dëgjoni

Këto ditë po organizohet në Pekin edicioni i 3-të i Festivalit Artistik të Pakicave Kombëtare të Kinës, ku marrin pjesë më se 3000 artistë të ardhur nga 56 pakica kombëtare të Kinës. Në këtë festival, fokusi që ka tërhequr më shumë vëmendjen e spektatorëve është bërë interpretimi i këngëve në stilin popullor burimor të papërpunuar.

Do të dëgjoni tani reportazhin me titull: "Interpretimi i këngëve në stilin popullor burimor të papërpunuar është bërë një fokus i Festivalit Artistik të Pakicave Kombëtare të Kinës".

Në ceremoninë e hapjes së këtij festivali, më se 1200 artistë të pakicave kombëtare dhuruan një mbrëmje të larmishme në Pallatin e Madh të Popullit në Pekin. Në këtë mbrëmje me titull: "Kina e harmonishme" u përmblodhën programe të shquara të këtij festivali artistik të pakicave kombëtare të Kinës duke demonstruar në mënyrë të përqendruar sukseset e viteve të fundit të pakicave kombëtare në zbulimin, mbrojtjen dhe trashëgimin e kulturës dhe artit të tyre.

Kënga që po dëgjoni titullohet " Lulet e diellit", ku interpretuan së bashku artistët e të 56 kombësive të ndryshme të veshur me kostumet e tyre shumëngjyrëshe karakteristike të kombësive.

Ky festival është organizuar nga Komiteti Shtetëror i Pakicave Kombëtare i Kinës, Ministria e Kulturës, Drejtoria e Përgjithshme e Radio-Film-Televizionit të Kinës dhe Bashkia e qytetit të Pekinit dhe do të zgjatë 20 ditë. Në konkursin kombëtar të këngëtarëve të rinj të organizuar këtë vit nga Televizioni Qendror i Kinës, interpretimi i këngëve në stilin popullor burimor të papërpunuar tërhoqi më shumë vëmendjen e spektatorëve dhe u bë fokus i vëmendjes së qarqeve të ndryshme shoqërore. Edhe në këtë festival, programet me këngë të interpretuara në stilin popullor burimor të papërpunuar kanë tërhequr edhe një herë vëmendjen e spektatorëve.

Kënga që po dëgjoni është një këngë madhështore e kombësisë tong interpretuar nga grupi i këngëtarëve fshatarë , e quajtur "Kënga e gjinkallave". Kjo është një këngë korale e interpretuar në zëra të ndryshëm, e përhapur prej kohësh në gjirin e banorëve të kombësisë tong. Në këtë këngë, me imitimin e zërit të gjinkallave, pasqyrohet dëshira e bukur e banorëve të kombësisë Tong për të bashkekzistuar në harmoni me natyrën. Këngëtari fshatar Wu Shiying, një nga interpretuesit e kësaj kënge, tha: "Ne këndojmë shpesh gjatë punës. Pavarësisht çfarë punë po bëjmë, ne e shoqërojmë atë me këngë duke shprehur ndjenjat tona".

Zv-drejtori i Drejtorisë së Kulturës të provincës Guizhou Zhang Baolin tha se programi i përgatitur nga provinca Guizhou "Era shumëngjyrëshe e Guizhout" pasqyron me anën e këngëve dhe valleve zakonet e doket e kombësive miao, tong, qilao e tujia të provincës Guizhou dhe synon të bëjë të njohur me anën e kësaj mbrëmjeje artistike provincën Guizhou.

Nëndrejtori i Komitetit Shtetëror të Pakicave Kombëtare, nëndrejtori ekzekutiv i këtij festivali artistik të pakicave kombëtare, Dondrup Wangboin, tha se qeveria kineze e ka përfshirë festivalin artistik të pakicave kombëtare në ligjin shtetëror. Pjesëmarrja e shumë programeve me interpretime këngësh në stilin burimor të papërpunuar tregon rëndësinë e që i ka kushtuar shteti mbrojtjes së kulturës së pakicave kombëtare. Ai tha : "Ndër programet artistike të këtij festivali, përveç programeve me interpretime këngësh në stilin burimor të papërpunuar që kanë tërhequr shumë vëmendjen e spektatorëve, ka edhe këngë e valle të bukura folklorike dhe popullore. Ne pamë edhe një valle tibetiane shumë ritmike të interpretuar nga 96 fshatarë të distriktit Lazi."

Pjesa që po dëgjoni është kënga e shoqëruar me vegla muzikore me 6 tela "Pranvera me këngë", interpretuar nga 6 artistë tibetianë. Ata duke kërcyer me emocion vallen e tap, tapit duke interpretuar me vegla muzikore me 6 tela, u pritën me duartrokitjet ritmike dhe brohoritjet e spektatorëve.

Zv-drejtori i Drejtorisë së Kulturës të Rajonit autonom të Tibetit Cha Shi Do Ge tha:"Vetë Tibeti është një det i këngëve dhe valleve. Po thuajse të gjithë njerëzit mund të këndojnë dhe të kërcejnë. Në Tibet, Lazi është një vend me karakteristika të veçanta, atje interpretimi i këngës i shoqëruar me instrumentin me 6 tela është shumë i përhapur, Po thuajse të gjithë banorët e atjeshëm dinë të interpretojnë në veglën muzikore me 6 tela, të këndojnë e të kërcejnë. "

Pjesa që po dëgjoni është një lloj arti vokal që quhet "Humai", d.m th një këngëtar mund të këndojë njëkohësisht me dy zëra. Kjo është një lloj i rrallë interpretimi. Kina është një vend me shumë kombësi, të 56 kombësitë e Kinës kanë kulturën e tyre të shkëlqyer. Përveç programeve të sipërpërmendura, në këtë festival janë shfaqur ose do të shfaqen edhe programe të tjera me interpretime këngëve burimore të papërpunuara, si "Huaer" të kombësisë hui të Ninxias, "Këngë fluturake" të kombësisë miao etj. Pra, programet me interpretime këngësh në stilin burimor të papërpunuar i kanë pasuruar përmbajtjet e këtij festivali. ( Zhai)