dëgjoni

Agjencia kineze e lajmeve Hsinhua njoftoi se më 22 tetor, u hap në qytetin Wuyishan të provincës Fujian të Kinës juglindore Festivali i 5-të i Kulturës së Bambusë i Kinës ku marrin pjesë më se 1500 funksionarë qeveritarë kinezë, diplomatë, specialistë, biznesmenë etj. të vendeve të ndryshme. Festivali organizohet nga Drejtoria Shtetërore e Pylltarisë e Kinës.

Tema kryesore e këtij festivali është "Zhvillimi i ekonomisë së bambusë". Gjatë festivalit do të zhvillohen shkëmbime midis dy brigjeve të ngushticës së Tajvanit për kulturën e bambusë, forumi i zhvillimit të sektorit të bambusë etj.

Festivali i Bambusë i Kinës u krijua në vitin 1996 dhe zhvillohet një herë në çdo dy vjet.

Kina është vendi më i madh i mbjelljes së bambusë në botë. Sipërfaqja e bambusë arriti në 5 milionë hektarë.

U zhvillua në Pekin Forumi i Muzeve Kinë-SHBA

Korrespondenti i Radios së Jashtme të Kinës njoftoi se nga 18 deri më 20 tetor, u zhvillua në Pekin Forumi i Muzeve Kinë-SHBA. Më se 100 drejtorë të muzeve dhe specialistë të Kinës dhe të SHBA-së diskutuan për administrimin e muzeve, funksionin e tyre etj.

Ky forum organizohej bashkërisht nga Drejtoria Shtetërore e Relikteve të Kinës dhe Fondacioni Mellon i SHBA-së. Në vitin 2001, të dyja palët filluan bashkëpunimin për të përgatitur administratorë të lartë kinezë të muzeve në SHBA.

U hap Festivali i 8-të Ndërkombëtar Artistik i Shangait

Korrespondentja e Radios së Jashtme të Kinës njoftoi se më 17 tetor, u hap në Shangai Festivali i 8-të Ndërkombëtar Artistik i Shangait. Gjatë festivalit njëmujor, artistët e ardhur nga Meksika, Australia, Italia etj. do të japin mbi 70 shfaqje.

Festivali Ndërkombëtar Artistik i Shangait organizohet nga Ministria e Kulturës e Kinës dhe qeveria e bashkisë së qytetit Shangai. Qysh nga viti 1999, ky festival zhvillohet një herë në çdo vit.

Në Shaoxing u zhvillua simpoziumi me rastin e 70-vjetorit të vdekjes së Lu Xunit

Agjencia kineze e lajmeve Hsinhua njoftoi se ditët e fundit, në qytetin Shaoxing të provincës Zhejiang të Kinës lindore u zhvillua një simpozium ndërkombëtar akademik me rastin e 70-vjetorit të vdekjes së Lu Xunit. Në këtë simpozium morën pjesë më se 120 specialistë dhe dijetarë të Lu Xunit të ardhur nga Kina, Japonia, Rusia, Gjermania etj.

Lu Xuni lindi në vitin 1881 në Shaoxing dhe ishte shkrimtari dhe ideologu i famshëm kinez. Novelat e tij "Ditari i një njeriu të çmendur", "Tregimet e A Q-së" etj. kanë zënë pozitë të rëndësishme në historinë letrare botërore. (Fani)