Ju flet Radio e Jashtme e Kinës! Të dashur dëgjues, unë jam Pina, ju përshëndes përsëri nga Pekini. Në programin e sotëm muzikor do t'ju flas për këngëtaren e kombësisë mongole Morgen dhe do të dëgjoni disa këngë nga albumi i saj i parë me titull "Meloditë mongole të natyrës".

Kënga që po dëgjoni, titullohet "Ninulla mongole", kënduar nga Morgeni në gjuhën mongole. Kjo këngë është shumë e përhapur në zonën e kombësisë mongole dhe është shumë e pëlqyer nga banorët mongolë. Në këngë thuhet: "Qielli me yje ka mbuluar tokën, toka është duke pushuar. Në çadrën mongole dëgjohet vetëm ninulla e lehtë e nënës në gjumin e foshnjës, ninulla që rrjedh në arterin e tokës."

Të dashur dëgjues, dëgjuat këngën "Ninulla mongole", kënduar nga Morgeni.

Këngëtarja Morgen ka lindur në zonën blegtorale Alashan në veriperëndim të Rajonit Autonom të Mongolisë së Brendshme. E ndikuar nga e ëma këngëtare, Morgenit i pëlqente të këndonte që në vogëli dhe ishte shumë e aftë në këndimin e këngëve mongole. Më vonë ajo u bë këngëtare profesioniste në grupin artistik "Ulanmuçi", që jepte shfaqje në Mongolinë e Brendshme. Në vitin 2001, ajo u pranua në Institutin e Muzikës të Universitetit Qendror të Kombësive, duke mësuar nga këngëtarja e njohur dhe mjeshtrja e muzikës vokale Uzhna. Morgeni ka diapazon të gjerë, këndon në mënyrë të hollësishme e të rrjedhshme dhe me stil e karakteristikë të theksuar. Ajo ka ndjenjë të mirë muzikore dhe i kupton thellë veprat muzikore.

Kënga që po dëgjoni, titullohet "Alashani si qiell". Alashani është një zonë me ngjyra të mistershme primitive, që ndodhet në skajin perëndimor të Mongolisë së Brendshme, ku ka shkretëtirë, kullotë, pyje, hauze e liqene. Kjo këngë e bukur shpreh mallin dhe dashurinë e njerëzve për vendlindjen.

Kënga që dëgjuat, "Alashani si qiell", është një nga këngët e albumit të parë të Morgenit me titull "Meloditë mongole të natyrës", i publikuar në prill të këtij viti. Në këtë album përfshihen 12 këngë mongole të stileve të ndryshme dhe më të përhapurat. Në këto këngë ruhet krenaria dhe butësia e muzikës mongole, por janë futur edhe shumë elemente moderne. Interpretimi i hollësishëm dhe me ndjenjë të thellë i Morgenit i ka bërë këto këngë më të gjalla dhe më prekëse.

Kënga që po dëgjoni, titullohet "Stepa e babait dhe lumi i nënës". Tekstin e këngës e ka shkruar poetja e njohur tajvaneze Xi Murong, ndërsa muzikën e ka bërë kompozitori mongol Ulantoga. Me ndjenjë pak melankolike dhe me melodinë e bukur kënga përshkruan mallëngjimin e një pasardhëseje të stepës, e cila që në vogëli dëgjonte tregimet e prindërve për bukuritë e stepës, dhe kur u rrit u kthye me ëndrrën për stepën në vendlindje.

Në këngë thuhet: "Babai ka përshkruar aromën e stepës, që të mos e harroj për asnjë çast. Nëna ka shpjeguar me dashuri atë lumë të gjatë, që përshkon vendlindjen time të largët në rrafshnaltën mongole. Tani, duke qëndruar në stepën erëmirë, e shoh nga afër këtë tokë të pafund dhe më rrjedhin lotët si shi. Uji i lumit këndon urimet e paraardhësve, me qëllim që fëmijët jashtë vendlindjes të gjejnë rrugën për t'u kthyer. Stepa e babait dhe lumi i nënës, nuk mund të flas në gjuhën amtare, por pranoni ju lutem hidhërimin dhe gëzimin tim. Edhe unë jam fëmijë i rrafshnaltës, këndoj një këngë në zemër, ku është stepa e babait dhe lumi i nënës."

Të dashur dëgjues, ndoqët këngën "Stepa e babait dhe lumi i nënës" nga albumi i këngëtares Morgen.

Morgeni, që vazhdon studimet në Universitetin Qendror të Kombësive, mund të këndojë këngë të stileve të ndryshme në gjuhët mongole dhe hane. Ajo është shumë e aftë në këndimin e këngëve popullore mongole dhe këngëve moderne. Tani le të shijojmë së bashku këngën popullore me titull "Nongjija", kënduar nga Morgeni në gjuhët mongole dhe hane.

Nongjija është emri i një vajze mongole, e cila është e bukur, e dashur, zemërmirë dhe e njohur në stepë. Për fat të keq ajo u martua larg vendlindjes. Melodia dhe teksti i thjeshtë dhe melankolik shprehin ndjenjat e sinqerta dhe modeste midis njerëzve. Morgeni e ka kënduar këtë këngë në mënyrë të freskët, moderne dhe të natyrshme. Në këngë thuhet: "Në bregun e lumit të gjatë Laoha, ecën një kalë me shalë të varur. Vajzën e bukur Nongjija po e martojnë larg vendlindjes."

Ju flet Radio e Jashtme e Kinës. Të dashur dëgjues, ju fola për këngëtaren e kombësisë mongole Morgen dhe dëgjuat disa këngë nga albumi i saj i parë. Mirudëgjofshim të shtunën tjetër, në mikrofon për ju Pina.