Ju flet Radio e Jashtme e Kinës! Të dashur dëgjues, unë jam Pina, po takohemi përsëri në programin sotëm muzikor. Në programin e sotëm ju ftoj të shijoni meloditë e luajtura në erhu nga interpretuesi i ri kinez Chen Jun.

dëgjoni

Të dashur dëgjues, melodia që po dëgjoni, është melodia e interpretuar në erhu nga Chen Juni me titull: "Nata e bukur". Kjo është një vepër e shquar e krijuar nga mjeshtri i madh i muzikës popullore kineze Liu Tianhua. Kjo vepër me melodi të lehtë, të butë dhe të rrjedhshme përshkruan gëzimin e autorit që kalon së bashku me të afërmit dhe miqtë vigjiljen e Festës së Pranverës, festë tradicionale kineze.

dëgjoni

Chen Juni ka lindur në vitin 1969 në qytetin Changshou të provincës Jiangsu të Kinës lindore. I ati, Chen Yaoxing, është një interpretues i njohur kinez i veglës muzikore erhu. I ndikuar nga familja, që në vogëli Chen Junit i pëlqente vegla muzikore erhu. Kur ishte 4 vjeç ai filloi të mësonte interpretimin e erhu-it nga i ati dhe në moshën 7- vjeçare filloi të jepte shfaqje në skenë. Në moshën 12-vjeçare Chen Juni u pranua në Ansamblin e këngëve dhe valleve të Drejtorisë së Përgjithshme Politike të Ushtrisë Popullore Çlirimtare Kineze, duke hyrë kështu në rrugën artistike profesioniste. Për të pasur një zhvillim të mëtejshëm ai studioi kompozim në Konservatorin Qendror të Kinës. Melodia e kompozuar prej tij, "Flladi i liqenit Tajhu", fitoi çmim në konkursin e 6-të të veprave muzikore të Kinës.

Melodia që po ndiqni, titullohet "Flladi i liqenit Taihu", interpretuar nga Chen Juni së bashku me të atin. Melodia me muzikën e operës vendore të Kinës jugore Xi si material kryesor, përshkruan në mënyrë të gjallë panoramën e bukur të liqenit piktoresk Taihu.

Si një interpretues ushtarak, Chen Juni shkon shpesh në repartet ushtarake për të dhënë shfaqje dhe interpretimi i tij solo në erhu është i mirëpritur shumë nga ushtarët. Më poshtë ju ftoj të shijoni melodinë me titull "Vrapojnë kuajt e ushtrisë", që paraqit jetën në repartin ushtarak. Me melodinë entuziaste dhe krenare, kjo vepër muzikore shpreh tablonë e vrapimit të ushtarëve në fushë duke hipur në kalë.

dëgjoni

Këtë melodi Chen Juni e ka interpretuar me timbër të pastër, me mjeshtëri të madhe, në mënyrë të hollësishme dhe krenare. Ai ka qenë për shfaqje në mbi 10 vende dhe rajone të botës, si në ShBA, Gjermani, Francë, Singapor, Hong-Kong etj., ku është vlerësuar lart nga personalitetet e qarqeve muzikore. Në vitin 1997, Chen Juni dha një shfaqje në bashkëpunim me Orkestrën Shtetërore të Lilës të Francës. Mjeshtëria e interpretimit të tij i mahniti spektatorët, ndërsa muzikantët francezë e vlerësuan lart mjeshtërinë e tij, duke e quajtur "Paganini në interpretimin e erhu-së". Tani do të shijojmë bashkë melodinë "Gjuetia", interpretuar nga Chen Juni. Kjo melodi me forcë luftarake përshkruan një tablo të përleshjes së ashpër midis gjuetarit dhe kafshës.

dëgjoni

Ju flet Radio e Jashtme e Kinës ! Të dashur dëgjues, dëgjuat një grup melodish të luajtura në erhu nga Chen Juni, interpretues i ri i njohur kinez. Mirudëgjofshim të shtunën tjetër, në mikrofon për ju Pina.