dëgjoni

Vdekshmëria e lartë apo e ulët e grave shtatzënave dhe lehonave është një nga treguesit e rëndësishëm të zhvillimit ekonomik e shoqëror dhe të shkallës së qytetërimit të një vendi ose të një rajoni. Meqenëse Kina është një vend me territor shumë të gjerë, zhvillimi ekonomik dhe shoqëror në krahinat e ndryshme nuk është i ekuilibruar, madje në disa krahina të pazhvilluara të Kinës Qendrore dhe të Kinës Perëndimore, vdekshmëria e grave shtatzënave dhe lehonave ka qenë gjithmonë relativisht e lartë. Duke filluar nga viti 2000, qeveria kineze ka marrë një sërë masash dhe ka vënë në zbatim një program pune për të ulur vdekshmërinë e shtatzënave dhe lehonave në këto krahina dhe janë arritur rezultate të kënaqshme në këtë drejtim.

Një nga zonat e pazhvilluara është edhe distrikti malor Muçuan, që gjendet në pjesën jugore të provincës Siçuan. U nisëm nga kryeqendra e distriktit, shkruan korrespondenti, udhëtuam 40 minuta me makinë nëpër një rrugë të vjetruar automobilistike dhe erdhëm në rrëzë të një mali, për të vizituar fshataren Li Yunzhen që e ka shtëpinë në shpatin e këtij mali. Ndërkohë, filloi një shi i imët.

Pas një udhëtimi edhe 30 minutave të tjera në një rrugë plot me baltë, mbërritëm në shtëpinë e zonjës Li Yunzhen. Kjo grua 40 vjeçare ka mbetur 4 herë shtatrënë që nga viti 1990, por për shkak të varfërisë së familjes së saj, 3 nga 4 foshnjat lindën të vdekur, sepse ajo lindi çdo herë në shtëpinë e vet, pa asnjë ndihmë sanitare, madje edhe vetë ajo çdo herë ishte në rrezik jete. Në vitin 2000, ajo do të lindte foshnjën e saj të 5-të, por mjekët e spitalit të fshatit të saj i bënë analizë dhe i thanë se pozicioni i embrionit nuk ishte në rregull dhe se ajo duhej medoemos të shkonte për të lindur në maternitet. Por këshillat e mjekëve e zunë ngushtë këtë grua të varfër.

"Kur më vizituar mjekët Ou dhe Liu, që janë mjekë të fshatit tonë, ata më këshilluan të shkoja për të lindur në maternitet, por unë ngula këmbë të kthehesha për të lindur në shtëpi, sepse nuk kisha para. Atëherë, mjekët Ou dhe Liu më mbajtën në spitalin e tyre duke më thënë se mund të paguaja më vonë, kur të kisha para. Shyqyr që ata më mbajtën atje, përndryshe edhe bija ime e vogël mund të lindte e vdekur."

Sipas rregullave përkatëse të kësaj zone, gratë shtatzëna të familjeve të varfra, siç është Li Yunnzhen, mund të marrin një subvencion nga administrata vendore në raste lindjesh dhe shpenzimet e mbetura ato mund t'i paguajnë më vonë. Në saje të këtyre rregullave, Li Yunzhen shkoi për herë të parë për të lindur në spital dhe e lindi të shëndetshme foshnjën e saj. Gjatë kohës kur ishte shtruar në spital, ajo shpenzoi 250 juanë. Administrata vendore i dha asaj 80 juanë si subvencion dhe pjesën tjetër të shpenzimeve ajo e pagoi më vonë.

Sekretari i komitetit të partisë për distriktin Muçuan, zoti Yeh Sanqiang, tha se duke filluar nga viti 2000, në gjithë distriktin e tij, mbi 1300 gra shtatzëna dhe lehona kanë marrë ndihmë nga administratat vendore dhe vëllimi i ndihmave arrin në 190 mijë juanë. Në saje të ndihmave, 70 % e grave shtatzëna i lindën foshnjat e tyre në spital.

Programi i uljes së vdekshmërisë së grave shtatzënave dhe lehonave u zbatua edhe në distriktet Ëbian, Gjinkou, Mabian etj që gjenden përreth distriktit Muçuan. Në disa zona të banuara kryesisht nga pakicat kombëtare dhe në disa zona të varfra, ende ekzistojnë zakonet besëtytnore dhe mënyrat e prapambetura të lindjes, prandaj sektorët përkatës organizojnë edukatën shëndetësore për t'i ndryshuar këto koncepte. Banorët e kombësisë Yi të distriktit Mabian e kanë pasur gjithmonë zakonin për t'i lindur fëmijët në shtëpinë e vet, duke thënë se fëmijët e lindur jashtë shtëpisë nuk i përkasin familjes së tyre. Tani pjesa më e madhe e grave të kësaj kombësie i kanë hedhur poshtë konceptet e prapambetura. Tian Qiong, një grua shtatzënë e kombësisë Yi, që erdhi për të lindur në spital, tha:

"Ne më mirë të lindim në spital, sepse pajisjet e spitalit janë të mira. Kur lind në spital, asgjë nuk më shqetëron."

Duke filluar nga viti 2000, programi i qeverisë kineze për uljen e vdekshmërisë së grave shtatzëna dhe lehonave është vënë në zbatim në 1000 distrikte, shifër kjo që mbulon pothuajse të gjitha zonat e pazhvilluara të Kinës Qendrore dhe të Kinës Perëndimore. Gjatë 6 vjetëve të fundit, krahas investimeve të administratave vendore në këtë dejtim, edhe qeveria qendrore kineze investoi 440 milionë juanë për zbatimin e këtij programi, që është programi më i madh për sigurimin e shëndetit të grave dhe fëmijëve që nga koha e shpalljes së Republikës sonë Popullore. Zëdhënësi i Ministrisë së Shëndetësisë të Kinës, zoti Mao Qunan, tha se programi i uljes së vdekshmërisë së grave shtatzëna dhe lehonave do të zbatohet më tej në mbarë vendin dhe do të përsosen më tej organizmat përkatës administrues në të gjitha krahinat e vendit, që të kujdesen si duhet për shëndetin e shtatzënave dhe lehonave. (Zheng)