dëgjoni

Xiang Yu, një nga udhëheqësit e kryengritjes fshatare të shekullit të 3-të para erës së re, mbetet një hero i respektuar, të cilit i thurin lavdi brezat e mëvonshëm, megjithëse ai pësoi disfatë dhe përfundoi në vetëvrasje.

Xiang Yu lindi në një familje ushtarakësh brez pas brezi dhe ishte vigan i pashoq që mund të ngrinte një trekëmbësh bronzi qindra kilogramë të rëndë. Ai kishte shumë qejf të përdorte armët dhe qysh në vogëli filloi të mësonte artin ushtarak nga xhaxhai i tij, Xiang Liang. Në vitin 209 para erës së re, kur filloi lufta me përmasa të gjera e kryengritësve fshatarë kundër dinastisë Çin, ai u pranua në radhët e kryengritësve, së bashku me xhaxhanë e tij. Ai u tregua shumë trim dhe i shkathët në fushën e betejes dhe u bë shpejt komandanti i një reparti të kryengritësve.

Në vitin 207 para erës së re, Xiang Yu komandoi trupat e tij në marshimin drejt kryeqytetit Xian-yang. Pasi kaloi lumin Zhanghë, ai i urdhëroi komandantët dhe ushtarët të merrnin ushqime të thara të mjaftueshme për 3 ditë, të thyenin kazanët e kuzhinës dhe të fundosnin anijet luftarake në lumë. Pastaj tha: "Lulëzimi apo shfarosja e vendit varet nga ky aksion! Do të mbetemi gjallë vetëm me fitore, disfata do të thotë vdekje!" Kështu, trupat e kryengritësve filluan një luftim për jetë a vdekje me ushtrinë qeveritare të dinastisë Çin. Komandantët dhe ushtarët e dinin se ata nuk kishin rrugë prapakthimi, prandaj luftuan trimërisht dhe arritën fitore të rëndësishme.

Gjatë viteve të luftës, Xiang Yu u miqësua me Liu Bangun, udhëheqës i një reparti tjetër të kryengritësve. Të dy palët u morën vesh se njëri prej tyre, ai që do të merrte i pari kryeqytetin, do të shpallej monark. Asokohe Xiang Yu komandonte një ushtri prej 400 mijë vetash, kurse Liu Bang komandonte vetëm 100 mijë veta. Por ky i fundit e mori i parë kryeqytetin. Kur mori vesh këtë lajm, Xiang Yu u zemërua shumë dhe e shpuri ushtrinë e tij në Hongmen, një zonë afër kryeqytetit.

Me propozimin e një këshilltari, Xiang Yu e ftoi Liu Bangun në Hongmen dhe shtroi një banket, gjoja për nder të tij, por me qëllim që ta vriste në banket. Por meqenëse Liu Bang u tregua modest dhe tha se trupat e tij ishin tërhequr nga kryeqyteti, Xiang Yu ndryshoi mendje dhe e la Liu Bangun të ikte. Pastaj Xiang Yu, në krye të trupave të tij, hyri në kryeqytetin Xian-yang, ku ai u shpall perandor me titull "Monarku Hegjemon" dhe e emëroi Liu Bangun "mbretin e Hanit". Fill pas asaj ngjarjeje, Liu Bang filloi një luftë me Xiang Yunë, për të marrë në dorë pushtetin.

Në vitin 202 para erës së re, të dy palët bënë luftën finale në Gaixia. Trupat e Liu Bangut rrethuan trupat e Xiang Yusë dhe Liu Bangu urdhëroi ushtarët e vet të këndonin këngë të ish-shtetit Çu, që ishte vendlindja e Xiang Yusë. Ky i fundit dhe ushtarët e tij, kur dëgjuan ato këngë, kujtuan se vendlindja e tyre kishte rënë. Xiang Yu u dëshpërua dhe filloi të këndote me ndjenjë të kobshme. Në momentin kritik, e dashura e tij, Yu Ji u vetëvra me një shpatë. Xiang Yu e mposhti dhembjen në zemër dhe, duke komanduar 800 kalorësit e mbetur, çau rrethimin dhe arriti në bregun e lumit Ugjang, ku një peshkatar deshi ta çonte përtej lumit, që të kthehej në shtëpi. Por Xiang Yu psherëtiu gjatë dhe tha: "Ah, s'kam sy e faqe të shihem me bashkëfshatarët e mi!" Ndërkohë, erdhën pranë kundërshtarët që e kishin ndjekur këmba-këmbës. Xiang Yu u tha: "Doni kokën time për të raportuar meritat? Merreni! " Pastaj nxorri shpatën dhe u vetëvra, në moshën 31 vjeçare. (Zheng)