dëgjoni

Nga 9 deri më 24 shtator zhvillohet në Pekin turneu i tenisit "China Open". Ky është turneu e tenisit profesionist i nivelit më të lartë në Kinë, krahas turneut të "Kupës së Mjeshtërve" të ATP-së. Sivjet zhvillohet për herën e 3-të në Pekin turneu "China Open". Pavarësisht nga shumë vështirësi, kjo veprimtari e re ndërkombëtare ndjek prirjen e rritjes së shpejtë. 

Sipas përcaktimit të ATP-së dhe të WTA-së, dy organizata drejtuese për turnetë e tenisit profesionist përkatësisht për meshkuj dhe për femra, "China Open" klasifikohet si turne i shkallës së dytë i ATP-së dhe turne i shkallës së tretë i WTA-së. Me zhvillimin 3-vjeçar, niveli i këtij turneu është ngritur shpejt. Menaxheri i përgjithshëm i këtij turneu, z. Zhang Junhui, shprehu mendimin se përparimet e "China Open" mishërohen në anë të ndryshme. Në radhë të parë, kompania e funksionimit të turneut u bë nga një ndërmarrje me investime plotësisht të huaja në kompaninë me aksione të kontrolluara nga pala kineze. Së dyti, gjithnjë e më shumë ndërmarrje kineze janë bërë sponsorë të kësaj gare. Para 3 vjetëve, të gjithë sponsorët e kësaj gare ishin të huaj, ndërsa sot marrin pjesë shumë ndërmarrje të fuqishme kineze, si "Lenovo", partnerja globale e Komitetit Olimpik Ndërkombëtar, Birra "Tsingdao", sponsori i Lojërave Olimpike të Pekinit etj. Për turnetë e tenisit profesionist, pjesëmarrja e sponsorëve vendorë dhe të fuqishëm është një gjë shumë e mirë. Së treti, edhe mediat tregojnë sivjet më shumë vëmendje për "China Open". Edhe potenciali i tenistëve pjesëmarrës dhe niveli i shikuesve janë ngritur.

"China Open" zhvillohet fill pas turneut "American Open", turneut të fundit të garave të "Titullit të Madh", gjë që pengon pjesëmarrjen e disa tenistëve të shquar në këtë garë në Kinë. Këtë vit u ftuan për të marrë pjesë disa tenistë të fortë, si Nadal, kampioni i turneut "French Open" Nalbandian, kampioni i garës së kaluar të "Kupës së Mjeshtërve" dhe tenistja e njohur belge Henin. Mirëpo, për shkak të dëmtimeve fizike dhe për arsye të tjera, ata hoqën dorë nga ky turne. Z. Zhang Junhui tha se në fillim ai ishte i shqetësuar për tërheqjen e këtyre yjeve, sepse kjo mund të ndikonte në entuziazmin e shikuesve. Por në të vërtetë kjo nuk ndodhi në realitet. Kjo tregon se shikuesit kinezë të tenisit gradualisht janë bërë më të pjekur.

"Ndonjëri kishte frikë se mungesa e Nadalit dhe Nalbandianit do të ndikonte mbi 'China Open', por në fakt mjaft tenistë të tjerë të shquar kanë shumë dëshirë që të marrin pjesë në këtë turne. Fokusi ynë nuk përqendrohet më vetëm në një yll, duke mos përfillur paraqitjen e tij. Kësaj here, potenciali dhe cilësia e tenistëve pjesëmarrës në 'China Open' janë më të lartë se ato të turneve të tjera të të njëjtit nivel në botë."

Pavarësisht nga mungesa e disa yjeve, këtë vit marrin pjesë në "China Open" shumë tenistë të nivelit të lartë. Kryeekzekutivi i ATP-së Drevit vuri në dukje se disa lojtarë të shquar, që klasifikohen në 10 vendet e para të ATP-së, marrin pjesë në këtë garë, si Ljubiciç i Kroacisë, Baghdatis i Qipros, Davidenko i Rusisë etj.

Në ndeshjet e femrave, marrin pjesë më shumë teniste me potencial, si francezja Mauresmo, e klasifikuar si vendi i parë i WTA-së, etj. Edhe tenistet e njohura kineze si çift Zheng Jie/ Yan Zi dhe tenistja nr. 1 e Kinës Li Na marrin pjesë në këtë garë dhe me siguri do të kenë paraqitje të shkëlqyer.

Pikërisht në bazë të këtyre përparimeve, z. Zhang Junhui është i bindur se turneu "China Open" ka hyrë në binarin e ngritjes. Ai tha:

"Sigurisht në ngritje! Në të kaluarën kinezët nuk kishin njohje të qartë për 'China Open' dhe tregonin vëmendje për të vetëm si një gjë e re, ndërsa tani një kontingjent shikuesish të rregullt kanë njohuri për turneun dhe e ndjekin me vëmendje. Ky është vërtetimi i ngritjes sonë." (Wang Lei)