dëgjoni

Dëgjues të dashur, ju me siguri e njihni mirë këtë këngë të lashtë arbëreshe me një histori mbi 500 vjeçare, interpretuar nga këngëtarja e njohur shqiptare Elsa Lila, e ftuar në Festivalin e 41-të të RTSH-së.

Duke përshkruar interpretimin e këngëtares Elsa Lila në gazetën"Shekulli" thuhet : " Po ashtu befasuese është shfaqur këtë mbrëmje finale edhe këngëtarja Elsa Lila. E po të mos e kishte "urdhëruar" Adi Krasta përcjelljen e Elsa Lilës nga skena, duartrokitjet do ta mbanin aty për shumë kohë. Pasi ka kënduar dy këngë përshëndetëse në këtë natë finale, Lila është duartrokitur si kurrë ndonjëherë në skenat shqiptare. Me këngën "La porta del silencio" me të cilën ka konkurruar edhe për në Sanremo", si dhe këngën arbëreshe "Moj e bukura More", Elsa Lila ka dhuruar në sallën e madhe të Pallatit të Kongreseve emocione të papërsëritshme.

Kjo këngëtare kaq e njohur në Shqipëri, në Itali dhe në vendet e tjera evropiane filloi të njihet edhe në Kinë.

Gjatë qëndrimit të këngëtares së njohur Elsa Lila në Pekin, ajo u ftua nga korrespondentja e redaksisë së gjuhës shqipe të Radios së Jashtme e Kinës Huailu si mysafire në Radion e Jashtme të Kinës, ku përveç takimit me shqipfolësit e redaksisë së gjuhës shqipe, vizitës në vitrinat e radios me dhurata të dërguara nga dëgjuesit shqiptarë etj, ajo u ftua për intervistë jo vetëm në emisionet e gjuhës shqipe, por edhe të gjuhës italiane, në "Inetradio" dhe në " CRI Neësradio".

Në uebsajtin artistik argëtues të Radios së Jashtme të Kinës është paraqitur edhe këngëtarja Elsa Lila me shkrime, fotografi dhe këngë të bukura.

Kurse në "Inetradio", Elsa Lila u intervistua në gjuhën angleze dhe u xhirua edhe në video për uebsajtin e emisioneve të kësaj radioje. Pra, këngëtarja e njohur shqiptare Elsa Lila është pritur me ngrohtësi nga sektorë përkatës të Radios së Jashtme të Kinës.

Në vazhdim të këtij emisioni do të dëgjoni intervistën e dhënë nga Elsa Lila korrespondentes së redaksisë së gjuhës shqipe RJK-së?

Intervista me ambasadoren e muzikës shqiptare Elsa Lila

Ju flet Radio e Jashtme e Kinës, të dashur dëgjues, jam folësja Huailu. Redaksia jonë e emisioneve të gjuhës shqipe të Radios së Jashtme të Kinës pati nderin të ftojë për intervistë ambasadoren e muzikës shqiptare Elsa Lila në studion e Radios sonë.

Ju ftojmë ta ndiqni këtë intervistë.

1 Mirëdita zonjusha Elsa Lila, si i keni kaluar këto ditë në Pekin? Cilat janë përshtypjet që ju ka lënë qyteti i lashtë i Pekinit?

Mirëdita të gjithve dëgjuesve! Për mua është hera e dytë që gjendem në Pekin dhe është gjithmon një kenaqsi që të rikthehem në këtë qytet të bukur dhe me tradita. Eshtë një qytet që mbart mbi supe një histori të lashtë, një kulturë të mbrekullueshme. Kam patur rastin të shëtis disa nga monumentet si Pallati i madh i Mao Zedong, Pallati i Verës së Perandorit dhe disa tempuj, më kanë pëlqyer shumë dhe jam ndjer shumë mirë midis këtij populli mikpritës.

2. Nga njoftimet e mediave shqiptare mësova se jeni një këngëtare e shumëpritur në Shqipëri, Itali, Spanjë, Austri dhe në shumë vende të Evropës. A mund të më tregoni se si e keni filluar jetën tuaj si këngëtare ? Kush e zbuloi talentin tuaj ?

Kam filluar të këndoj që në moshën 15 vjeçare, por pasioni për muzikën ka qenë gjithmonë i pranishëm në jetën time sepse babai im ka qene dhe është këngëtar i muzikës lirike dhe nëna ime ka qene violiniste, kështu që jam rritur në një familje muzikantësh. Pra siç e thashë më parë kam filluar të këndoj në moshën 15 vjeçare, kur mora pjese në festivalin e këngës për fëmije në Tiranë ku fitova çmimin e dytë aty ishte i pranishëm kompozitori Valentin Veizi i cili më dëgjoi dhe me ftoi qe të merrja pjesë në festivalin e dhjetorit që mbahet çdo vit në Shqipëri dhe është bërë tashme traditë. Në këtë festival une fitova çmimin e pare dhe që aty unë fillova karrieren time artistike në Shqipëri.

3. Nga mediat mora vesh gjithashtu se ju jeni fituese e shumë festivaleve kombëtare dhe ndërkombëtare, se jeni quajtur nga ish-presidenti i Shqipërisë Sali Berisha si "Selin Dioni i Ballkanit" dhe jeni shpallur nga ish-presidenti i Shqipërisë Rexhep Mejdani si "ambasadore e muzikës shqipëtare në botë". Edhe tani gjatë qëndrimit 5 vjeçar në Itali, ju keni spikatur si këngëtare e re me potencial nga ana vokale në Itali e do të veçonim edhe pjesëmarrjen tuaj në Festivalin e Sanremos.

A mund të na tregoni se si e keni arritur një sukses kaq të madh dhe a keni pasur vështirësi gjatë rrugës së karierës suaj? Ç' përpjekje ju janë dashur për t'u bërë një këngëtare e njohur ?

Sigurisht mbasi arrihet suksesi i parë vështirësite fillojnë me të shumta sepse duhet që ta mbash atë sukses, pra nuk është e vështirë të arrish sukses por është e vështire ta mbash atë. Unë e arrita suksesin në një moshë shumë të re në moshën 15 vjeçare e sot jam 25 vjeçe pra 10 vjet që ushtroj këtë profesion që në rradhë të parë është kenaqsi dhe pastaj profesion. Jeta më dha rastin që të mos jetoj me në Shqipëri për fat të mirë ose për fat të keq kështu që mu desh ta rifilloja nga fillimi karieren edhe në Itali, sigurisht vështirësite kanë qenë të mëdha sepse njerëzit që të ndjekin gjatë rrugës artistike jo shpesh janë artiste të vërtete apo profesioniste dhe nuk arrijnë të kuptojnë nëse ti vërtet ke talent apo jo nuk të çmojnë vlerat e tue reale dhe unë për fat të keq kam hasur njerëz të tille në Itali shumë shpesh por më në fund vlerat triumfuan dhe arrita që të marre pjesë në festivalin e Sanremos që është organizimi me prestigjoz i gjithë vitit në Itali.

U bë një jehonë shumë e madhe, për pjesemarrjen time aty, si në Shqiperi dhe në Itali dhe pati shumë sukses publiku italian dhe ai shqiptar i pranishëm në Itali më ndoqen me shumë interes, në treg doli në shitje një disk i imi me titillin "Elsa" me emrin tim disku i parë i cili u shit shumë mirë dhe radiot e transmentuan shumë shpesh këngën time. Kjo ishte për sa i përket pjesemarrjes sime në Itali por përpara se unë të bëja këtë dalje në Itali kam pasur fatin që të prezantoj vendin tim Shqiperinë dhe në festivale të tjera ndërkombetare kështu siç u be "Discover 98" në Varna të Bullgarise ku unë fitova çmimin e parë midis 18-të shteteve pjesemarrese dhe ishte një emocion shumë i madh normalisht sepse aty nuk ishte Elsa qe nderohej por ishte shteti jonë që nderohej.

Gjithashtu nje vit me pas morra pjese edhe në Kazakistan Nalmati ish-kryeqyteti i kazakistanit në festivalin "Voice of Asia" ku më dhan çmimin e dytë dhe ai ishte një nder shumë i madh sepse u bënë shumë intervista në radio dhe televizionet e Kazakistanit. Këto jane mbresat më të thella dhe përshtypjet më të mira qe une kam pasur nga të gjitha aktivitetet qe kam bërë gjatë gjithë jetës sime.

4. Mora vesh se ju jo vetëm këndoni shumë bukur, por edhe recitoni bukur. A mund të na recitoni ndonjë pjesë të shkurtër poezie ?

Unë kam shume vite qe nuk recitoj por megjithate mundem, një pjesë shumë të vogel poezie që besoj që të gjithë shqiptarët e dinë, me falni nëse nuk e recitoj bukur sepse jam këngetare dhe jo aktore.

O malet e Shqiperisë dhe ju o lisat e gjatë

...............................................

Mësova se ju jeni edhe studente e arkitekturës, e krahas shfaqjeve, ju studioni me zell deri natën vonë. Si i kombinoni studimet tuaja me aktivitetet artistike. A mund të na tregoni planin tuaj për zhvillimin e ardhshëm si këngëtare ?

Normal, çdo i ri kur mbaron shkollën e mesme kërkon që të marri një drejtim në jete edhe për sa i përket universitetit, edhe unë kisha shumë të dhëna për arkitekturën pasi isha shumë e zonja në vizatimin teknik gjatë shkollës së mesme dhe konkurova në universitet dhe për fat e kalova konkursin dhe tani siç e thatë dhe ju me parë jam studente e arkitekturës në Universitetin e Romës. Eshtë shumë e vështire qe ti kombinosh të dyja këto aktivitete shkollën dhe muzikën pasi muzika të ha shumë kohë në kuptimin qe duhet të udhëtosh shumë nuk je shumë e pranishme në shtëpi, koncertat zhvillohen gjithmonë në qytete të ndryshme dhe shtete të ndryshme kështu që është e vështirë qe ta ndjekësh rregullisht shkollën, por duke e patur me pasion mundohem qe ti gjej kohën edhe shkollëes dhe koha më e përshtatshme ashtu si e thatë edhe ju edhte nata, kështu kur me ngelet kohë natën kërkoj që të studioj në mënyrë që të kaloj edhe provimet e arkitekturës. Kurse për sa i përket projekteve të muzikës kam ndërmend që të realizoj një album në gjuhen italiane dhe një tjeter album në gjuhën shqipe që shpresoj që brenda këtij viti të jenë gati për publikun shqiptar dhe atë italian.

Në fund të kësaj interviste, ju lutem të na këndoni

edhe një fragment kënge.

Ju faleminderit për intervistën që na dhatë, ju uroj sukses të mëtejshme në të ardhmen.

Faleminderit, për mua ishte kenaqesi që bëra këtë interviste me ju për të gjitha shqiptarët kudo që janë dhe na ndjekin. Faleminderit !

( Zhai)