dëgjoni

Nga 15 deri më 20 tetor u zhvilluan Lojërat me Ftesë të Shangait të Olimpiadës së Posaçme të vitit 2006. Olimpiada e Posaçme organizohet veçanërisht për personat me aftësi të kufizuar mendore. Në këto lojëra, e shijojnë gëzimin e sportit sportistë të posaçëm të vendeve të ndryshme të botës.

Në këto lojëra morën pjesë mbi 2 mijë sportistë e trajnerë nga 20 vende e rajone të botës. Lojërat përfshijnë 30 disiplina sportive, si patinazh me rrota, basketboll, peshënritje, not, bejsboll, badminton etj.

Patinazhi me rrota është një sport që kërkon shumë shkathtësi, por sportistët me aftësi të kufizuar mendore janë në gjendje ta zotërojnë mirë pas stërvitjeve. Garat e patinazhit me rrota të këtyre lojërave u zhvilluan në Pallatin e Patinazhit me Rrota "Huangpu" të Shangait, instalimet e të cilit janë të përsosura. Mjeshtëria e paraqitur nga sportistët në gara habiti shumë shikues. Trajneri i ekipit kinez Yu Jianbing bëri të ditur se patinazhi me rrota është një disiplinë sportive me njëfarë rreziku dhe çdo lëvizje realizohet me ndërgjegjshmërinë për vetëmbrojtjen e patinatorit si kusht paraprak. Duke pasur si bazë stërvitjen, edhe personat me aftësi të kufizuar mendore mund të krijojnë këtë ndërgjegjshmëri dhe shprehi, në mënyrë që të shijojnë gëzimin nga patinazhi me rrota, ashtu si njerëzit normalë. Nga ky këndvështrim, realizohet koncepti "pjesëmarrja e barabartë", i nisur nga Olimpiada e Posaçme. Një tjetër trajner i ekipit kinez, z. Xue Mu tha:

"Gëzim, gëzim i madh! Ata ndiejnë këtë gëzim si dhe nderim, që mund të marrin pjesë në këto lojëra si përfaqësues të Kinës."

Në garat e patinazhit me rrota, ekipi polak u shpall kampion i stafetës së përzier 2*100 metra. Trajneri i këtij ekipi Jan Valiskovski tha:

"Gëzohemi shumë që marrim pjesë në lojërat në Kinë. Sot fituam dhe shpresoj se do ta ruajmë këtë fitore edhe nesër."

Trajneri kinez Xue Mu tha se pjesëmarrja në sportet e posaçme mund t'i ndihmojë lojtarët me aftësi të kufizuar mendore të ngrenë aftësinë e tyre të të jetuar. Pavarësisht nga mosha e re, anëtarët e ekipit kinez të patinazhit me rrota e kuptojnë që herët që gjërat e tyre në jetë duhet t'i kryejnë ata nga vetë, pra sporti ka rëndësi të veçantë për këta fëmijë të veçantë.

Me qëllim që sportistët e posaçëm të ndiejnë më shumë gëzim nga sporti, gjatë këtyre lojërave komiteti organizativ u ofroi atyre shërbime të sakta dhe të përsosura. Vullnetarët e rinj të Shangait shfaqën dashamirësinë e tyre të sinqertë për këta sportistë të posaçëm. Para garave, vullnetarët i ndihmuan sportistët të visheshin me kostumet sportive dhe të futeshin në pistë. Pas garave, çdo sportist u shoqërua nga një vullnetar i posaçëm, që e ndihmonte të rregullonte kostumin e mjetet sportive. Edhe në shumë hallka të hollësishme, sportistët me aftësi të kufizur mendore kanë nevojë për ndihmën e vullnetarëve. P.sh. nganjëherë, ndonjë sportist e keqkuptonte vijën e dorëzimit të stafetës si vijën e mbërritjes. Mund të thuhet se zhvillimi normal i lojërave është i pandarë nga dashamirësia dhe shërbimi i vullnetarëve.

Në vitin 2007, Shangai do të organizojë Lojërat e 12-ta të Posaçme Botërore Olimpike, prandaj lojërat me ftesë të Shangait të Olimpiadës së Posaçme shërbyen si prelud i veprimtarisë së madhe të vitit të ardhshëm. Gjatë këtyre lojërave me ftesë, Bashkia e qytetit të Shangait u ofroi pjesëmarrësve shërbime të përsosura. Shumë lojtarë u ftuan edhe në lagjet e thjeshta të Shangait, duke u pritur ngrohtësisht nga banorët vendorë. Krahas garave zyrtare, komisioni organizativ u ofroi lojtarëve edhe 6 shërbime mjekësore e shëndetësore. Duke marrë pjesë në aktivitetet përkatëse të këtyre lojërave të posaçme, zv/kryeministri i Kinës Hui Liangyu tha:

"Qeveria kineze u ka kushtuar rëndësi të madhe Olimpiadës së Posaçme dhe personave me aftësi të kufizuar mendore. Që nga viti 1987, Kina ka organizuar me radhë 4 Lojëra të Posaçme Kombëtare. Duke përfituar nga rasti i përgatitjes për Lojërat e Posaçme Botërore Olimpike 2007, qeveria kineze po merr masa efikase për nxitjen e shoqërisë, që të tregojë më shumë kujdes për personat me aftësi të kufizuar mendore." (Wang Lei)