dëgjoni

Ditët e fundit, Shoqata e Përkthimit e Kinës i dha përkthyesit dhe arsimtarit të famshëm kinez Ji Xianlin "Çmimin e arritjeve të përjetshme kulturore dhe të përkthimit" në shenjë mirënjohjeje për kontributin e shkëlqyer të tij në fushën e shkëmbimeve kulturore midis Kinës dhe vendeve të huaja, veçanërisht në fushën e studimeve për kulturën indiane.

Ji Xianlin lindi në vitin 1911 në një familje të varfër fshatare në provincën Shandong të Kinës lindore. Në moshën 19-vjeçare, Ji Xianlini u pranua në fakultetin e letërsisë perëndimore të Universitetit Qinghua të Kinës. Në këtë universitet, Ji Xianlin hyri në kontakt me gjuhën sanskrite dhe me kulturën budiste. Në vitin 1935, 24-vjeçari Ji Xianlin shkoi në Universitetin e Gëtingenit të Gjermanisë për të studiuar gjuhën sanskrite dhe gjuhën e Tokharoit. Studimet 10-vjeçare në Gjermani e nxitën Ji Xianlinin të bëhet një studiues dhe specialist i shkencës orientale.

Sekretari i përgjithshëm i Institutit Studimor Dunhuang të Kinës të krijuar nga Ji Xianlini, profesori Cai Jianhong tha se studimet 10-vjeçare në Gjermani patën ndikim të madh te Ji Xianlini.

"Tani në Kinë ka vetëm dy ose tre veta që dinë gjuhën e Tokharoit. Kur ishte në Gjermani, Ji Xianlin mësonte me shumë zell dhe e zotëroi këtë gjuhë të vështirë. Në shkencën orientale, Ji Xianlini studion kryesisht shkëmbimet kulturore kino-indiane dhe ka pasur rezultate të pasura në këtë fushë."

Në vitin 2004, Ji Xianlini botoi librin "Studimet 10-vjeçare në Gjermani" ku thotë se pikërisht në Gjermani, ai gjeti rrugën e përjetshme të studimeve.

Në vitin 1941, Ji Xianlini mori gradën e doktorit, por për shkak të Luftës së Dytë Botërore, ai nuk mund të kthehej në atdhe dhe qëndroi në Universitetin e Gëtingenit deri në vitin 1945 kur përfundoi lufta. Pas kthimit në atdhe, Ji Xianlin krijoi fakultetin e gjuhëve dhe të letërsisë orientale në Universitetin e Pekinit. Ky fakultet është baza kryesore e studimit të shkencës orientale në Kinë. Deri tani, fakulteti i gjuhëve dhe i letërsisë orientale i Universitetit të Pekinit ka përgatitur mbi 6000 talente të posaçme duke përfshirë 30 ambasadorë. Kolegu i Ji Xianlinit, profesori Cai Jianhong tha se Ji Xianlini ka dhënë ndihmë të çmuar për kolegët dhe studiuesit e rinj në fushën akademike.

"Profesori Ji u kushton shumë vëmendje studimeve të studiuesve të rinj dhe ka krijuar shumë raste për t'i ndihmuar. Shumë studentë të përgatitur prej tij janë bërë specialistë të famshëm në komunitetin ndërkombëtar."

Veprat e përkthyera nga Ji Xianlini kanë të bëjnë kryesisht me historinë, kulturën e gjuhët e lashta indiane. Ai ka përkthyer vepra të gjuhës sanskrite dhe të gjuhës së Tokharoit në gjuhën kineze dhe në gjuhën angleze e njëkohësisht ka përkthyer edhe shumë vepra letrare të gjuhës gjermane. Megjithëse ka pasur rezultate të mëdha në fushën e përkthimit, Ji Xianlini u shpreh se ai do të vazhdojë të bëjë përpjekje në këtë fushë.

"Përkthimi ka rëndësi të madhe për shkëmbimet kulturore. Mendoj se duhet të bëj përpjekje të mëtejshme në këtë fushë."

Krahas shkencës orientale, Ji Xianlin studion edhe shkenca të tjera. Në vitin 1998, Ji Xianlin botoi veprën akademike "Historia e sheqerit" me mbi 800 mijë karaktere. Kjo vepër shënon historinë e prodhimit të sheqerit dhe shkëmbimet kulturore nëpërmjet sheqerit. Për të shkruar këtë libër, Ji Xianlinit iu deshën disa vjet dhe bëri përpjekje të palodhshme. Kjo vepër ka dhënë ndihmesë të madhe për historinë e shkencës e të teknikës të Kinës dhe të botës.

Tani 95-vjeçari Ji Xianlin vazhdon të merret me studime akademike dhe shkrime. Krahas veprave akademike, ai ka shkruar shumë artikuj që shënojnë përvojën dhe jetën e vet. Artikujt e tij kanë karakteristika të veçanta dhe kanë tërhequr shumë lexues. (Fani)