Kohët e fundit, u shfaq me sukses filmi kinez "Guri i çmendur". Këngëtari i famshëm hongkongas Andy Lau, si një investues për këtë film, me përpjekje të veçanta, na shfaqet si një idhull i vjetër që ka punuar me zell në qarqet artistike për më shumë se 20 vjet. Përveç filmit, Andy Lau edhe punon mirë në të kënduarit. Albumi i ri në dialektin kantonez me titull "Zëri" ka dalë në gusht të këtij viti. Në këtë album ka 10 këngë të stileve lirike dhe R&B.

Po dëgjoni tani këngën me titull "Lodhje", e cila është kënga kryesore e filmit "Guri i çmendur". Teksti i kësaj kënge është krijuar nga Andy Lau. Ai shfrytëzon fjali të thjeshta për të satirizuar veprimet e pandershme.

"I zellshëm" mund të jetë gjithmonë një fjalë për të përshkruar Andy Laun, sepse ai punon me zell jo vetëm për filmin, por edhe për të kënduarit. Nga albumi i parë me titull "Në këtë moment di vetëm që të dua" deri në albumin e fundit "Zëri", Andy Lau ka bërë shumë përpjekje të zellshme. Ai marrë pjesë në prodhimin dhe shitjen e çdo albumi të vet. Për shkak të përpjekjeve të tij, Andy Lau ka fituar çmime të panumërta gjatë jetës artistike 20 vjeçare.

Pasi u largua nga qarqet muzikore për 18 muaj, këngëtari tajvanez Fan Yichen u paraqit përsëri me albumin e ri me titull "Butësia e pa thënë". Në këtë album ka disa këngë të kompozuara nga ai si "Largohu", "Ti", "Butësia e pa thënë" dhe "Më i dashuruar" etj. Fan Yichen ka marrë pjesë jo vetëm në prodhimin e muzikës, por edhe në bërjen e fotografive dhe prodhimin e videos muzikore.

Po dëgjoni tani këngën me titull "Love Story", e cila është kompozuar nga kitaristi i grupit muzikor F.I.R, A Qin. Këngët në albumin e ri janë kryesisht të stilit lirik dhe pak të stilit rok. Në këngën "Më i dashuruar" Fan Yichen përzien muzikën elektronike me muzikën rok për të treguar dashurinë e tij për rok & rollin. Le ta dëgjojmë këtë këngë.

Në qarqet e muzikës së gjuhës kineze Cai Qin është një këngëtare e quajtur "këngëtarja klasike". Në vitin 1981, ajo u bë e njohur me këngën "Tamam si butësia jote". Cai Qin, me zërin kumbues dhe të qëndrueshëm dhe me stilin e të kënduarit elegant, ka fituar pëlqimin e adhuruesve të ndryshëm.

Po dëgjoni tani këngën me titull "Tamam si butësia jote", e cila është kënga e parë e Cai Qin-it pasi nisi të merrej me muzikë. Me zërin e ulët dhe magnetik, Cai Qin na paraqet ndjenjën e dashurisë. Në këtë këngë thuhet "Një ditë ngjan si një fytyrë e plasaritur. S'mund të hap gojën të të them mirupafshim. Më ka marrë shumë malli për ty dhe për të kaluarën. Dëshiron që era e detit të fryjë përsëri. Tamam si butësia jote."

Në vitin 1979, Cai Qin 22-vjeçar mori pjesë në konkursin e këngës të Tajvanit të quajtur "Stili i muzikës kombëtare". Pastaj ajo u fut në qarqet muzikore. Gjatë 20 vjetëve, ajo ka nxjerrë më shumë se 40 albume vetjake dhe ka fituar shumë çmime në disa konkurse kënge. Sot disa këngë të saj si "Kënga për udhëtimin jashtë", "Sytë e tu", "Zemra e tundur" dhe "Kam përvojë dashurie" janë ende të paharrueshme për adhuruesit.

Në fund të programit të sotëm do të dëgjoni këngën me titull "Sytë e tu", të zgjedhur nga albumi i nxjerrë në vitin 1981. Kjo është një këngë dashurie romantike. (U Sen)