë 6 muaj në shkollë dhe punojnë 6 muaj me shpërblim. Në këtë mënyrë, nxënësit mund të shfrytëzojnë të ardhurat e tyre për të paguar kuotizacionet shkollore. Rezultatet e punës së nxënësve në ndërmarrje shënohen në librezën e notave.

Kuadrot e përgatitur sipas modelit të "gërshetimit të mësimit me punën" përvetësojnë aftësinë e praktikës qysh para diplomimit, prandaj ndërmarrjet i mirëpresin ata menjëherë, madje oferta nuk plotëson dot kërkesën. Nxënësi i shkollës së mesme profesionale të distriktit Fengkai, djaloshi Yan Hui tha se diplomantët e kësaj shkolle punësohen me lehtë se ata të shkollave të larta të përgjithshme.

"Tani, as të diplomuarit e universiteteve nuk e kanë të lehtë të punësohen, kurse ne, që mësojmë në shkollat profesionale të gërshetimit me praktikën e punës, e kemi më të lehtë të punësohemi, pasi diplomohemi."

Siç mësohet, në vendet e zhvilluara, modeli i arsimit të "gërshetimit të mësimit me punën" ka një histori mbi një shekullore. Në Gjermani, nxënësit punojnë 3 ditë në javë dhe kanë 2 ditë mësim teorik. Rreth 60 % e nxënësve gjermanë marrin arsim të tillë profesional. Në SHBA, nxënësit mund të fitojnë që në shkollë rastet e punës gjatë pushimeve verore dhe të punësimit të ardhshëm. Ekspertët përkatës thanë se, me zbatimin e programit të "gërshetimit të mësimit me punën", mund të ngrihet niveli i nxënësve për praktikën e punës dhe të pakësohen investimet e shkollave për blerjen e pajisjeve dhe për specializimin e mësuesve, mund të lehtësohet edhe presioni ekonomik që ndiejnë prindrit e nxënësve.

Tani në Kinë ekzistojnë ende disa pengesa për zhvillimin e arsimit profesional të modelit të "gërshetimit të mësimit me punën". Specialisti i Institutit Studimor të Qendrës së Arsimit Profesional pranë Ministrisë së Arsimit të Kinës, zoti Yu Zuguang tha se në kohën e zhvillimit të arsimit të lartë për përgatitjen e talenteve të majës më të lartë, Kina do të intensifikojë përgatitjen e kuadrove të teknikës. Modeli i arsimit profesional të "gërshetimit të mësimit me punën" mund të bëhet një shembull në këtë drejtim. (Zheng)