Ju flet Radio e Jashtme e Kinës. Të dashur dëgjues, unë jam Pina, po takohemi në programin e sotëm muzikor. Në këtë program do t'ju njoh me këngëtaren Huang Hongying dhe do t'ju ftoj të dëgjoni disa këngë nga albumi i ri i saj me titull "Vajzat Kejia".

"Në pranverën panoramike, kanë ardhur nga të katër anët mysafirë të shtrenjtë. Koha është as e nxehtë e as e ftohtë, në Huizhou ka peizazh të bukur në të katër stinët. Mirë se të vini herën tjetër, do t'ju shoqëroj me këngë malësore deri në të gdhirë."

Këngëtarja Huang Hongying ka lindur në qytetin Huizhou të provincës Guandong në jug të Kinës dhe është rritur duke dëgjuar këngë malore Kejia të kënduara nga nëna e saj. Në moshën 14-vjeçare ajo u pranua si këngëtare në një ansambël artistik. Pas praktikës artistike dhe ushtrimit të muzikës vokale për shumë vjet, niveli i këndimit të saj është ngritur shumë. Ajo ka diapazon të gjerë dhe motiv të lartë e kumbues, prandaj mund të këndojë si këngë popullore, ashtu edhe këngë zbavitëse.

Kënga që ndoqët është një këngë malore Kejia me titull "Eja po të këndosh këngë malësore", kënduar nga Huang Hongying.

Para 1700 vjetëve, në fund të dinastisë Jin Perëndimore, banorët e kombësisë hane që jetonin në rrjedhën e lumit Huanhe, për t'iu shmangur luftërave, u larguan nga vendlindja dhe shkuan për të banuar në provincat Guandong, Guangxi, Fujian etj. Këta banorë të ardhur nga krahina të tjera, quhen nga vendorët "banorët Kejia". Këngët malore të banorëve Kejia me melodi të bukura dhe të larta, me përmbajtje të thjeshtë dhe të gjallë janë të përhapura gjerësisht deri më sot. Në këtë këngë thuhet: "Eja po të këndosh këngë malësore, këtu ka skenë për këngë malësore, sonte do të këndojmë së bashku, derisa të të fitoj ty."

Kënga "Eja po të këndosh këngë malësore" është një nga 13 këngët e përfshira në albumin e ri të këngëtares Huang Hongying. Këto këngë jo vetëm ruajnë thjeshtësinë origjinale të këngëve malësore, por në to janë shtuar edhe elemente të muzikës moderne zbavitëse, duke u përshtatur më tej me shijen e qytetarëve. Tani le të ndjekim këngën e këtij albumi "Vajzat Kejia duan të këndojnë".

Si një këngëtare Kejia, Huan Hongying i këndon këngët malësore në dialektin e saj dhe njëkohësisht fut në to elemente të këngëve zbavitëse. Më poshtë do të shijojmë bashkë këngën "Drita e hënës", që shpreh mallin e banorëve Kejia për vendlindjen. Në këngë thuhet: "Në ditën e Festës së Hënës, nëna dhe unë admirojmë dritën e ndritur të hënës. Nëna më tregoi se Kina është vendlindja ime. Drita e hënës ndriçon vendlindjen tonë."

Këngëtarja Huang Hongying ka organizuar më se një herë koncerte në provincën Guangdong, në Hong-Kong etj. dhe ka shkuar për shkëmbime artistike dhe shfaqje si anëtare e Ansamblit artistik popullor Kejia të provincës Guangdong në Tajvan të Kinës, në Malajzi, Singapor, Korenë e Jugut, ShBA dhe në vende e rajone të tjera. Këndimi i saj me karakteristika të theksuara nacionale dhe me stil të veçantë u mirëprit ngrohtësisht nga kinezët përtej detit. Në çdo shfaqje ajo këndoi këngë malësore Kejia. Huang Hongying u shpreh se ajo e do shumë tokën Kejia që e ka rritur, i do shumë këngët malësore Kejia dhe do t'i këndojë vendlindjes së bukur me këngë. Në fund të programit do të dëgjojmë këngën "Këngët malësore shumë të njohura Kejia".

Ju flet Radio e Jashtme e Kinës! Të dashur dëgjues, ju fola për këngëtaren Huang Hongying dhe këngët malësore Kejia të kënduara prej saj. Mirudëgjofshim të shtunën tjetër, në mikrofon për ju Pina.