dëgjoni

Kohët e fundit, një film kinez "Guri i çmendur" ka pasur sukses të madh financiar. Shpenzimet për filmin janë vetëm 5 milionë juanë, kurse të ardhurat i kanë kaluar 15 milionë juanët. Mund të thuhet se ky është filmi kinez që ka siguruar të ardhurat më të shumta në këta vjet. Si rezultat, regjisori i ri i filmit Ning Hao është bërë një regjisor i famshëm.

"Guri i çmendur" është një film argëtues e humoristik. Skenari i tij u shkrua bashkërisht nga regjisori dhe disa aktorë kryesorë. Subjekti i filmit zhvillohet në një fabrikë të vogël në qytetin Çongqing të Kinës jugperëndimore. Kur u rrëzua ndërtesa e vjetër e fabrikës, u zbulua rastësisht një gur i çmuar nefriti. Drejtori i fabrikës vendosi ta shesë këtë gur. Guri i çmuar tërhoqi një vjedhës të ardhur nga Hongkongu dhe 3 vjedhës të tjerë vendës. ata bënë përgatitje të ndryshme për ta vjedhur këtë gur, por më në fund dështuan. Personazhet e filmit flasin në të folmen e Çongqingut dhe dialogët e tyre ngjallin të qeshura të pandërprera te shikuesit. Regjisori Ning Hao tha:

"Në fakt, gjatë xhirimit të filmit, nuk kishte shumë të qeshura. Sepse aktorët dhe punonjësit ishin të tërhequr nga puna, atmosfera ishte serioze."

Ning Hao është një regjisor i ri me fat. Vitin e kaluar, kompania e argëtimeve "Yingyi" e Hongkongut e krijuar nga aktori i famshëm hongkongas Liu Dehua filloi të zbatojë "Programin e regjisorëve të rinj aziatikë" për të ndihmuar 6 regjisorë të rinj aziatikë të xhirojnë filma. Ning Hao është i vetmi regjisor i pjesës kontinentale të Kinës që merr financime. Ning Hao e shfrytëzoi këtë rast të mirë dhe pati sukses.

29-vjeçari Ning Hao lindi në qytetin Taiyuan të provincës Sansi. Kur ishte në shkollë të mesme, Ning Haos i pëlqenin shumë vizatimi dhe muzika, madje ai krijoi edhe një grup të vogël muzikor, por mësuesit dhe prindërit ishin kundër që Ning Hao të merrej me muzikë. Pas mbarimit të shkollës së mesme, Ning Hao punoi për një vit, pastaj vendosi të largohet nga vendlindja. Ai tha:

"Pas diplomimit, punova në teatrin e dramës të qytetit Taiyuan për një vit. Atë kohë isha i mendimit se në Taiyuan nuk kishte shumë raste për punë, prandaj vendosa të shkoj në Pekin për të gjetur mundësi punësimi. Familja nuk më përkrahu, vetëm babai më dha 2000 juanë. Babai mendonte se pas mbarimit të këtyre parave, unë do të kthehesha në shtëpi."

Në fakt, Ning Hao nuk shkoi prapë në shtëpi. Në fillim ai mësoi fotografinë dhe fotografoi yje të filmit. Pastaj Ning Hao shkoi në Universitetin e Filmit të Pekinit për të studiuar dhe gradualisht filloi të xhirojë filma. Në vitin 2002, filmi i Ning Haos "Kullota" tërhoqi vëmendjen e Liu Dehuas dhe mori financime nga kompania e tij. Për shkak të talentit të shfaqur në filmin "Kullota", Ning Hao siguroi ndihmën e "Programit të regjisorëve të rinj aziatikë".

Duke folur për suksesin e filmit "Guri i çmendur", Ning Hao tha se ai dëshiron të xhirojë vetëm filma tërheqës. Ai tha:

"Jam i mendimit se filmi është një sektor ekonomik. Një film i mirë duhet të përshëndetet nga shikuesit duke marrë të ardhura të mira. Në fakt, tregu i filmit kinez është shumë i gjerë, shikuesit dëshirojnë të shikojnë filma me cilësi të lartë që pasqyrojnë jetën e vërtetë të tyre."

Faktet kanë vërtetuar se "Guri i çmendur" përputhet me kërkesat e shikuesve kinezë. Pas mbarimit të xhirimit të këtij filmi, Ning Hao nënshkroi marrëveshje bashkëpunimi me kompaninë "CAA". Kjo është një nga kompanitë më të mëdha të administrimit të regjisorëve të SHBA-së. Regjisorë të famshëm si Ang Li, John Woo, Stiven Spilberg etj. kanë nënshkruar marrëveshje bashkëpunimi me këtë kompani. Filmi i ri i Ning Haos "Vetura e kuqe" ka marrë financime. Ky do të jetë një film humoristik që përshkruan jetën e banorëve të thjeshtë. (Fani)