Basketbollisti i njohur kinez Yi Jianlian vërtetoi ditët e fundit se do të marrë pjesë në përzgjedhjen vjetore të NBA 2007. Ky djali i ri ka mundësi të bëhet basketbollisti i 4-t kinez në NBA-në pas Wang Zhizhi-së, Baterit dhe Ya Ming-it. Do të dëgjoni tani një reportazh të hollësishëm lidhur me këtë.

Pavarësisht nga mosha e re 19 vjeçare, Yi Jianlian është personalitet pak a shumë i njohur në arenën ndërkombëtare të basketbollit. Ky sulmues me gjatësi 2 metra e 11 centimetra, kur ishte vetëm 13 vjeç, tërhoqi vëmendjen e qarqeve ndërkombëtare të basketbollit për talentin e tij të shquar. Pa mbushur moshën 20 vjeçare, si anëtar i ekipit kombëtar të Kinës, ai mori pjesë në Lojërat Olimpike 2004 të Athinës dhe Kampionatin Botëror të Basketbollit 2006. Veçanërisht në Athinë, së bashku me anëtarët e tjerë të ekipit, ai e përfshiu ekipin kinez në 8 ekipet më të forta. Si liga profesioniste e basketbollit e nivelit më të lartë në botë, Liga amerikane NBA ka treguar vëmendje për këtë djalë që herët dhe e inkurajoi të merrte pjesë në përzgjedhjen vjetore të vitit 2006. Mirëpo, atëherë klubi i basketbollit "Hongyuan" i provincës Guangdong, për të cilin luan Yi Jianlian, e refuzoi këtë ftesë duke pasur parasysh moshën e tij të re.

Ditët e fundit, klubi "Hongyuan" shprehu zyrtarisht miratimin që Yi Jianliani të marrë pjesë në përzgjedhjen vjetore të NBA-së në vitin 2007. Kjo do të thotë se u zhduk pengesa e fundit për pjesëmarrjen e tij në NBA. Zv/menaxheri i përgjithshëm i klubit "Hongyuan", z. Liu Hongjiang, u shpreh: "Gjatë vitit të kaluar, Yi Jianliani është bërë gjithnjë e më i pjekur. Për ngritjen më tej të nivelit të tij në basketboll, atij i duhet një mjedis plotësisht i ri. Si për të kuptuarit e mëtejshëm të basketbollit, ashtu edhe për aftësinë e përballimit te ngarkesën psikologjike, ai duhet të kalitet në një ligë me nivel më të lartë."

Pasi morën vesh lajmin e pjesëmarrjes së Yi Jianlian-it në zgjedhjet vjetore të NBA-së, trajneri kryesor i ekipit kombëtar të Kinës, lituanezi Junas Kazlauskas, dhe basketbollisti i parë kinez në NBA, Wang Zhizhi i uruan atij sukses.

Jonas Kazlauskas:

"Mendoj se çdo anëtar i ekipit tim duhet të ketë një objektiv madhor dhe të përpiqet për këtë. Njëkohësisht, një objektiv i tillë do ta nxitë të derdhë më shumë djersë në stërvitje. Prandaj, në qoftë se lojtari i ri i ekipit tim ka dëshirë të marrë pjesë në përzgjedhjen vjetore të NBA-së, mendoj se kjo është në të mirë të së ardhmes së tij."

Wang Zhizhi:

"Pjesëmarrja në NBA do të jetë mirë për zhvillimin e përparimin e tij. Shpresoj se ai do të luajë gjithnjë e më mirë."

Ndër basketbollistët kinezë në NBA, qendërsulmuesi Yao Ming, që luan për ekipin "Houston Rockets", pa dyshim është më i suksesshmi. Ai është gjithashtu një nga qendërsulmuesit më të dalluar në NBA-në e tanishme. Edhe ai gëzohet për Yi Jianlianin. "Tani për tani nuk mund të parashikoj se në çfarë shkalle kjo do ta ndihmojë kjo basketbollin kinez, por kjo pa tjetër do të jetë në ndihmë e madhe për atë vetë në ngritjen e nivelit të lojës. Në përgjithësi, i uroj fat të mirë." Kur u pyet se cili ekip i NBA-së është më i përshtatshëm për Yi Jianlianin, Yao Ming u përgjigj pa ngurrim: "Phoenix Suns".

Lajmi që Yi Jianliani do të marrë pjesë në përzgjedhjen vjetore të NBA-së 2007 ngjalli jehonë jo të vogël në SHBA. Mediat amerikane mendojnë se ai do të bëhet një "personalitet i madh" në NBA në vitin 2007 dhe fjalët që përdoren më shumë në njoftimet e tyre janë "Tjetër Yao Ming".

Pas përcaktimit të pjesëmarrjes së Yi Jianliang-it në përzgjedhjen vjetore, shumë njerëz shqetësohen për një tjetër problem, a do të përzgjidhet ky djalë në vendet e para? Lidhur me këtë, zv/menaxheri i përgjithshëm i klubit "Hongyuan", Liu Hongjiang shprehu gatshmëri të madhe.

"Sivjet, Yi Jianlian i nuk mori pjesë në përzgjedhjen e NBA-së për arsye se nuk ishim të gatshëm në punët e drejtimeve të ndryshme. Ndërsa tani jemi gati. Kjo nuk do të thotë se kemi përcaktuar ndonjë ekip që ta përzgjedhë Yi Jianlian-in, por jemi gati në punët paraprake që ekipet e NBA-së ta njohin plotësisht këtë basketbollist."

Mbeten afro 8 muaj nga përzgjedhja vjetore e NBA-së 2007. Për ngritjen e vendit të vet në klasifikimin e NBA-së dhe për pjesëmarrjen sa më mbarë në këtë ligë, Yi Jianliani duhet të paraqitë plotësisht potencialin e tij në etapat e ardhshme. Gjatë kësaj etape, një arenë e mirë e shfaqjes ndodhet në Dohë, në Lojërat Aziatike. Tani, Yi Jianlian dhe anëtarë të tjerë të ekipit kombëtar të Kinës po stërviten në Pekin. Trajneri kryesor i këtij ekipi, Jonas Kazlauskas shprehu shpresën se Yi Jianlian do të bëjë të gjitha përpjekjet për t'u paraqitur sa më mirë për të nderuar vendin dhe veten.

"Mendoj se ai duhet të marrë parasysh në radhë të parë interesat e gjithë ekipit, d.m.th. si të shpallet kampion ekipi unë. Në qoftë se ekipi kombëtar do të arrijë rezultat të mirë me kontributin e tij, edhe ai vetë do të radhitet në vendet e para në përzgjedhjen e NBA-së."

A do të marrë pjesë Yi Jianlian në sezonin tjetër të NBA-së? Nëse do të përfshihet në këtë ligë, a do të gjejë ai vendin e vet dhe a mund të bëhet ai një tjetër Yao Ming? Të gjitha këto pyetje do të gjejnë përgjigje pas 8 muajsh. (Wang Lei)