dëgjoni

Në mbi 200 filma të xhiruar çdo vit në Kinë, ka vetëm pak filma që xhirohen nga prodhues të pavarur. Këta prodhues të pavarur të filmit i mbledhin vetë paratë e xhirimit dhe i shfaqin vetë filmat. Pak kohë më parë, bashkëshortët Yan Bo e Mei Ting xhiruan një film të tillë të quajtur "Aspirina".

Mei Ting është një aktore e re e famshme kineze që ka luajtur role kryesore në shumë filma e drama televizive të përshëndetur nga shikuesit. Në filmin "Aspirina" të xhiruar në bashkëpunim me bashkëshortin e saj Yan Bo, Mei Ting u bë për herë të parë prodhuese e filmit. Ajo ishte gjithashtu edhe aktorja kryesore, kurse Yan Bo ishte regjisori i filmit. Për të xhiruar këtë film, bashkëshortët harxhuan të gjitha kursimet e tyre. Mei Ting tha:

"Neve të dyve na pëlqen shumë filmi dhe kishim gjithmonë dëshirë të xhironin një film tonin. Por ishte e vështirë të gjenim fondet e mjaftueshme, prandaj vendosëm të xhirojmë filmin 'Aspirina' me paratë tona."

Para përfundimit të xhirimit të filmit, ata i harxhuan të gjitha paratë. Mei Ting luajti në një dramë televizive dhe i përdori shpërblimet për të vazhduar xhirimin. Mei Ting tha se filmi është një interes i përbashkët i të dy bashkëshortëve prandaj është një gjë e gëzueshme që ata t'i harxhojnë të gjitha paratë në këtë çështje.

Yan Bo studioi art për 8 vjet në Francë. Xhirimi i filmit është ëndrra shumëvjeçare e tij. Kjo është hera e parë që ai është regjisor filmi. Duke folur për filmin "Aspirina", Yan Bo tha:

"Ky është një film që përshkruan jetën moderne në qytet. Personazhi kryesor i filmit ka përshtypje të ndërlikuara për dashurinë. Shpresoj që filmi të pasqyrojë mendimet e vërteta të qytetarëve modernë për dashurinë."

Pasi interpretoi një grua që keqtrajtohet nga i shoqi në dramën televizive "Mos bisedo me njerëzit e panjohur", shikuesit janë të mendimit se Mei Ting është e përshtatshme të interpretojë personazhin e dobët. Kurse në filmin "Aspirina", Mei Ting interpreton një gazetare të modës që kërkon dashurinë e vërtetë. Duhet të thuhet se personazhi i interpretuar nga Mei Ting përfaqëson shumicën e femrave të reja moderne kineze të qytetit.

Duke folur për bashkëpunimin me bashkëshortin, Mei Ting tha se megjithëse janë bashkëshortë, ata grindeshin shpesh për probleme artistike gjatë xhirimit. Por nëpërmjet shkëmbimit të mendimeve, ata mund të zgjidhin mirë mosmarrëveshjet.

Filmi "Aspirina" ka rëndësi të veçantë për bashkëshortët Yan Bo e Mei Ting. Ata filluan ta përgatisin këtë film kur ishin të dashuruar. Në vitin e 4-t pas martesës, ata e mbaruan më në fund xhirimin. Gjatë xhirimit të filmit, ata përballuan presion të madh jo vetëm nga ana artistike, por edhe nga ana ekonomike. Yan Bo tha:

"Është një gjë e vështirë të xhirosh një film, veçanërisht për ne prodhuesit e pavarur të filmit. Gjatë xhirimit, mjaft miq na ndihmuan shumë. Jam i mendimit se qeveria duhet të ndihmojë më tej regjisorët e rinj dhe filmat vendës."

Pas shfaqjes, filmi "Aspirina" ka tërhequr shumë shikues të rinj veçanërisht femra të reja, por të ardhurat nuk janë shumë të mira. Megjithatë Yan Bo dhe Mei Ting nuk pendohen fare për xhirimin e këtij filmi, sepse kjo është një përvojë e bukur dhe është interesi i përbashkët i tyre.

Tani Mei Ting po luan rolin kryesor në dramën televizive "Lumturia", kurse Yan Bo po përgatit filmin e ri të tij. Mei Ting shpreson se filmi i ri do të ketë sukses. (Fani)