dëgjoni

Ditët e fundit përfundoi në Pekin Kampionati Botëror i Bejsbollit të Femrave, gara e parë eksperimentale në Pekin për Lojërat Olimpike 2008. Ky kampionat, që u zhvillua plotësisht sipas modelit të funksionimit të Lojërave Olimpike të Pekinit, e kaloi provën dhe u kurorëzua me sukses.

Si e para garë eksperimentale në Pekin për Lojërat Olimpike, mënyra efikase e funksionimit, e krijuar në këtë kampionat, do të japë përvojë për Lojërat Olimpike 2008, kur do të zhvillohen gara njëkohësisht në dhjetëra pallate e stadiume sportive. Kjo mënyrë e funksionimit quhet "grupi i pallateve e stadiumeve olimpike". Të gjithë anëtarët e grupit, të ardhur nga 24 sektorë pranë Komisionit Organizativ të Lojërave Olimpike të Pekinit, mbajtën përgjegjësi përkatësisht për punët e ndeshjeve, pajisjet e pallateve e stadiumeve, garantimin e sigurisë, mediat etj. Ata koordinuan me njëri-tjetrin sipas kërkesave të Lojërave Olimpike, në mënyrë që të garantojnë sigurinë e plotë të funksionimit të Lojërave Olimpike të Pekinit. Nënkryetari ekzekutiv i Komisionit Organizativ të Lojërave Olimpike të Pekinit, z. Yang Shuan, tha:

"Punët organizative për Lojërat Olimpike, si veprimtari tepër e madhe sportive, janë një vepër e ndërlikuar sistematike, që kërkon pjesëmarrjen e shumë palëve dhe integrimin e shumë sistemeve. Garat eksperimentale kanë për qëllim që kontrollohet funksionimi i sistemeve dhe hallkave të ndryshme dhe të gjenden pikat për t'u përmirësuar dhe përsosur."

Për çdo veprimtari të madhe, siguria ka shumë rëndësi. Gjatë këtij kampionati botëror të Bejsbollit të femrave, punët e garantimit të sigurisë u karakterizuan nga shërbimet humanitare dhe teknologjia e lartë. Në tribunën e shikuesve, nuk u panë policë me uniformë, ata u zëvendësuan nga roja me veshje civile dhe vullnetarë. Numri i këtyre rojave dhe vullnetarëve zuri 2/3 të numrit të përgjithshëm të punonjësve në stadiumin sportiv. Në qendrën e kontrollit dhe të drejtimit të stadiumit, nëpërmjet 189 videokamerave, mund të shihej në ekranin e madh pothuaj se çdo kënd i stadiumit dhe i zonës rreth stadiumit me rreze prej 200 metrash. Në hyrjen e stadiumit ishte vendosur edhe sistemi i dallimit të fytyrave, gjë që është mishërimi i teknologjisë së lartë dhe gjithashtu mishërimi i shërbimit humanitar. Zv/drejtori i Degës së Fengtai-t të Drejtorisë së Sigurimit Publik të Pekinit, Jia Fuqing, që përgjigjet për punët e sigurisë të garave të bejsbollit për femra, tha:

"Sistemi i kontrollit me videokamera, sistemi i dallimit të fytyrave dhe sistemi i kontrollit të makinave na kanë dhënë shumë përkrahje teknike në garantimin e sigurimit. Këto sisteme shmangin kontaktet e drejtpërdrejta të policëve dhe rojave me shikuesit, kështu që gjatë ndeshjeve shikuesit mund të ndiejnë më shumë gëzim, harmoni dhe lehtësi."

Në këtë kampionat të bejsbollit të femrave, morën pjesë 16 ekipe. Strehimi dhe ushqimi i mbi 500 sportisteve, trajnerëve dhe funksionarëve ishte një problem i madh. Për shkak se ekipe të ndryshme kishin ndeshje në kohë të ndryshme, hotelet ku ishin vendosur sportistët i furnizuan me ushqime sipas kohëve të tyre. Këto ushqime të shijshme, të miratuara nga Komisioni Organizativ i Lojërave Olimpike të Pekinit, i kënaqën shumë sportistet me shijet e kombinuara të stilit lindor me atë perëndimor. Krahas ushqimeve, komiteti organizativ i tregoi kujdes të madh për shëndetin e sportisteve. Në hotele u vendosën edhe pajisje të ndihmës së shpejtë, si aparati i frymëmarrjes etj. Jashtë hoteleve dhe stadiumit, autoambulanca ishin gati 24 orë në ditë për t'u futur në punë. Gjatë këtij kampionati, hotelet ku qëndruan sportistet ishin afër stadiumit dhe duheshin vetëm 20 minuta me makinë nga hoteli në stadium, gjë që ishte në të mirë të pushimit të sportisteve.

Për një veprimtari të madhe sportive, shenjat e qarta rrugore afër stadiumeve janë shumë të rëndësishme. Gjatë rrugës për në stadiumin ku u zhvilluan ndeshjet e bejsbollit të femrave, komiteti organizativ i kampionatit kishte vendosur shumë shenja treguese. Megjithëse shoferët e posaçëm për kampionat i njihnin këto shenja, për shikuesit ato nuk ishin shumë të qarta dhe instalimet e komunikacionit nuk ishin mjaft të lehta. Disa shikues paraqitën vërejtje se në përgjigje të propozimit të komitetit organizativ, ata erdhën në stadium me autobus ose taksi, por pas ndeshjeve ishte e vështirë të gjenin taksi dhe stacione autobusësh. Këto elemente negative ndikuan në nismën e banorëve për shikimin e ndeshjeve në stadium.

Lidhur me këtë, nënkryetari ekzekutiv i Komisionit Organizativ të Lojërave Olimpike të Pekinit Yang Shuan tha se deri në vitin 2008, gjendja e komunikacionit publik të Pekinit do të përmirësohet shumë.

"Kemi një plan strategjik për shërbimin e komunikacionit të Pekinit. Sipas këtij plani, do të shënojmë disa korsi të posaçme olimpike në rrugët kryesore për në pallatet e stadiumet sportive. Kam besim të plotë që pas dy vjetëve punët tona do të jenë më të përsosura se tani."

Në përgjithësi, punët organizative të Kampionatit Botëror të Bejsbollit të Femrave u vlerësuan lart nga Federata Ndërkombëtare e Bejsbollit të Femrave dhe nga grupi vëzhgues i Komitetit Olimpik Ndërkombëtar. Kryetari i kësaj federate, z. Don Porter tha:

"Është një kënaqësi e madhe që Federata Ndërkombëtare e Bejzbollit të Femrave erdhi në Pekin dhe zhvilloi kampionat në stadiumin ku do të zhvillohen ndeshjet olimpike. Gjatë 6 ditëve të kaluara, inspektuam instalimet e stadiumit si dhe funksionimin e tyre. Jam shumë i kënaqur për të gjitha ato që pashë."

Para zhvillimit të Lojërave Olimpike të Pekinit, do të zhvillohen me radhë edhe mbi 40 gara eksperimentale, për të kontrolluar instalimet e pallateve e stadiumeve sportive si dhe funksionimin e tyre, në mënyrë që të zhvillohen të sigurta Lojërat Olimpike dhe Lojërat Paralimpike në Pekin. (Wang Lei)