Liuqin?i është një vegël muzikore tradicionale kineze me tela, e cila ka formën e gjethes së shelgut dhe bëhet me dru shelgu. Ajo ka zë kumbues dhe diapazon të gjerë. Melodia që po ndiqni, titullohet "Muzikë vallëzimi taxhike". Kjo muzikë me melodi të gëzueshme dhe të gjalla e me ritme entuziaste dhe të ndryshueshme shpreh karakterin e hapur dhe entuziast të banorëve taxhikë në Singjang të Kinës Perëndimore dhe një tablo të hareshme festive.

Wang Hongyi ka lindur në një familje muzikantësh. I ati, Wang Huiran, është një kompozitor dhe interpretues i njohur kinez i liuqin-it. Që në vogëli Wang Hongyi mësoi t'i binte liuqin-it nga i ati. Në moshën 7-vjeçare ajo filloi të luante në skenë dhe kur ishte 10 vjeçe u pranua si interpretuese solo në Orkestrën Popullore të Zonës Ushtarake Jinan të Kinës. Tani le të shijojmë melodinë "Pranvera ka ardhur në lumin Yihe", interpretuar nga Wang Hongyi në liuqin. Kjo është vepra e saj përfaqësuese. Melodia përshkruan panoramën e bukur pranverore gjatë lumit Yihe të provincës Shandong.

Wang Hongyi ka bazë të shëndoshë të interpretimit në liuqin, duke u karakterizuar nga tiparet e holla të femrave të jugut dhe ato të çiltra e të hapura të femrave veriore. Tani le të dëgjojmë melodinë "Sanliu". Kjo melodi e zhdërvjellët, e rrjedhshme dhe tërheqëse është e përhapur gjerësisht në zonat jugore të lumit Jance.

Wang Hongyi ka përhapur veglën muzikore liuqin jo vetëm në krahina të ndryshme të Kinës, por edhe në vende të ndryshme të botës. Ajo ka bërë turne në Spanjë, Australi, Tajlandë dhe mbi 20 vende e rajone të tjera, ku është mirëpritur ngrohtë. Tani ajo është drejtuesja artistike e Orkestrës së muzikës kineze të dhomës për femra "Zhuhai" të Kinës. Në fund të programit të sotëm do të shijojmë bashkë melodinë e njohur popullore rumune "Lauresha". Kjo melodi e gëzueshme dhe e gjallë, me ritmet që ndryshojnë shumë, si dhe imitimi i këndimit të zogjve përshkruajnë në mënyrë të figurshme laureshat që fluturojnë në qiellin e kaltër. (Pina)