dëgjoni

Nga Lojërat Olimpike të Pekinit, që do të hapen më 8 gusht të vitit 2008, na ndajnë vetëm 2 vjet. Pallatet dhe stadiumet sportive olimpike, si pjesë e rëndësishme përbërëse e punëve përgatitore të Lojërave Olimpike, po ndërtohen normalisht. Komisioni organizativ i Lojërave Olimpike të Pekinit tha ditët e fundit se të gjitha pallatet dhe stadiumet sportive do të përurohen para fundit të vitit 2007. Në programin e sotëm, do t'ju njohim me stadiumin kryesor të Lojërave Olimpike të Pekinit, Stadiumin Kombëtar.

Stadiumi Kombëtar, ku do të organizohen ceremonitë e hapjes dhe të mbylljes të Lojërave Olimpike të Pekinit, quhet "fole" për shkak të pamjes së tij të veçantë. Puna për ndërtimin e "folesë", stadiumi më madhështor në Kinë filloi në fund të vitit 2003 në Parkun Olimpik në veri të zonës urbane të Pekinit. Tani ndërtimi i këtij stadiumi po zhvillohet sipas planit. Zv/inxhinieri i përgjithshëm i kantierit të stadiumit, z. Li Jiulin tha:

"Deri më 15 nëntor të vitit 2005, përfundoi struktura betonarme e vendeve të zbuluara të stadiumit. Qysh nga 15 shtatori i vitit të kaluar, filloi puna për ndërtimin e strukturës së çeliktë të çatisë dhe tani ka përfunduar 80% e të gjithë veprës. E gjithë vepra parashikohet të përfundojë në fund të këtij viti. Puna jonë përputhet me kërkesën e planit të përgjithshëm si dhe me cakun kohor të Komisionit organizativ të Lojërave Olimpike të Pekinit."

Tani, "foleja" madhështore është shfaqur përpara syrit tonë. Çatia me strukturën e çeliktë të ndërlikuar, me ngjyrën origjinale të çelikut, shpreh madhështi. Z. Li tha se më poshtë ndërtuesit do të saldojnë së bashku disa pjesë të strukturës kolosale të çeliktë dhe do të bëjnë në trajtë të plotë elipse. Krahas këtyre, ndërtuesit do ta mbulojnë skeletin e çeliktë me një "veshje" të tejdukshme, duke mbrojtur shikuesit në stadium nga era dhe shiu. Kjo "veshje", sipas termit ndogjisë, quhet "cipë", dhe është një lloj materiali me teknologji të lartë. Ky material, që i ngjan xhamit ose plastikës, mund të lejojë rrezet e diellit dhe ajrin të hyjnë brenda dhe njëkohësisht të pengojë ujin dhe pluhurin. Ky material përdoret rrallë në botë. Ndër objektet ekzistuese, vetëm në Stadiumin allianz Arena i ndërtuar për Kupën e Botës në Mynih u përdor një material i përafërt me këtë "cipë".

Stadiumi allianz Arena në Mynih

Në fakt, ndërtimi i "folesë" karakterizohet nga përdorimi i një numri të madh teknologjish të reja, materialesh të reja dhe kriteresh të reja. Z. Li tha se për kryerjen e një vepre me vëllim aq të madh, me teknologji aq të ndërlikuar dhe me afat aq të shkurtër ndërtimi, vëshirësitë janë të shumta.

"Së pari, projektimi i arkitekturës është i veçantë dhe gjatë ndërtimit, përdoren shumë teknologji të reja, si struktura e çeliktë, struktura e "cipës" etj., të cilat na kanë sjellë shumë probleme të vështira inxhinierike, ndërsa nuk kemi asnjë përvojë nga e cila të mësojmë. Së dyti, projektimi i veçantë e kalon sferën e kritereve ekzistuese teknike, prandaj gjatë procesit të projektimit, ndërtimit dhe kontrollit nuk gjejmë dot bazën e standardeve."

Kështu, procesi i ndërtimit të "folesë" madhështore është bërë një proces i zgjidhjes së vështirësive njëra pas tjetrës, duke e shndërruar "folenë" nga projekti në objektin me çelik dhe betonarme.

Ky proces mbart shumë të reja të krijuara në mënyrë të pavarur nga kinezët. Për shufrat e hekurit të "folesë" duhen 42 mijë tonë çelik, të cilët jo vetëm prodhohen plotësisht nga vetë Kina, por një lloj pllake çeliku është edhe materiali më i fortë në historinë e arkitekturës botërore. Kjo lloj pllake çeliku, tepër e thellë dhe tepër e fortë, mund të mbajë një peshë prej 46 kilogramësh për një milimetër katror.

Pas përurimit, "foleja" që mund të mbajë 91 mijë shikues, do të jetë stadiumi numër 1 i Kinës për sa i përket përmasave.

Mund të parashikojmë se me hapjen e Lojërave Olimpike të Pekinit, edhe "foleja" vetë do të bëhet fokusi i botës dhe një tjetër objekt simbol i qytetit të Pekinit. (Wang Lei)