dëgjoni

Kinezët e kanë si zakon që, duke lavdëruar një mjek me mjeshtri shumë të lartë, ta quajnë atë me metaforë "Hua Tuo të ringjallur". Ky ishte një mjek i famshëm kinez i lashtësisë, me të cilin do t'ju njohim në rubrikën e sotme.

Hua Tuo lindi në provincën Anhui të sotme të Kinës Lindore dhe jetoi në vitet e fundit të dinastisë Han Lindor(25-220). Ai filloi të mësonte me zell qysh në fëmijëri dhe kishte prirje të vençantë të mësonte mjekësinë dhe metodat e ruajtjes së shëndetit të mirë. Me këtë qëllim, ai udhëtoi në shumë krahina të vendit për të mësuar nga mjekët e njohur. Krahas studimit në thellësi të mjekësisë, ai mblodhi edhe përvojën e popullit për mjekimin e sëmundjeve. Kështu, ai përvetësoi njohuri të gjithanshme mjekësore dhe u kualifikua në shumë degë të mjekësisë, si në patologji, kirurgji, gjinekologji, pediatri etj. Ai pati nivel të lartë sidomos në kirurgji dhe u quajt me nder "paraardhësi i kirurgëve".

Kontributi krijues, që dha Hua Tuo për zhvillimin e mjekësisë së lashtë kineze, gjente shprehjen në radhë të parë në shpikjen e lëndës së anestezisë Mafeisan, një lloj lëng alkoolik i nxjerrë nga datura dhe disa bimë të tjera, që ishte lënda e domosdoshme për operacionet në atë kohë. Receta e përbërjes së kësaj lënde është humbur prej kohësh, por historianët e kohës sonë prapë se prapë e konsiderojnë Hua Tuo si mjeku i parë në botë që shpiku lëndë anestezie dhe bëri anestezi të përgjithshme, 1600 vjet para mjekëve anglezë dhe amerikanë, që shpikën solucione kimike të anestezisë dhe bënë anestezi të përgjithshme. Lëngu Mafeisan u përhap dikur edhe në Kore, Japoni, Marok dhe vende të tjera. Në saje të shpikjes dhe përdorimit të lëngut Mafeisan, teknika kirurgjike e Hua Tuos u përsos nga dita në ditë dhe ai bëri mjaft operacione edhe për mjekimin e sëmundjeve në organet e brendshme.

Hua Tuo ishte edhe themeluesi i sporteve mjekuese. Ai ishte i mendimit se çdo njeri duhet të bëjë kalitje fizike për ruajtjen e shëndetit. Ai thoshte se nyja e derës që rrotullohet ditë për ditë, nuk gërryhet nga krimbat; uji i lumit që rrjedh ditë për ditë, nuk qelbet dhe, po ashtu, edhe njeriu që lëviz ditë për ditë, mund të ruajë shëndetin e mirë. Duke vëzhguar dhe duke imituar lëvizjet e kafshëve, ai krijoi një lloj gjimnastikë me emërtimin "loja e 5 lloje kafshëve", të përbërë nga "vërsulja e tigrit", "kthimi i kokës së sorkadhes", "shtrirja e trupit të ariut", "kërcimi i majmunit" dhe "shtrirja e krahëve të shpendëve". Duke ushtruar këto lëvizje të gjimnastikës, njeriu mund të kalitë muskujt dhe kyçet e gjithë trupit. Vu Pu dhe Fan A, që ishin nxënës të Hua Tuos, u kalitën gjithmonë me këtë gjimnastikë dhe, si rezultat, Vu Pu i ruajti të shëndetshme shqisat e tij të të dëgjuarit dhe të të parit edhe në moshën mbi 90 vjeçare, kurse Fan A jetoi deri në moshën mbi 100-vjeçare. Gjimnastika "loja e 5 lloje kafshëve", që krijoi Hua Tuo, është ruajtur deri tani dhe është bërë një nga sportet e popullit kinez për ruajtjen e shëndetit të mirë.

Hua Tuo studjoi në thellësi edhe metodat e mjekimit të sëmundjeve parazitare e sëmundjeve psikike si dhe mjekësinë pleqësore. Ai ia kushtoi gjithë jetën e tij mjekësisë, duke udhëtuar nëpër të katër anët e vendit për të shpëtuar popullin nga vuajtjet. Banorët e provincave Anhui, Shandong dhe Gjangsu, që kanë qenë krahinat kryesore të veprimtarisë së Hua Tuos, lavdërojnë gjithmonë meritat e tij dhe kanë ruajtur deri tani tempujt e nderimit të kujtimit të tij. Shprehja "Hua Tuo i ringjallur" simbolizon nderin më të lartë që populli i jep një mjeku të shquar. (Zheng)