dëgjoni

Distrikti Panxian i provincës Guizhou të Kinës Jugperëndimore është një nga 600 distriktet që gëzojnë ndihmën e shtetit në bazë të vendimit të qeverisë kineze, me fjalë të tjera, ky distrikt është një nga zonat më të varfra në Kinë. Në këtë distrikt, vlera mesatare vjetore e prodhimit për çdo frymë, që quhet shkurtimisht GDP, është rreth 500 dollarë amerikanë, shifër që është sa gjysma e asaj mesatare në Kinë. Për shkak të varfërisë, të sëmurët e këtushëm nuk kanë të holla për t'u vizittuar te mjeku. Për të zgjidhur problemin e mjekimit të banorëve, duke filluar nga viti 2005, këtu zbatohet sistemi i mjekimit të kooperuar, që është një sistem i ri i mjekimit në fshat. Lidhur me këtë, foli zoti Luo Zixiang, i ngarkuari me detyrën e kryetarit të distriktit Panxian.

"Distrikti ynë është një nga zonat e eksperimentimit të sistemit të ri të mjekimit të kooperuar. Duke ndërmarrë këtë politikë, shteti ka si qëllim që fshatarët të mos varfërohen më tej vetëm për shkak të sëmundjeve. Në përgjithësi, fshatarët e përkrahin plotësisht këtë politikë, duke e konsideruar atë si një politikë për të mirën e fshatarëve."

Sistemi i ri i mjekimit të kooperuar në fshat është një sistem i krijuar nga qeveria kineze për të përmirësuar kushtet mjekësore në fshat. Përmbajtja e këtij sistemi mjekimi është: Për të krijuar fondin e mjekimit të kooperuar, dikasteri qendror i financave do t'i japë çdo vit një subvencion prej 20 juanësh secilit fshatar pjesëmarrës në këtë sistem mjekimi, sektorët lokalë të financave do t'i japin 20 juanë të tjerë si subvencion dhe çdo fshatar do të paguajë çdo vit 10 juanë. Kur sëmuret një fshatar, Fondi i mjekimit të kooperuar paguan një pjesë të shpenzimeve të mjekimit sipas një raporti të caktuar. Në këtë mënyrë do të zgjidhet disi ky problem. Deri tani, 78.5% e fshatarëve të distriktit Panxian marrin pjesë në sistemin e ri të mjekimit të kooperuar.

Në qendrën shëndetësore të lokalitetit Maçang të distriktit Panxian, shkruan korrespondenti, bisedova me disa fshatarë që kishin ardhur për mjekim. I moshuari Li Kaigjang i kombësisë Yi tha se ai ndien gëzim të madh që Fondi i mjekimit të kooperuar i dha atij një subvencion mbi 1000 juanësh, pasi ai shpenzoi 2200 juanë për mjekimin e ulcerës në stomak. Ai tha se ky sistem i ri i mjekimit të kooperuar është i pëlqyeshëm dhe pothuajse tërë fshati i tij merr pjesë në të, ndërsa e gjithë familja e tij merr pjesë.

Problemi i mjekimit për fshatarët e varfër të distriktit Panxian është zgjidhur në një shkallë të caktuar, por prapë se prapë pajisjet e këqija mjekësore dhe niveli i ulët i mjekëve në këtë zonë nuk janë të favorshëm për përkujdesjen për shëndetin e fshatarëve. Infermierja e qendrës shëndetësore të lokalitetit Maçang, zonja Zhang Yaling, tha se meqenëse shumë së sëmurë duan të vijnë për mjekim në qendrën shëndetësore, bëhen gjithnjë e më të dukshme disa probleme si prapambetja teknike, vjetrimi i pajisjeve dhe pamjaftueshmëria e punonjësve.

"Në përgjithësi, ne mund të mjekojmë disa sëmundje të përgjithshme, siç është gripi. Kurse, kur dikush vuan nga ndonjë sëmundje e rëndë, i propozojmë që të shkojë për vizitë në spitalin e kryeqendrës së distriktit. Të gjithë ne kemi dëshirë të madhe që të specializohemi diku. Do të ishte gjë e mirë edhe sikur të mësonim disa gjëra nga mjekët e spitalit të kryeqendrës së distriktit."

Krahas këtyre problemeve, disa fshatarë ankohen duke thënë se sa herë që vuajnë nga ndonjë sëmundje pak e rëndë, ata detyrohen të shkojnë për mjekim në spitalin e kryeqendrës së distriktit, por kjo kërkon shpenzime të mëdha, si shpenzimet për biletat e autobusit, për ushqim dhe për fjetje.

Administrata e distriktit Panxian po merr masa për të zgjidhur këto probleme. I ngarkuari me detyrën e kryetarit të distriktit, zoti Luo Zixiang tha se për sa i përket shpërndarjes së kuadrove, ata zbatojnë një politikë favorizimi të qendrës shëndetësore të lokaliteteve, duke i këshilluar diplomantët, që kanë mbaruar studimet, të punojnë në këto qendra shëndetësore dhe duke inkurajuar mjekët e spitalit të kryeqendrës së distriktit të specializohen në kurse afatshkurtra. Administrata e distriktit investoi sivjet 1 milion juanë për transformimin teknik të pajisjeve të qendrës shëndetësore të lokaliteteve.

Ekzistojnë tani në këtë distrikt disa ambulanca të vogla private, që mund të plotësojnë pamjaftueshmërinë e njësive mjekësore në pronësi të përbashkët, duke mjekuar sëmundjet e lehta. Mirëpo edhe këto ambulanca private kanë ndeshur në vështirësi gjatë funksionimit. Zoti Vang Qing, pronari i një ambulance private, tha:

"Zona jonë është një zonë e varfër ekonomikisht dhe shumë fshatarë nuk kanë të holla për mjekim." Ai shpreson se administrata e distriktit do të kuptojë rolin plotësues të ambulancave private dhe do t'i përkrahë ato. (Zheng)