dëgjoni

Sot në Kinë, me reklamat e llojllojshme për produktet e kalciumit, plotësimi i kalciumit në organizmin e njeriut është bërë diçka e modës për mbrojtjen e shëndetit. Kalciumi, si element i rëndësishëm brenda organizmit të njeriut, nuk duhet të mungojë, por plotësimi jashtë mase ose plotësimi i papërshtatshëm i tij sjell dëme.

Me ngritjen e nivelit të jetës së popullit, shumë kinezë e konsiderojnë plotësimin e kalciumit si një metodë të rëndësishme për mbrojtjen e shëndetit. Jo vetëm pleqtë dhe fëmijët, por edhe shumë të rinj e të reja kanë filluar ta pinë ditë për ditë kalciumin si ilaç. Dikush e quan këtë dukuri "fushatë e gjithë popullit për plotësimin e kalciumit."

Plotësimi i elementeve të domosdoshme është i dobishëm për organizmin, por plotësimi i papërshtatshëm i kalciumit jo vetëm nuk na bën mirë, por përkundrazi, mund të shkaktojë disa sëmundje. Në provincën Hebei, një grua me emrin Vang kishte më se 10 vjet që pinte 7 a 8 hape kalciumi në ditë, por më në fund ndjeu dhembje në mes. Mjeku ia përcaktoi diagnozën: ajo vuan nga gurët në veshkë, gjë që është rrjedhim i plotësimit jashtë mase të kalciumit.

Atëherë, sa kalcium duhet të asimilojë organizmi i njeriut në ditë? Lidhur me këtë çështje, profesori i fakultetit të ushqimit dhe higjienës së të ushqyerit të Universitetit të Pekinit, zoti Li Keji tha:

"Në fakt, në dispozitat përkatëse të rregulloreve të shtetit tonë përcaktohet se sasia e sigurt dhe maksimale e asimilimit të kalciumit për një njeri është 2000 miligramë në ditë, duke u përfshirë sasia e kalciumit që merret nga ushqimet dhe që plotësohet nëpërmjet kanaleve të tjera. Kur kalciumi i asimiluuar e kalon këtë sasi, mund të ketë efekte negative."

Profesor Li theksoi se 2000 miligramë kalcium në ditë është sasia maksimale për një njeri. Zakonisht, për një njeri me shëndet normal, mjafton që të asimilojë në ditë 700-1200 miligramë kalcium, sasi kjo që mund të plotësojë nevojën e organizmit të njeriut. Në përgjithësi, çdo njeri mund të asimilojë në ditë 350 miligramë kalcium nga ushqimet. Kjo sasi, plus kalciumi nga qumështi, mjafton për një njeri, sepse çdo 500 mililitra qumësht përmban 600 miligramë kalcium. Kështu, në rast se një njeri siguron çdo ditë ushqimet normale dhe ruan zakonin e përdorimit të qumështit, ai nuk ka nevojë të marrë masa për të plotësuar kalciumin.

Atëherë cilët njerëz kanë nevojë të marrin kalcium shtesë? Specialistët propozojnë që, në radhë të parë, duhet të bëhet një ekzaminim mjekësor dhe të konstatohet nëse kemi nevojë për plotësimin e kalciumit. Prej mungesës së kalciumit në organizëm, të rriturit kanë rrezik të vuajnë nga osteoporoza, kurse fëmijët kanë rrezik të vuajnë nga rakitizmi dhe sëmundja e këmbëve të lakuara, madje mund të qajnë pandërprerë natën dhe të vuajnë nga spazma dhe sëmundje të tjera. Të gjithë ata që kanë shenjat e sipërpërmendura, duhet të çohen në spital për një ekzaminim mjekësor dhe, me anë të ekzaminimit të dendësisë së kockave, të dihet nëse u mungon kalciumi. Për shumicën e tyre, mjafton që të plotësojnë kalciumin duke përdorur më shumë bishtaja, si bizele dhe fasule, dhe duke pirë më shumë qumësht. Vetëm ata, që vuajnë nga mungesa e rëndë e kalciumit, kanë nevojë të marrin kalcium shtesë duke pirë ilaçe dhe duke përdorur disa gjëra shëndetësimi.

Disa të sëmurë, që vuajnë nga sëmundje të veçanta, si sëmundjet e zemrës dhe tensioni i lartë i gjakut, duhet të kenë më shumë kujdes. Kur kanë nevojë të marrin kalcium shtesë, ata duhet të veprojnë me rigorozitet sipas këshillave të mjekut dhe nuk duhet të plotësojnë verbërisht kalciumin, që të mos ndodhin të papritura.

Zonja Vang Liyun, një banore e qytetit Pekin, ka mbi 10 vjet që pi vazhdimisht hape kalciumi, por ajo nuk ka shumë njohuri për plotësimin e kalciumit. Ajo tha:

"Unë kam provuar pothuajse të gjitha llojet e hapeve të kalciumit. Kur pi karbonat kalciumi, ndiej shqetësim në stomak, sepse kam vuajtur dikur nga ulcera duodenale."

Profesor Li Keji tha se ekzistojnë tri lloje produktesh që mund të përdoren për plotësimin e kalciumit. Lloji i parë është karbonati i kalciumit, që quhet edhe "kalciumi inorganik". Lloji tjetër është kalciumi organik, si fosfati i kalciumit dhe kalciumi laktat. Lloji i tretë është kalciumi i nxjerrë nga kockat. Këto produkte nuk janë të përshtatshme për të gjithë. Për shembull, karbonati i kalciumit asimilohet më lehtë, por nuk është i përshtatshëm për ata që u mungon acidi i stomakut. Prandaj përdorimi i kalciumit kërkon kujdes të madh.

Është një gjë e rëndësishme që të gjithë të kenë zakone dhe mënyrë të mirë jetese, ta lënë duhanin, ta kufizojnë sasinë e përdorimit të pijeve alkoolike dhe të mos pinë shumë kafe, me qëllim që të ngrihet niveli i asimilimit të kalciumit.(Zheng)