dëgjoni

Së shpejti do të organizohet panairi ndërkombëtar i librit i Pekinit. Si një nga përmbajtjet kryesore të tij, më 28 gusht u mbajt në Pekin Forumi Ndërkombëtar i Botimeve. Teknologjia e re është bërë fokus i vëmendjes së biznesmenëve kinezë dhe të huaj në këtë forum.

Do të dëgjoni tani korrespondencën me titull: "Teknologjia e re është bërë fokus i qarqeve kineze dhe të huaja të botimeve".

Forumi Ndërkombëtar i Botimeve i sivjetëm u organizua nga Drejtoria e Përgjithshme e Shtypit dhe e Botimeve e Kinës dhe Zyra e Shtypit e Këshillit të Shtetit të Kinës. Tema kryesore e këtij forumi është "Teknologjia e re dhe e ardhmja e qarqeve botuese". Në forum disa qindra funksionarë dhe specialistë të qarqeve kineze dhe të huaja të botimeve zhvilluan diskutime rreth sfidës dhe shanseve të sjella nga teknologjia digjitale, e internetit dhe telekomunikacionit për biznesin tradicional të botimeve. Në fjalën tematike të mbajtur në këtë forum, zv-drejtori i Drejtorisë së Përgjithshme të Shtypit dhe të Botimeve të Kinës Yu Yongzhan vuri në dukje se teknologjia e re i ka sjellë shumë shanse të reja çështjes së botimeve. Shkenca dhe teknologjia e re dhe e lartë e kanë ngritur shumë nivelin administrativ të botimeve tradicionale. Kështu, informatizimi i sektorit të botimeve, tirazhi i librave sipas kërkesës, libraritë në internet, si dhe shitblerja me anën e internetit etj., kanë ulur koston e botimeve dhe kanë zgjeruar përmasat e tyre. Por, nga ana tjetër, teknologjia e re ka ushtruar një ndikim negativ mbi botimet tradicionale. Yu Yongzhani tha :"Teknologjia digjitale dhe teknologjia e internetit u kanë sjellë botimeve tradicionale një sfidë të madhe. Sidomos leximi falas në internet ka ushtruar një ndikim negativ mbi shitjen e librave."

Yu Yongzhani tha se në strukturën e transmetimit tradicional të informacioneve, pa planifikimin dhe organizimin e shtëpisë botuese, botimi i librave nuk mund të kryhej mbarë, kurse pas daljes së teknologjisë së botimeve digjitale, çdo njeri që ka njohuri për kompjuterin dhe mundësi për t'u lidhur me internetin mund të bëhet botues, çdo person ka mundësi të botojë veprat e tij në internet dhe shtëpia botuese nuk është më një hallkë e pamungueshme e botimeve e as libraria nuk do të jetë më hallkë e domosdoshme për qarkullimin e librave. Si pasojë, botimet tradicionale ndodhen përpara konkurrimit gjithnjë e më të madh dhe është ngushtuar horizonti i ekzistencës së botimeve tradicionale.

Por teknologjia e re i ka sjellë edhe shans të ri biznesit të botimeve. Drejtorja e shefja ekzekutive e botimeve "HarperKollins", zonja Xhejn Fridman, tha se si biznesi i tretë i botimit të librave në gjuhën angleze në botë, ata po i shndërrojnë burimet e botimeve në format e internetit, celularit dhe audiovizuale. Ajo ka besim të plotë te tregu kinez. Zonja Fridman tha: ..2.. "Krahas botimeve tradicionale, 'HarperKollins' i ka kushtuar një rëndësi të madhe edhe botimit digjital dhe ka forcuar hapjen e tregut global, duke përfshirë edhe hapjen e tregut në Kinë dhe në Indi. Statistikat tregojnë se brezi i ri amerikan, para se të blejë libra, viziton në radhë të parë internetin. Gjatë viteve të fundit, edhe në Kinë gjithnjë e më shumë lexues nuk lexojnë librat tradicionalë, por lexojnë në internet".

Edhe drejtori i përgjithshëm i grupit të bashkuar të botimeve të Hong-Kongut, z. Chen Wanxiong, është i mendimit se l0 vjetët e ardhshëm do të jenë një periudhë e ndryshimit të botimeve tradicionale. Në fushën e botimeve tradicionale do të bëhet një reformë e madhe.

Sipas statistikave, deri në muajin e kaluar, numri i vizitorëve të internetit në Kinë ka arritur në l23 milionë, ndërsa numri i përdoruesve të celularit i ka kaluar 440 milionët. Prandaj, qeveria kineze parashtroi qartë se do të zhvillohen me të gjitha forcat industritë e reja, si ajo e krijimeve kulturore, e lojërave vizatimore dhe e transmetimeve digjitale, duke nxitur komunikimin reciprok të mediave tradicionale me internetin dhe telekomunikacionin e lëvizshëm etj. Të gjitha këto kanë krijuar një mjedis për vënien në praktikë të teknologjisë së re në botimet tradicionale.

Në fjalën tematike të mbajtur në këtë forum, zv-drejtori i Drejtorisë së Përgjithshme të Shtypit dhe të Botimeve të Kinës Yu Yongzhan tha gjithashtu se "Ne e kemi kuptuar mirë konkurrencën midis formave të ndryshme të botimeve. Prandaj, ne inkurajojmë jo vetëm sektorët tradicionalë të botimeve të aplikojnë teknologji të reja për të përballuar sfidën e teknologjisë së internetit dhe asaj digjitale, por kemi nxjerrë edhe një sërë politikash dhe rregulloresh për të nxitur zhvillimin e normalizimin e botimeve në internet "

Yu Yongzhan tha se duke u mbështetur tek krijimet autonome, Kina ka zgjidhur digjitalizimin e hieroglifeve kineze dhe sistemin e tipografisë me rreze lazer, si dhe teknologjinë e dërgimit së largu të faqeve të botimeve etj, por zbatimi i teknologjive të reja në më se 500 institucione botuese nuk është i ekuilibruar. Në nivelin e përgjithshëm

Në zbatimin e teknologjive të reja, Kina ka ende diferencë me vendet e zhvilluara.