dëgjoni

Gjuha angleze është në përgjithësi alternativa e parë e shumë njerëzve për të mësuar një gjuhë tjetër pas gjuhës amtare, sepse ajo mbetet sot një gjuhë e rëndësishme që përdoret më shpesh në veprimtaritë ndërkombëtare. Megjithatë, me rritjen e potencialit ekonomik të Kinës dhe me ngritjen e pozitës së saj në arenën ndërkombëtare, gjithnjë e më shumë njerëz në botë e zgjedhin gjuhën kineze si gjuhën për të mësuar pas gjuhës amtare. Nga të dhënat përkatëse statistikore del se, sot në gjithë botën, ka 30 milionë njerëz që mësojnë gjuhën kineze dhe shumë prej tyre e konsiderojnë përvetësimin e kësaj gjuhe si një faktor të rëndësishëm të epërsisë së vet individuale dhe të ndërmarrjes së tyre në konkurrencën ndërkombëtare.

Vajza flokartë dhe sykaltër Kerstin Storm, që është një studente në Universitetin Minstel të Gjermanisë, filloi të kishte interes për Kinën dhe për gjuhën kineze qysh në kohën kur mësonte në shkollën e mesme të ciklit të lartë. Mirëpo, meqenëse në shkollën e saj nuk mësohej gjuha kineze, dëshira e saj nuk mund të bëhej realitet. Me të filluar studimet në universitet, Kerstin Storm zgjodhi mësimin e gjuhës kineze, duke e bërë realitet dëshirën e saj. Pas 4 vjet mësimi, ajo mund të bisedojë sot rrjedhshëm me studentët kinezë në gjuhën kineze.

"Mjaft ndërmarrje gjermane kanë sot filialet e tyre në Kinë, sepse ato mund të gjejnë në Kinë më shumë shanse për zhvillimi të mëtejshëm. Marrëdhëniet tregtare të Gjermanisë me Kinën po zgjerohen gjithnjë e më shumë. Prandaj unë jam e mendimit se përvetësimi i gjuhës kineze mund të më lehtësojë gjetjen e vendi pune."

Zonja Vang Çao, një mësuese kineze që jep gjuhën kineze në Korenë e Jugut, tha se, sot në Korenë e Jugut, mjaft njerëz mësojnë gjuhën kineze si gjuhë të dytë. Ajo tha se zelli i nxënësve për të mësuar gjuhën kineze e ka prekur atë.

"Një zonjë jugkoreane vonohet shpesh herë në mësim sepse është shumë e zënë me punë. Por, sa herë që vjen në mësim, ajo vjen me vrap dhe e djersitur. Ajo plotëson në kohë ushtrimet në shtëpi, edhe pse s'ka shumë kohë të lirë. Mua më duket se jugkoreanët e pëlqejnë gjuhën kineze dhe interesohen për Kinën. Shumë prej tyre thonë se do të kenë rast të vijnë për punë ose për turizëm në Kinë. Unë e ndiej veten shumë të gëzuar se m'u dha rasti që, me punën time, të ndërtoj një urë, nëpërmjet së cilës jugkoreanët do të njohin Kinën."

Nën shtytjen e entuziazmit vazhdimisht në rritje për të mësuar gjuhën kineze, edhe qeveritë e shumë vendeve kanë filluar t'i kushtojnë vëmendje mësimdhënies së gjuhës kineze. Zoti Vu Minh Tuan, zyrtar i Ministrisë së Arsimit dhe Edukimit të Vietnamit, tha:

"Tani, studentët vietnamezë kanë shumë qejf të mësojnë gjuhën kineze. Krahas mësimdhënies së gjuhës kineze në universitete, qeveria vietnameze ka krijuar edhe shumë qendra të gjuhës kineze, ku studentët mësojnë gjuhën kineze duke shfrytëzuar kohën e lirë."

Siç mësohet, provimi i gjuhës kineze është bërë një nga provimet unike të shkollave të mesme në shumë krahina të Gjermanisë; edhe sektorët arsimorë të Anglisë kanë përpunuar programin e mësimdhënies së gjuhës kineze në shkollat e mesme; ndërsa sektorët arsimorë të Indonezisë kanë në plan që, në vitin e ardhshëm, në mbi 8000 shkolla të mesme të mbarë vendit të fillojnë mësimdhënien e gjuhës kineze.

Vitet e fundit, për shkak se është ngritur dëshira për të mësuar gjuhën kineze, ndihet gjithnjë e më shumë mungesa e mësuesve të gjuhës kineze në disa vende. Duke marrë parasysh këtë gjendje, qeveria kineze vendosi që, në bashkëpunim me qeveritë e atyre vendeve, të hapë jashtë vendit disa "institute të Konfucit" si institucione të mësimdhënies së gjuhës kineze dhe të përhapjes së kulturës kineze. Në vitin 2004, u hap Instituti i parë i Konfucit në Korenë e Jugut dhe, deri tani, janë hapur 80 institute të Konfucit ose klasa të Konfucit në 36 vende dhe rajone të botës. Siç mësohet, krahas mësimdhënies së gjuhës kineze, pjesa më e madhe e tyre organizojnë edhe provime dhe konkurse të të mësuarit të gjuhës kineze dhe bëjnë konsultime lidhur me ardhjen për studime në Kinë. Institutet e Konfucit janë bërë sot terrenet më të rëndësishme, ku të huajt mësojnë gjuhën kineze dhe njihen me Kinën.

Të organizuar nga sektorët përkatës të Kinës, shkollat e larta përkatëse dhe organizmat botues të Kinës dhe të disa vendeve të tjera do të bëjnë studimin e kujdesshëm të programeve të mësimdhënies dhe të lëndëve mësimore të gjuhës kineze në SHBA, Angli, Francë dhe vende të tjera, do të ndërrojnë materialet e vejtra mësimore të gjuhës kineze me të reja e do të intensifikojnë përpilimin dhe përhapjen e materialeve mësimore digjitale dhe të multimediave të gjuhës kineze në vendet e tjera. (Zheng)