dëgjoni

Në Festivalin e 63-të të Filmit të Venecies që u mbyll pak kohë më parë, regjisori i ri kinez Jia Zhangke fitoi çmimin "Luani i artë" për filmin më të mirë me filmin "Njerëz të mirë në Sanxia". Ai është regjisori i 5-të kinez që fiton çmimin "Luani i artë".

Filmi "Njerëz të mirë në Sanxia" përbëhet nga dy tregime dashurie që zhvillohen në një qytezë në zonën Sanxia të lumit Jance. Për shkak të thellimit të njohjes, dy çifte të rinjsh u lidhën në martesë ose u ndanë. Në konferencën e shtypit të organizuar pas ceremonisë së dhënies së çmimeve, kryetarja e komisionit përzgjedhës e vlerësues të këtij festivali, aktorja e famshme franceze Katherine Deneuve tha: "Të gjithë anëtarët e komisionit përzgjedhës e vlerësues u habitën nga bukuria e panoramave në film dhe u prekën nga tregimet e filmit. Ky është një film shumë i veçantë."

36-vjeçari Jia Zhangke lindi në kontenë Fenyang të provincës Shanxi të Kinës veriore. Babai i tij është mësues në shkollë të mesme, ndërsa nëna është një shitëse dyqani. Kur ishte në shkollë të mesme, Jia Zhangkesë filloi t'i pëlqente arti. Në vitin 1993, Jia Zhangke filloi studimet në Universitetin e Filmit të Pekinit. Pas 3 vjetëve, ai filloi të xhirojë film. Deri tani, Jia Zhangke ka xhiruar 5 filma, ndër të cilët filmi "Platformë" i xhiruar në vitin 2000, filmi "Bota" i vitit 2004 dhe filmi "Njerëz të mirë në Sanxia" kanë marrë pjesë në konkurrim në Festivalin e Filmit të Venecies.

Në fakt, kur sapo kishte ardhur në Pekin, Jia Zhangke nuk mësohej dot fare me jetën në qytetin e madh. Filmi i tij "Bota" përshkruan jetën e shumë të rinjve të ardhur nga krahinat e ndryshme që punojnë në Pekin. Jia Zhangke tha se ai është një prej tyre. Ai tha:

"Gjatë procesit të urbanizimit, veçanërisht pasi Pekini fitoi të drejtën për organizimin e Lojërave Olimpike të vitit 2008, shumë njerëz kanë ardhur në Pekin për të punuar. Në vitin 1993 unë u largova nga vendlindja dhe erdha në Pekin. Filmi 'Bota' pasqyron pikërisht problemet, presionin, gëzimet, hidhërimet etj. e këtyre njerëzve që punojnë në Pekin."

Shumica e filmave të Jia Zhangkesë janë xhiruar në mënyrë dokumentare për të pasqyruar gjendjen e vërtetë të jetës së banorëve të thjeshtë kinezë. Ai përdor zakonisht aktorë amatorë për të luajtur në filmat e tij. Filmi i parë i Jia Zhangkesë "Xiao Wu" përshkruan jetën e vërtetë të të rinjve në vendlindjen e tij. Ky film fitoi çmim në Festivalin e 48-të të Filmit të Berlinit. Revista franceze "Filmi" e vlerësoi kështu filmin "Xiao Wu": "Ky film ka thyer rregullat e filmit kinez dhe shënon gjallërinë e filmave modernë kinezë". Edhe filmi "Njerëz të mirë në Sanxia" u xhirua në mënyrë dokumentare, aktori kryesor i filmit Han Sanming është një punëtor në një minierë qymyrguri. Jia Zhangke tha:

"Më pëlqen shumë filmi dokumentar. Shpresoj se filmat e mi mund të pasqyrojnë gjendjen e natyrshme të shoqërisë, prandaj dua të përdor aktorë amatorë, interpretimi i tyre është më i natyrshëm."

Në fillim, Jia Zhangke shkoi në zonën Sanxia për të xhiruar filmin dokumentar "Dong" që pasqyron ndryshimin e jetës së banorëve vendës. Gjatë xhirimit, Jia Zhangke zbuloi shumë tregime interesante, ndajai vendosi të xhirojë një film për të përshkruar jetën e njerëzve në këtë zonë. Kështu lindi filmi "Njerëz të mirë në Sanxia".

Në qarqet e filmit kinez, Jia Zhangke dhe regjisorë të tjerë mbi 30-vjeçarë quhen "regjisorët e brezit të 6-të". Filmat e tyre përballen me provën e tregut. Megjithatë, Jia Zhangke këmbëngul në pasqyrimin e gjendjes reale të shoqërisë kineze dhe të ndjenjave të banorëve të thjeshtë. Jia Zhangke tha:

"Veprat e regjisorëve të rinj kinezë duhet t'u kushtojnë vëmendje problemeve shoqërore. Vetëm kështu këto vepra do të kenë vlerë artistike." (Fani)