Ju flet Radio e Jashtme e Kinës. Të dashur dëgjues, ndër pakicat kombëtare të Kinës, kombësia Hui është një kombësi që parapëlqen Vushun-në, një sport tradicional kinez. Kudo ku janë jetojnë të përqendruar banorët e kombësisë Hui, mbizotëron një atmosferë e ngrohtë e ushtrimit të Vushu-së. Edhe në Pekin ka shumë banorë të kësaj kombësie që ushtrojnë Vushu-në. Tani do t'ju paraqes disa prej tyre.

Në lagjen Niu në jug të Pekinit ka një Qendër të Vushu-së Nacionale, ku marrin pjesë shumë banorë të kësaj lagjeje. Pas punës ose në ditët e pushimit, ata mblidhen këtu për të ushtruar Vushu-në.

Por pse kombësia Hui e do Vushu-në ? Anëtari i Qendrës së Vushu-së z. Zhang Bin i tregoi korrespondentit se në kohët e lashta, banorët e kombësisë Hui ushtronin shpesh qitjen me hark duke hipur në kalë, bënin ushtrime të ndryshme me shkop, shtizë etj., për të mbrojtur veten në rast lufte. Z. Zhang tha:

"Në kohët e lashta njerëzit ushtronin Vushu-në vetëm për t'u mbrojtur."

Ngaqë i ati ushtronte Vushu-në, Zhang Bini është rritur në një mjedis të ushtrimit të Vushu-së. Edhe ai vetë tha se disa lëvizje të Wushu-së i ka përvetësuar pa i studiuar. Zhang Bini filloi ta ushtronte Vushu-në kur ishte 17 vjeç, por në fillim ai nuk e ushtronte me zell. Vetëm në moshën 20-vjeçare, ai filloi ta ushtronte me të gjitha forcat, sepse e donte me gjithë zemër Wushu-në. Më vonë Zhang Bini u radhit në vendet e para në shumë gara të Vushu-së, të organizuara në Pekin, dhe kjo ka shtuar më tej interesin e tij për Vushu-në.

Tani Zhang Bini është shumë i zënë me punën e administrimit të një kompanie të vet, por megjithatë ai nuk heq dorë nga ushtrimi i Vushu-së në kohën e lirë.

Ashtu si Zhang Bini, edhe nënkryetari i Qendrës së Vushu-së në lagjen Niu z. Yang Hongliang e do shumë Vushu-në. Një nga anëtarët e familjes së tij ushtronte mundjen e kombësisë Hui, prandaj që në vogëli ai është brumosur me frymën sportdashëse dhe ëndërronte të mësonte Vushu-në, por vetëm në moshën mbi 20 vjeçare filloi ta ushtronte. Në fillim Yang Hongliangut i dukej se Vushu-ja ishte krejt ndryshe nga ajo që kishte ëndërruar, ishte e lodhshme dhe e thatë, dhe kishte ndër mend të hiqte dorë prej saj. Por pasi përvetësoi ligjet e saj, Yang Hongliang i kuptoi gradualisht të mirat e Vushu-së. Ai i tha korrespondentit:

"Vushu-ja mund të forcojë shëndetin, nëpërmjet ushtrimit të saj jam bërë shumë i fortë fizikisht. Vushuja e ka pasuruar jetën time, i ka kalitur virtytet e mia, me një fjalë kam mësuar shumë prej saj."

Ushtruesit e Vushu-së në lagjen Niu ushtrojnë shpesh një lloj boksi të njohur të kombësisë Hui me emrin "boksi i majmunit të bardhë". Lidhur me këtë boks, nuk mund të mos përmendet krijuesi i Qendrës së Vushu-së në lagjen Niu dhe ushtruesi i njohur i Vushu-së z. Zhang Guizeng, i ati i Zhang Binit dhe mësuesi i Yang Hongliangut të sipërpërmendur. Zhang Guizeng, që ka lindur në lagjen Niu të Pekinit dhe filloi të ushtronte Vushu-në në moshën ll vjeç, është shumë i talentuar, i mençur e këmbëngulës dhe ka arritur suksese shumë të mëdha në qarqet e Vushu-së.

Kur Zhang Guizeng ishte i ri, "boksi i majmunit të bardhë" ishte në humbje e sipër. Brenda 30 vjetëve, ai dhe shokët e tij u bënë vizitë shumë ushtruesve të këtij boksi në krahina të ndryshme. Më në fund ata mësuan të gjitha lëvizjet e boksit dhe i rregulluan sistematikisht, në mënyrë që "boksi i majmunit të bardhë" të marrë pamjen e tij origjinale. Në të njëjtën kohë ai ka shkruar edhe një libër mbi ushtrimin e boksit, duke dhënë një kontribut të madh për trashëgimin dhe zhvillimin e plotë të këtij boksi.

Zhang Guizëng ka pasur shumë nxënës. Ai u ka mësuar "boksin e majmunit të bardhë" jo vetëm vëllezërve të kombësive të ndryshme, por edhe nxënësve nga Japonia, Koreja e Jugut etj. Vitin e kaluar ai u nda prej nesh, por kontributi i tij për përhapjen e shpirtit të Vushu-së vlerësohet nga të gjithë. Nënkryetari i Shoqatës së studimit të "boksit të majmunit të bardhë" pranë Shoqatës së Fizkulturës Vushu të Pekinit z. Zhang Xinbin është gjithashtu nxënës i tij. Zhang Xinbini është nga kombësia Han, por i mësoi të gjitha mjeshtëritë e mësuesit të tij. Atë e merr shumë malli për mësuesin e tij. Ai tha:

"Mësuesi im z. Zhang ka pasur merita të pashlyeshme për çështjen Vushu. Qendra e Vushu-së e krijuar prej tij do të vazhdojë të ekzistojë, dhe "boksi i majmunit të bardhë" do të trashëgohet me siguri."

Sot, i biri dhe nxënësit e tij kanë trashëguar frymën e tij të Vushu-së dhe kanë pranuar gjerësisht nxënës. Si rezultat, kudo në lagjen Niu aktivizohen ushtruesit e Vushu-së dhe në të gjitha garat e mëdha të Vushu-së kanë bërë një paraqitje të mirë.

Përgjegjësja e Zyrës së çështjeve të lagjes Niu zj. Meng Ying i vlerësoi kështu ushtruesit e Vushu-së:

"Ata kanë luajtur rol të madh për zhvillimin dhe trashëgimin e Vushu-së kineze. Në radhë të parë ata kanë dhënë kontribut për lagjen tonë, duke trashëguar dhe çuar përpara Vushu-në dhe kulturën kombëtare."

Vitet e fundit në lagjen Niu kanë ndodhur ndryshime të mëdha, por e pandryshueshmje është Vushuja dhe fryma e saj që trashëgohet brez pas brezi.

Ju flet Radio e Jashtme e Kinës. Të dashur dëgjues, dëgjuat korrespondencën me titull: Ushtruesit e Vushu-së të kombësisë Hui në lagjen Niu të Pekinit. (Pina)