Ashtu si qytete të tjera të mëdha ndërkombëtare, një nga sfidat më serioze përpara zhvillimit të Pekinit është trafiku i ngjeshur. Për shkak të popullsisë prej 16 milionë vetash dhe të mbi 2.8 milionë automobilave, pothuajse çdo pekinas e ka provuar vuajtjen nga efektiviteti i ulët i komunikacionit. Pekinasit i quajnë me humor rrugët kryesore të qytetit të tyre si "vendparkime falas".

Nga 2 deri më 7 nëntor, gjatë Samitit të Pekinit të Forumit të Bashkëpunimit Kino-Afrikan, për të garantuar udhëtimin pa probleme të mysafirëve të vendeve të ndryshme dhe zhvillimin normal të aktiviteteve, Pekini mori disa masa të përkohshme për përmirësimin e gjendjes së komunikacionit, si kontrolli i rrugëve të posaçme në kohë të përcaktuar, inkurajimi i përdorimit të automjeteve publike nga masat popullore, ndryshimi i orarit të punës në disa sektorë për të shmangur kulmin e trafikut. Megjithëse këto masa shkaktuan vështirësi për pekinasit, për ta ishte shumë e dukshme se rrugët u bënë të pastra dhe ajri u bë më i freskët.

Shoferët e taksive, që punojnë çdo ditë rrugëve të Pekinit e ndien më drejtpërdrejt gjendjen e komunikacionit. Duke folur për ndjenjat e tij gjatë Samitit të Pekinit të Forumit të Bashkëpunimit Kino-Afrikan, shoferi Guo ta folur më hollësisht:

"Ne shoferëve të taksive, na u shtuan klientët dhe të ardhurat u rritën 10% në krahasim me ditët e zakonshme."

Shtimi i të ardhurave të shoferëve të taksive erdhi nga njerëzit që kanë automjete private. Këta njerëz zgjodhën taksi ose automjete të tjera publike gjatë këtij samiti. Sipas të dhënave statistikore të Drejtorisë së Mbrojtjes së Mjedisit të Pekinit, kësaj here mbi 410 mijë pekinas me makina private morën pjesë në aksionin "Mos ngit makinë për një ditë", të nisur nga shoqatat popullore të mbrojtjes së mjedisit dhe mediat e Pekinit. Ata premtuan të mos i përdornin makinat e tyre gjatë këtij samiti.

Një prej këtyre pekinasve është zj. Tong Shan, administratore e lartë në një ndërmarrje. Ajo shprehu mendimin se megjithëse mosngarja e veturës së vet me të vërtetë i solli asaj pavoli, prapëseprapë ajo është krenare për kontributin e vet për përmirësimin e komunikacionit të Pekinit gjatë samitit. Ajo shprehu gjithashtu shpresën se ky veprim duhet të zhvillohet vazhdimisht, në mënyrë që banorët me makina private të bëhen të ndërgjegjeshëm që "ndihmesa ndaj të tjerëve ndihmon edhe veten" dhe që do të jetojnë në një mjedis më të mirë komunikacioni. Kështu, edhe gjendja e komunikacionit në Pekin gjatë Lojërave Olimpike do të përmirësohet shumë.

"Sigurisht shpresoj shumë se deri në vitin 2008 Pekini do të ketë sistem më të përsosur të autobusëve dhe të metrosë, kështu pekinasit do të marrin parasysh si përparësi automjetet publike."

Aksioni "Mos ngit makinë për një ditë" gjeti përgjigje të gjerë, gjë që mishëron qëndrimin aktiv të pekinasve për të shërbyer Samitit të Pekinit dhe gjithashtu pasqyron dëshirën e banorëve për përmirësimin e gjendjes së komunikacionit. Këtë, zëdhënësi i Komisionit të Komunikacionit të Pekinit, z. Liu Xiaoming vlerësoi lart.

"Gjatë këtij samiti, Bashkia e Pekinit nuk ka marrë asnjë masë për kufizimin e përdorimit të makinave private. Njëkohësisht, punonjësit e degëve të ndryshme punuan edhe jashtë orarit për t'i shërbyer samitit. Gjatë kësaj periudhe, shumë pekinas hoqën dorë me iniciativë nga përdorimi i makinave private dhe morën automjete publike. Kjo është arsyeja që gjatë samitit rrugët e Pekinit ishin të pastra."

Krahas ndërgjegjeësimit të qytetarëve, edhe drejtimi i qeverisë luajti rol kyç. Gjatë këtij samiti, sektori i administrimit të komunikacionit të Pekinit publikoi çdo ditë, nëpërmjet mediave dhe mesazheve në celular, parashikimin e rrugëve të kontrolluara dhe njoftoi si t'i shmangnin këto rrugë. Përveç këtyre, sektorët e ndryshëm pranë Bashkisë së Pekinit ndaluan përkohësisht përdorimin e 490 mijë makinave të qeverisë, gjë që zbuti presionin e komunikacionit.

Pas samitit, në rrugët e Pekinit rifillon ngjeshja e trafikut. Njerëzit kanë filluar të mendojnë si të ruhen disa metoda të mira që u përdorën gjatë samitit edhe në ditë të zakonshme.

Bashkia e Pekinit ka qenë e mendimit se zgjidhja e problemit të komunikacionit është jo vetëm kërkesë e organizimit të Lojërave Olimpike, por edhe nevojë e domosdoshme për zhvillimin e një qyteti. Politika e dhënies përparësi sistemit të automjeteve publike është masë shumë efikase për zbutjen e gjendjes së trafikut të ngjeshur në Pekin. Zëdhënësi Liu Xiaoming u shpreh:

"Bashkia e Pekinit po përgatitet nëpërmjet kanaleve të ndryshme për komunikacionin e Pekinit gjatë Lojërave Olimpike. Nga njëra anë, do të forcojmë infrastrukturën e komunikacionit dhe do të ngremë kapacitetin e saj. Nga ana tjetër, do të zhvillojmë aktivisht sistemin e automjeteve publike. Do të hartojmë edhe projektin e saktë për shërbimet e transportit për grupe të ndryshme të pjesëmarrësve në Lojërat Olimpike." (Wang Lei)