dëgjoni

 Nga 12 deri më 23 shtator u zhvillua në Sao Paulo të Brazilit Kampionati i 15-të Botëror i Basketbollit të Femrave. Në këtë kampionat, ekipi kinez nuk përmbushi objektivin e parashikuar, që të përfshihej në 8 ekipet më të forta. Mirëpo, këtij ekip të ri me moshë mesatare 23-vjeçare, ndeshjet e këtij kampionati i dhanë përvojë të çmuar. Do të dëgjoni tani një reportazh të hollësishëm.

Si veprimtaria e nivelit më të lartë e basketbollit të femrave, në Kampionatin Botëror u mblodhën ekipe të forta nga kontinente të ndryshme. Për ekipin kinez, që mori pjesë në këtë kampionat si kampion i Azisë, nuk ishte fat që u ra në një grup së bashku me ekipin amerikan, që u shpall kampion dy kampionatet e kaluara, me ekipin rus, që radhitet në vendin e dytë të botës dhe me ekipin e Nigerisë, kampion i Afrikës. Ky grupim solli vështirësitë e basketbollisteve kineze në ndeshjet në grup: në ndeshjen e parë, ato u mundën nga ekipi amerikan me një diferencë të madhe, 72:119; në ndeshjen e dytë me ekipin e Rusisë, ato humbën përsëri me rezultatin 66:86; ndërsa në ndeshjen e fundit të grupit, ato fituan me ekipin e Nigerisë me rezultatin 71:59. Kështu ekipi kinez u kualifikua për në ndeshjet pasgrupore, si vendi i tretë i grupit. Në ndeshjen e parë pasgrupore, ekipi kinez nuk e përballoi ekipin çek dhe u mund me rezultatin 73:79; në ndeshjen e dytë, fitoi me vështirësi me ekipin kubanez me rezultatin 73:70; ndërsa në ndeshjen e tretë me ekipin francez, ekipi kinez duhej të fitonte me të paktën 15 pikë diferencë, që të kualifikohej për në tetëshe. Mirëpo me gjithë dëshirën, ekipi kinez mundi ekipin francez me rezultatin 66:64, vetëm dy pikë më shumë dhe si pasojë, ekipi francez siguroi kualifikimin.

Fitoi ndeshjen, por nuk arriti të kualifikohej, në këtë mënyrë ekipi kinez i basketbollit të femrave humbi rastin për të hyrë në 8 ekipet më të forta të Kampionatit Botëror. Megjithatë, basketbollistet kineze nuk humbën besimin. Ato u shprehën se në këtë kampionat fituan shumë përvojë dhe vetëbesim. Qendërsulmuesja e ekipit kinez, Cheng Xiaoli shprehu mendimin se përplasja me ekipet amerikane, ruse dhe çeke demonstroi disnivelin e ekipit kinez me ekipet e forta në botë.

"P.sh., në kapjen e topit të kthyer nga tabela,nga njëra anë, sigurisht jemi të dobëta në forcë në krahasim me ekipet e forta evropiane dhe amerikane; nga ana tjetër, nuk jemi të përsosura edhe në teknikë e lëvizje."

Mbrojtësja Miao Lijie u shpreh se megjithëse ka marrë pjesë 3 herë në këtë veprimtari, nuk ka hasur në të kaluarën asnjë ndeshje më të ashpër se ajo me ekipin francez në këtë kampionat, ku fitorja dhe humbja u vendosën vetëm nga një top.

Në fakt, moskualifikimi në 8 ekipet më të forta të këtij kampionati nuk u shkaktua nga paraqitja jo e mirë e ekipit kinez, por nga potenciali më i madh se ai i ekipit kinez i ekipeve të tjera. Nënkryetari i parë i Shoqatës së Basketbollit të Kinës, z. Li Yuan Wei, që vëzhgoi kontrolloi ekipin kinez në stadium, u shpreh se megjithëse u dëshpërua pak a shumë për rezultatin, prapësëprapë ishte i kënaqur për paraqitjen e vajzave kineze në ndeshje.

"Nga ky kampionat del se në minimum ekipi ynë mund të luftojë kundër ekipeve të këtij kampionati nga vendi e 4-t deri në vendin e 9-të. Ky është një përparim i dukshëm. Ekipi ynë u paraqit mirë në aftësinë tërësore të sulmit dhe të mbrojtjes. Mendoj se ky është një ekip me të ardhme."

Edhe trajneri kryesor i ekipit kinez të basketbollit të femrave, australiani Tom Maher, gjeti shpresë në rezultatin jo të mirë. Ai shprehu mendimin se loja si i barabartë me ekipet e forta, si ekipi francez dhe ai kubanez, tregon se ekipi kinez ka arritur në një nivel të konsiderueshëm dhe s'ka përse të ketë turp. Ai është i mendimit se një nga synimet kryesore të pjesëmarrjes së ekipit kinez në këtë kampionat është fitimi i përvojës në gara të mëdha dhe veçanërisht në kundërvënie me ekipe të forta. Tani mund të thuhet se ky synim u realizua.

"Me zhvillimin e ndeshjeve, përparimet tona ishin të dukshme. Për lojtaret tona të reja, kjo është një përvojë e jashtëzaonshme. P.sh. në ndeshjen me ekipin francez, ato mësuan si të përballonin presionin e pa parë në ligën brenda vendit. Ato mësuan edhe si të kontrollojnë ritmin e ndeshjes, si të ruajnë epërsinë deri në fund të ndeshjes, si t'i detyrojnë kundërshtarët të mos e dorëzojnë lehtë topin. Prandaj i uroj anëtaret e ekipit tim, jo vetëm për përpjekjet e tyre gjatë 6 muajve të kaluar, por edhe për pjekurinë e tyre të treguar gjatë javës së kaluar, që nuk e kisha parashikuar aspak."

Nëpërmjet këtij kampionati, ekipi kinez zbuloi edhe disa probleme, si dobësinë fizike në përballjen me ekipet evropiane dhe amerikane, ngadalësinë në pasimin e topit, në qarkullimin dhe gjuajtjen e topit etj. Nënkryetari i parë i Shoqatës së Basketbollit të Kinës, z. Li Yuan Wei vuri në dukje se një nga të metat e ekipit kinez në këtë kampionat është mungesa e talenteve në disa pozicione. Mirëpo, ai ra dakord me mendimet e trajnerit kryesor Maher, që ky kampionat ka vlerë të madhe për stërvitjen e ekipit dhe për fitimin e përvojës në përgatitje për Lojërat Olimpike 2008. (Wang Lei)