Ka qenë me të vërtetë një moment historik. Ka ndodhur ashtu siç ishte parashikuar, Majkëll Shumaker ka kaluar i pari finishin e garës së Monzës dhe më pas ka deklaruar në konferencën për shtyp tërheqjen e tij nga sporti në fund të këtij sezoni. Në të vërtetë, menjëherë sapo ka përfunduar gara, Ferrari ka nxjerrë një komunikatë për shtyp, në internet, ku publikonte emrat e pilotëve për sezonin 2007, Kimi Raikonen dhe Felipe Masën. Ndërsa në komunikatën e dytë për shtyp, e cila ka qenë vetëm pas pak minutave, është zyrtarizuar tërheqja e Majkëll Shumakerit nga Formula 1. Në të vërtetë, gjithçka është lënë të kuptohet në sallën e konferencës për shtyp, ku Majkëll Shumaker, ndryshe nga herët e tjera, është parë shumë i emocionuar. "Kjo është një ditë shumë e veçantë për mua, pas gjithë asaj që ndodhi në pistë me renditjet dhe me tifozët. Më vjen keq, por më duhej të gjeja momentin e duhur dhe mendova se është ky. Kjo ishte gara ime e fundit në Monza dhe në fund të këtij sezoni do të largohem edhe nga Formula 1. Kam kaluar 30 vjet në këtë sport dhe kam dashuruar gjithçka që ishte pjesë e tij, momentet e mira, por edhe të këqija. Të gjitha këto e kanë bërë jetën time shumë të bukur. Dua t'i falënderoj të gjithë, në veçanti familjen dhe nënën, e cila nuk jeton më. Më pas dua të falënderoj bashkëshorten time Korina dhe fëmijët e mi. Të gjithë së bashku më kanë dhënë forcën për të bërë të gjitha këto që bëra në këto vite. Dua të falënderoj shumë edhe miqtë e mi që kam njohur gjatë karrierës sime në Formulën 1. Te Benetoni dhe te Ferrari. Dua të theksoj se kam punuar gjithmonë me njerëz shumë të zotë dhe them se do ta kem të vështirë të largohem. Janë me të vërtetë të mëdhenj. Megjithatë, momenti për t'u larguar herët a vonë do të vinte dhe tani erdhi. E mora këtë vendim kur ishim në garën e Indianapolisit, në atë moment të kampionatit kur edhe Masa po fillonte të paraqitej shumë mirë. Në të vërtetë është një pilot i talentuar. Në atë kohë vendosej edhe e ardhmja e tij dhe nuk ishte e drejtë që ai të humbiste të ardhmen," ka vazhduar Majkëll Shumaker. Pas garës së Italisë, lufta me Alonson është më e hapur se kurrë. "Tani më duhet të përqendrohem te kampionati dhe do të luftoj me gjithçka për ta fituar," ka vazhduar Shumi. Gjatë kohës që Majkëll Shumaker ndodhej në sallën e konferencës për shtytp dhe po fliste për vendimin e së ardhmes, një turmë e madhe tifozësh e ndiqnin nëpërmjet një ekrani të madh nga jashtë pistës. Ndoshta dikush mbeti edhe me gojë hapur... (Nga Sporti)