Ju flet Radio e Jashtme e Kinës! Të dashur dëgjues, unë jam Pina, ju përshëndes përsëri nga Pekini. 10 shtatori është festa e mësuesve në Kinë. Në programin e sotëm të muzikës kineze ju ftoj të dëgjoni një grup këngësh që u këndojnë mësuesve, në mënyrë që nëpërmjet tingujve të bukur t'u shprehim atyre përshëndetje të përzemërta dhe respektin e thellë.

Kënga që po ndiqni, titullohet "Ah, mësuese nënë", kënduar nga kori i fëmijëve "Ylli i vogël". Fëmijët këndojnë me dashuri dhe përzemërsi: "Unë e dua mësuesen, e dua nënën, është e vështirë të them se cilën dua më shumë. Nëna është mësuese e dashur dhe e rreptë, ndërsa mësuesja është si nënë e dashur, që përgatit lulet e jetës në kopshtin njerëzor. Nëna është mësuesja jonë e parë, mësuesja është nëna që formon shpirtin tonë."

Në Kinë mësuesit quhen shpesh kopshtarë, të cilët me punë të palodhur dhe me djersë përgatisin me kujdes të madh lulet e njoma. Mësuesit i quajmë edhe qirinj, që djegin veten dhe ndriçojnë rrugën e rritjes së fëmijëve.

Më poshtë do të shijojmë së bashku me ju "Këngën kushtuar mësuesve", kënduar nga sopranoja e njohur kineze Liang Ning. Në këngë thuhet: "Fijet e shiut vjeshtor vallëzojnë në hapësirë, flladi i mbrëmjes i lëkund shelgjet dhe plepat. Kopshtarët punëtorë po kthehen në shtëpi në mes të errësirës, duke kujtuar qindra e mijëra fidanë. Llambat e rrugës ju ndriçojnë, lulet e kuqe ju buzëqeshin. Mësues i respektuar, ju keni harruar veten, keni harruar lodhjen, po digjeni si qiriri për të ndriçuar rrugën e përgatitjes së talenteve."

Tani ju ftoj të dëgjoni këngën "Petla të ardhura me fluturime", që këndohet nga kori i mësuesve Shoudu. Autorja e tekstit të kësaj kënge Wang An ka qenë mësuese dhe i ka njohur shumë mirë nxënësit. Kënga u këndon ndjenjave të thalla midis mësuesve dhe nxënësve, duke i quajtur në mënyrë të figurshme letrat e nxënësve si petla shumëngjyrëshe. Kompozitorja e njohur kineze Qu Xixian ka krijuar muzikën e bukur të këngës, duke shprehur dashurinë e përzemërt të nxënësve për mësuesit e tyre. Në këngë thuhet: "Letrat e ardhura me fluturime si petla shumëngjyrëshe, na dërgojnë përshëndetje të përzemërta dhe përgjigje të mrekullueshme. Petlat vallëzojnë në flladin pranveror dhe lëshojnë aromë të këndshme, duke iu përgjigjur shpresave të dikurshme të mësuesve."

10 shtatori i çdo viti është dita më e hareshme në oborrin e shkollave kineze dhe dita më e lumtur për mësuesit. Të gjithë fëmijët kremtojnë ditën e mësuesve, duke u shprehur përshëndetje festive. Ata këndojnë me plot ndjenjë: "Sot është ditëlindja juaj, i dashur mësues. Ne kemi një dëshirë të vogël që t'ju urojmë lumturi të përjetshme dhe shëndet të plotë. Ju keni ndezur me jetën mençurinë e çdo fëmije, keni ledhatuar me dashuri plagën e çdo fëmije. I dashur mësues, pavarësisht se ku do të shkojmë, nuk do ta harrojmë shikimin tuaj dhe shpresat tuaja." Le të shijojmë tani këngën "Ditëlindja e mësuesve", interpretuar nga kori "Xixëllonja e vogël" i Televizionit të Shangait.

Gjatë rritjes çdo njeri ka gjetur dashurinë më vetëmohuese dhe më të shenjtë nga nëna, mësuesit dhe atdheu. Kënga "Nuk e harroj kurrë" shpreh me ndjenja të thella dhe me melodi të rrjedhshme e të bukur falënderimet e thella për mësuesit, dashurinë e madhe për nënën dhe atdheun. Teksti i thjeshtë i kësaj kënge është shumë prekës.

Kënga që po dëgjoni, titullohet "Nuk harroj kurrë". Tekstin e këngës e ka bërë Kong Lingyi, muzikën Liu Hong dhe interpretohet nga këngëtarja e re Zhou Fang. Në këngë thuhet: "Nuk harroj kurrë nënën që më ka mbajtur, dashuria e nënës është e thellë si det i madh, do të përpiqem që të jetosh e lumtur dhe e gëzuar. Nuk i harroj kurrë mësuesit që më kanë edukuar, dashuria e mësuesve është e lartë si mal kreshnik, do të përpiqem që ju të ndani gëzimet e sukseseve të mia. Nuk e harroj kurrë atdheun që më ka ushqyer, dashuria e atdheut është më e madhe se malet e larta dhe deti i gjerë, do të punoj me të gjitha forcat për begatinë tënde."