dëgjoni

Në programin e sotëm muzikor do t'ju paraqit një grup këngësh popullore kineze të kënduara nga tenori i njohur kinez Wei Jindong. Së pari ju ftoj të dëgjoni këngën "Kënga harrohet po të mos e këndoj".

Kënga që po ndiqni, është një këngë popullore e provincës Guizhou, me titull "Kënga harrohet po të mos e këndoj", kënduar nga Wei Jindong dhe Xiao Mei. Kjo është një këngë humoristike e kombësisë buyi të Kinës jugperëndimore.

Wei Jindong ka lindur në qytetin e Pekinit dhe i pëlqente të këndonte që në vogëli. Pasi u diplomua në vitin 1978 në shkollën artistike të Pekinit, ai mori rrugën artistike. Në vitin 1986 ai hyri në Ansamblin e Këngëve dhe Valleve të Pekinit si këngëtar solo. Në vitin 1989, pas konkursit, ai u pranua në Konservatorin Qendror të Kinës për të studiuar muzikë vokale, ku kishte mësues këngëtarin e njohur Li Shuangjiang. Në vitin 1993 ai hyri në Ansamblin artistik kinez të Radios, duke u aktivizuar në skenë dhe në programet radio-televizive.

Wei Jindong ka zë të ëmbël dhe timbër të gjerë me forcë të madhe shprehëse. Ai këndon me ndjenja të përzemërta e të thjeshta, i kupton në mënyrë të veçantë këngët popullore dhe është i aftë të këndojë në duet.

Kënga që po dëgjoni, titullohet "Vajza Huang Sijie", kënduar nga Wei Jindong dhe Meng Ge. Kjo këngë humoristike shpreh ndjenjat e pastra midis vajzës së bukur Huang Sijie dhe shitësit shëtitës, nëpërmjet pyetje-përgjigjeve.

Që nga fillimi i viteve '90, Wei Jindong fitoi shumë çmime në konkurse të ndryshme kombëtare të muzikës vokale. Në vitin 1996 ai u vlerësua nga Radio Popullore Qendrore e Kinës si "këngëtari më i mirëpritur nga dëgjuesit". Shumë këngë popullore të kënduara prej tij janë pritur shumë mirë nga dëgjuesit. Le të shijojmë tani këngën popullore të Singjiangut "Vajza e bukur", e kënduar prej tij.

"Kam parë mijëra vajza të bukura, por vetëm ti je më e dashura. Je si dielli i mëngjesit me freski të pakrahasueshme. Oh, vajzë, je më e bukur se lulet me vesë. Shumë njerëz në botë të mendojnë ty."

Në fund të programit ju ftoj të shijoni "Këngën e dashurisë Guiyang", kënduar nga Wei Jindong dhe Wu Bixia. Kjo këngë dashurie me melodi të lartë është shumë e përhapur në provincën Guizhou të Kinës jugperëndimore. (Pina)