dëgjoni

Ne emocionohemi gjithmonë nga përpjekjet e sportistëve në Lojërat Olimpike për kapërcimin e maksimumit të vet, por njëkohësisht ekzistenca e gangrenës së dopingut e vë shpesh në dyshim mundin për arritjen e rekordeve botërore, që janë thyer herë pas here. Pak kohë më parë, vrapuesi i njohur amerikan Xhastin Gatlin u dënua me ndalimin e pjesëmarrjes në gara për 8 vjet, si pasojë e marrjes së dopingut. Ditët e fundit, z. Dik Pond, kryetari i Agjencisë Botërore të Antidopingut erdhi në Pekin dhe foli për mendimet e punën e tij në pararojë të luftës kundër dopingut.

Ditët e fundit, me ftesë të Komitetit Olimpik të Kinës, kryetari i Agjencisë Botërore të Antidopingut Dik Pond erdhi në Kinë, ku dëgjoi raportin e punës së antidopingut të Kinës. Krahas kësaj, ai vizitoi edhe Laboratorin e Antidopingut të Kinës. Në bazë të një sërë inspektimesh, ai shprehu kënaqësi për përpjekjet dhe përparimet e Kinës në problemin e antidopingut.

"Jam i mendimit se pas zhvillimit të punës së anti-dopingut, Kina ka pasur progres të madh, por prapëseprapë ka një rrugë të gjatë për të ndjekur, sepse Kina është një vend i madh dhe i rëndësishëm. Kënaqem shumë që pashë se këtu punët e anti-dopingut janë zhvilluar normalisht."

64 vjeçari Pond është kanadez. Në rini ai ka marrë pjesë në Lojërat Olimpike të Romës në vitin 1960. Sfondi i tij si sportist ndikon pak a shumë mbi punën e antidopingut.

"Madhështia e Lojërave Olimpike është që ato të japin një rast, nëpërmjet të cilit mund të paraqitësh gjendjen tënde maksimale në bazë të talentit që ka dhe të stërvitjeve të zellshme dhe mund të konkurrosh me sportistët më të shquar në botë. Mirëpo, pas shfaqjes së veprimeve mashtruese, kjo ndjenjë madhështor është njollosur. Në kohën kur isha sportist, kisha një ndjenjë shumë të bukur për Lojërat Olimpike dhe dëshiroj që të përpiqem me të gjitha forcat që edhe sportistët e sotëm të kenë të njëjtën ndjenjë."

Pas tërheqjes nga veprimtaria si sportist, Pondi ka punuar në Komitetin Olimpik Ndërkombëtar dhe ka dhënë kontribut për zhvillimin e shpejtë të Olimpiadës gjatë 30 vjetëve të fundit. Në vitin 2000, pas shkarkimit nga detyra si nënkryetar i Komitetit Olimpik Ndërkombëtar, Pondi i është kushtuar me gjithë shpirt luftës kundër dopingut dhe ka punuar deri më sot si kryetar i Agjencisë Botërore të Antidopingut, e krijuar me nismën e tij. Pondi tha se pas tërheqjes me prestigj të madh nga Komiteti Olimpik Ndërkombëtar, ai zgjodhi detyrën më të vështirë, sepse ai është i ndërgjegjshëm që problemi i dopingut është bërë "gangrena" më e madhe që shqetëson qarqet sportive.

"Përdorimi i dopingut është problemi më serioz që shtrohet përpara nesh në kohën e sotme. Ne duhet ta zgjidhim atë. "

Mund të themi se problemi i dopingut është pasoja më shqetësuese e lindur gjatë procesit të zhvillimit të sportit. Një pjesë sportistësh fitojnë lavdi në mënyrë mashtruese dhe sakrifikojnë edhe shëndetin e vet. Detyra e Agjencisë Botërore të Antidopingut është zbulimi i këtyre mashtrimeve dhe mbrojtja e interesave të sportistëve për një konkurrim të drejtë. Mirëpo, si kryetar i kësaj agjencie, Pondi është i mendimit se objektivi përfundimtar i punës së tyre është që ekzistenca e kësaj agjencie t'u krijojë besim sportistëve që nuk përdorin doping.

Pondi tha: "Lufta kundër dopingut ka arritur përparime të mëtejshme. Gjithnjë e më shumë njerëz kanë filluar ta njohin këtë problem dhe ta zgjidhin atë. Me përparimin e mëtejshëm të metodave kërkimore dhe të analizave personat që orvaten të mashtrojnë, gjenden në një situatë gjithnjë e më të vështirë."

Problemi i antidopingut ka një histori të gjatë dhe zgjidhja e tij nuk mund të arrihet brenda një ditë. Pondi shprehu mendimin se forcimi i edukimit të të rinjve është e vetmja rrugë për zgjidhjen nga rrënjët e këtij problemi.

"Nga pikëpamja afatgjatë, edukimi është përgjigjja për zgjidhjen e këtij problemi. Vetëm zbulimi i mashtruesve nuk mund të ketë rezultat të kënaqshëm. Zgjidhja reale është krijimi i një mjedisi ku çdo njeri të jetë i ndërgjegjshëm për gabimet dhe rrezikshmërinë e përdorimit të dopingut. Shpresoj se sportistët e brezit të ri do të kuptojnë se mosmashtrimi i tyre nuk duhet të vijë nga frika e zbulimit, por nga ndërgjegjshmëria se ky veprim është i gabuar."

Në Lojërat Olimpike verore të viteve të fundit, pavarësisht nga kërkesat e herëpashershme të Komitetit Olimpik Ndërkombëtar dhe të Agjencisë Botërore të Antidopingut, vunë re raste të shkeljes së rregullave të anti-dopingut. Në Lojërat Olimpike, që do të zhvillohen në vitin 2008, Pekini synon të sigurojë Lojëra Olimpike "të pastra", nëpërmjet teknologjive të larta të kontrollit dhe rregullave të rrepta të dënimit. Edhe Pondi u bën thirrje sportistëve të mbarë botës të përgatiten për Lojërat Olimpike në mënyrë të drejtë dhe t'ia shtojnë nderin Olimpiadës. (Wang Lei)